Ubutumwa Ngarukakwezi bwa Liyahona , Mata 2023

Ukwizera muri Yesu Kristo

Yesu Kristo, cyahanzwe na Harry Anderson

Kugira ukwizera muri Yesu Kristo ni ihame rya mbere ry’Inkuru Nziza (reba Ingingo z’Ukwizera 1:4). Ukwizera kwacu kuzadufasha gukora amahitamo azatuganisha ku gusubira kwa Data wo mu Ijuru. Dushobora gukora kugira ngo dukomeze ukwizera kwacu ubuzima bwacu bwose.

Ukwizera Ni Iki?

Ukwizera ni ukwemera guhamye cyangwa kugirira icyizere ikintu runaka. Kugira ukwizera bikubiyemo kwiringira no kwemera ko ibintu ari ukuri, n’iyo twaba tudashobora kubibona cyangwa kubisobanukirwa neza (reba Abaheburayo 11:1; Aluma 32:21).

Igihangano cya Christ and the Rich Young Ruler [Kristo n’Umutware ukiri Muto w’Umukungu], cyahanzwe na Heinrich Hofmann

Ukwizera Gushingiye muri Yesu Kristo

Kugira ngo kutuyobore ku gakiza, ukwizera kwacu kugomba gushingira muri Yesu Kristo nk’Umukiza n’Umucunguzi wacu. Kugira ukwizera muri Kristo bisobanura kugira icyizere muri We. Bisobanuye kwishingikiriza bisesuye kuri We—kugirira icyizere mu bubasha Bwe, ubwenge Bwe n’urukundo Rwe. Bikubiyemo kandi kwemera no gukurikiza inyigisho ze.

Kongera Ukwizera Kwacu

Ukwizera ni impano iva ku Mana, ariko tugomba kugushakisha no guharanira kukugumana. Dushobora kongera ukwizera kwacu dusenga kandi twiga ibyanditswe bitagatifu n’inyigisho z’abahanuzi b’iminsi ya nyuma. Tunashimangira ukwizera kwacu kandi uko tubaho mu bukiranutsi kandi twubahiriza ibihangobyacu.

Kubaho mu Kwizera

Ukwizera kurenze ukwemera gusanzwe. Kurimo gushyira mu bikorwa uko kwemera. Twerekana ukwizera kwacu mu buryo tubayeho. Ukwizera muri Yesu Kristo kudutera gukurikiza urugero Rwe rutunganye. Ukwizera kwacu kutuganisha ku kumvira amategeko, kwihana ibyaha byacu, gukora no kubahiriza ibihango.

Ukwizera Gushobora Kugeza ku Bitangaza

Ukwizera nyakuri kuzana ibitangaza, bishoboka ko byabamo amayerekwa, inzozi, gukizwa, n’izindi mpano zituruka ku Mana. Ibyanditswe bitagatifu birimo inkuru nyinshi z’abantu bakiriye ibitangaza bivuye kuri Nyagasani kubera ukwizera kwabo muri We. Reba “Igitangaza” muri Guide to the Scriptures ku bw’ingero.

Ukwizera Gushobora Kuzana Amahoro

Kugira ukwizera mu Mana no mu mugambi w’agakiza Wayo bishobora kudukomeza mu mbogamizi zacu. Ukwizera gushobora kuduha imbaraga zidufasha kujya mbere no guhangana n’ibizazane dufite ubutwari. N’iyo ahazaza haba hateye impungenge, ukwizera kwacu mu Mukiza gushobora kuduha amahoro.

Ukwizera muri Yesu Kristo kujyana ku Gakiza

Gukoresha ukwizera muri Kristo bizatuganisha ku gakiza kacu. Kristo yaduteguriye inzira yo kwakira ubugingo buhoraho. Uko tubaho mu kwizera muri We, dushobora kubabarirwa ibyaha byacu kandi tugasubira kubana n’Imana.

Mu Byanditswe Bitagatifu

Ukwizera guturuka mu kumva ijambo ry’Imana (reba Abaroma 10:17).

Ukwizera kudafite ibikorwa kuba gupfuye (reba Yakobo 2:17–18).

Nyagasani ashobora kudukorera ibintu byose niba dufite ukwizera (reba 1 Nefi 7:12).

Amagambo yo Kwibuka

Igihango: ni isezerano ritagatifu tugirana n’Imana. Dukora ibihango mu gihe cy’imigenzo nk’umubatizo n’ingabire y’ingoro y’Imana.

Igitangaza: ni ikintu kibaho kidasanzwe gitewe n’ububasha bw’Imana. Tubona ibitangaza kubera ukwizera kwacu muri Nyagasani.

Umugambi w’Agakiza: umugambi w’Imana ufasha abana Bayo kunesha icyaha n’urupfu kugira ngo tuzayigarukire. Ukwizera muri Yesu Kristo ni ingirakamaro muri uyu mugambi kubera ko tuzakizwa binyuze mu Mpongano Ye gusa.

Menya Ibindi Byisumbuyeho

Ubaye ufite ibibazo ku bijyanye n’ukwizera, ushobora kuvugisha abavandimwe bafasha b’igitsina gabo n’ab’igitsina gore, abayobozi ba paruwasi yawe cyangwa ab’ishami ryawe, cyangwa abavugabutumwa. Ushobora kandi kubona izindi nyigisho n’ibindi byifashishwa byerekeye ukwizera kuri ChurchofJesusChrist.org cyangwa muri porogaramu y’Isomero ry’Inkuru Nziza.

© 2023 by Intellectual Reserve, Inc. All rights reserved. Cyacapiwe muri Leta Zunze Ubumwe z’Amerika. Ukwemerwa kw’Icyongereza: 6/19. Ukwemerwa k’ubusemuzi: 6/19. Ubusemuzi bwa Monthly Liahona Message, April 2023. Language. 19006 716