“Kev Ntseeg Yexus Khetos,” Liyahaunas, Plaub Hlis Ntuj 2023.
Zaj Lus hauv Liyahaunas Txhua Hli, Plaub Hlis Ntuj 2023
Kev Ntseeg Yexus Khetos
Kev ntseeg Yexus Khetos yog thawj lub ntsiab cai ntawm txoj moo zoo (saib Tej Nqe Kev Ntseeg 1:4). Peb txoj kev ntseeg yuav pab peb xaiv tej yam kom peb rov qab mus cuag peb Leej Txiv Saum Ntuj Ceeb Tsheej. Peb yuav tsum ua hauj lwm tas peb lub neej kom txhawb peb txoj kev ntseeg lub zog.
Kev Ntseeg Yog Dab Tsi?
Kev ntseeg yog kev tso siab rau ib tug neeg los yog ib yam dab tsi. Kev ntseeg yog kev cia siab txog tej yam uas muaj tseeb, txawm yog peb tsis pom los sis tsis to taub tag nrho (saib Henplais 11:1; Amas 32:21).
Tej qhov los ntawm Khetos thiab tus Nom Tswv Hluas, los ntawm Heinrich Hofmann
Kev Ntseeg uas Tsom Ntsoov rau Yexus Khetos
Yog tias peb xav tau kev cawm seej, peb txoj kev ntseeg yuav tsum tsom ntsoov rau Yexus Khetos uas yog peb tus Cawm Seej thiab peb tus Txhiv Dim. Kev ntseeg Yexus Khetos txhais tias peb tso siab rau Nws. Txhais tias peb cia siab tos ntsoov Nws—tso siab rau Nws lub hwj chim, kev txawj ntse, thiab kev hlub. Txhais tias peb ntseeg thiab ua raws li Nws tej lus qhia.
Ua rau Peb txoj Kev Ntseeg Loj Tuaj
Kev ntseeg yog ib lub txiaj ntsim los ntawm Vajtswv, tiam sis peb yuav tsum nrhiav thiab ua hauj lwm kom peb txoj kev ntseeg muaj zog. Peb txoj kev ntseeg yuav loj tuaj thaum peb thov Vajtswv thiab kawm cov vaj lug kub thiab cov lus qhia ntawm cov yaj saub. Peb txoj kev ntseeg kuj yuav loj tuaj thaum peb ua neej ncaj ncees thiab ua raws li peb tej kev khi lus.
Kev Ua Neej Raws Li Kev Ntseeg
Kev ntseeg tsis yog kev lam ntseeg xwb. Yeej yog kev ua raws li kev ntseeg ntawd. Peb qhia tias peb ntseeg li cas los ntawm peb txoj kev ua neej. Kev ntseeg Yexus Khetos ua rau peb xav coj raws li Nws tus yam ntxwv uas zoo tag nrho. Peb txoj kev ntseeg ua rau peb ua raws li cov lus txib, hloov siab lees txim txoog peb tej kev txhaum, thiab ua raws li tej kev khi lus.
Kev Ntseeg Ua rau Yus Txais tej Txuj Ci Tseem Ceeb
Kev ntseeg ua rau yus txais tau tej txuj ci tseem ceeb, xws li kev ua yog toog, kev ua npau suav, kev kho mob, thiab lwm lub txiaj ntsim uas los ntawm Vajtswv. Cov vaj lug kub muaj dab neeg ntau txog cov neeg uas tau txais tej txuj ci tseem ceeb los ntawm tus Tswv vim lawv ntseeg Nws. Saib “Txuj Ci Tseem Ceeb” hauv Phau Qhia txog Vaj Lug Kub kom kawm ntxwv.
Kev Ntseeg Yuav Ua rau Yus Nyob Kaj Siab Lug
Kev ntseeg Vajtswv thiab Nws txoj hau kev cawm seej yuav txhawb peb lub siab thaum peb raug teeb meem. Kev ntseeg yuav ua rau peb muaj zog txaus mus tom hauv ntej thiab ua siab loj nyiaj tej yam uas nyuaj. Txawm yog peb tsis paub yav tom ntej yuav zoo li cas, peb txoj kev ntseeg tus Cawm Seej yuav ua rau peb nyob kaj siab lug.
Kev Ntseeg Yexus Khetos Ua rau Yus Txais Kev Cawm Seej
Kev muab siab rau ntseeg Yexus Khetos yuav ua rau peb txais tau kev cawm seej. Yexus Khetos tau npaj kev rau peb txais tau txoj sia nyob mus ib txhis. Thaum peb ua raws li peb txoj kev ntseeg Nws, ces Nws yuav zam txim rau peb tej kev txhaum thiab peb yuav rov qab mus nrog Vajtswv nyob dua.
© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, April 2023. Language. 19006 295