Ennaan eo an Liaona Kajjojo Allōn̄, Eprōļ 2023

Tōmak ilo Jisōs Kraist

Jisōs Kraist, jān Harry Anderson

Wōr Tōmak ilo Jisōs Kraist ej pedped in katak eo m̧oktata an gospel eo (lale Laajrak in Tōmak ko 1:4). Tōmak eo ad enaaj jipan̄ kōj kōm̧m̧ani kāālet ko me renaaj tōlļo̧k kōj n̄an Jemedwōj Ilan̄. Jemaron̄ jerbal n̄an kōkajoorļok tōmak eo ad ilo aolepān mour ko ad.

Ta In Tōmak?

Tōmak ej juon lōke edim ilo juon men. N̄an tōmak ekitbuuj kōjatdikdik kōn im tōmak ilo men ko me rej m̧ool, jekdo̧o̧n n̄e jejjab maron̄ lo er ak edipio ad meļeļe kaki (lale Hibru 11:1; Alma 32:21).

Dipdik in meļeļe ko jān Kraist im Rim̧weie eo Edik, jān Heinrich Hofmann

Tōmak ej Pād Eļaptata ilo Jisōs Kraist

N̄an tōlļo̧k n̄an lo̧mo̧o̧r, tōmak eo ad ej aikuj pād eļaptata ilo Jisōs Kraist āinwōt ad Rilo̧mo̧o̧r im Ripinmuur. Wōr tōmak ilo Kraist ej meļeļein wōr lōke ilo E. Ej meļeļe in lukkuun pedped ilo E—lōke ilo An kajoor, māletlet, im iakwe. Ej kitbuuj barāinwōt tōmak im ļoor katak ko An.

Kōļapļo̧k Ad Tōmak

Tōmak ej juon menin letok jān Anij, bōtaab jej aikuj kappukōte im jerbale n̄an kōkajoore wōt. Jemaron̄ kōļapļo̧k tōmak eo ad ilo jar im ekkatak jeje ko rekwojarjar im katak ko an rikanaan ro ilo raan ko āliktata. Jej barāinwōt kōkajoorļo̧k tōmak eo ad ilo ad mour jim̧we im kōjparok bujen ko ad.

Mour kōn Tōmak

Tōmak eļapļo̧k jān baj tōmak. Ej kitbuuj jerbale tōmak eo. Jej kwaļo̧k ad tōmak ilo wāween ad mour. Tōmak ilo Jisōs Kraist ej kōllowetak kōj n̄an ļoor waanjon̄ak eo An eweppān. Tōmak eo ad ej tōlļo̧k kōj n̄an pokake kien ko, ukweļo̧k jān jerawiwi ko ad, im kōm̧m̧an im kōjparok bujen ko.

Tōmak Emaron̄ Tōlļo̧k n̄an Mennin Bwilōn̄ ko

M̧ool in tōmak ej bōktok mennin bwilōn̄ ko, ko remaron̄ koba visōn ko, ettōņak ko, kemour ko, im menin letok ko jet me rej itok jān Anij. Jeje ko rekwojarjar repād ie elōn̄ bwebwenato ko kōn armej ro me raar bōk mennin bwilōn̄ ko jān Irooj kōnke kōn tōmak eo aer ilo E. Lale “Mennin Bwilōn̄” ilo Unin Tōl eo n̄an Jeje Ko Rekwōjarjar n̄an jet waanjon̄ak ko.

Tōmak Emaron̄ Bōktok Aenōm̧m̧an

Wōr tōmak ilo Anij im karōk in lo̧mo̧o̧r eo An emaron̄ kōkajoorļo̧k kōj ilo iien apan̄ ko ad. Tōmak emaron̄ letok n̄an kōj kajoor eo n̄an bun̄ m̧aanļo̧k im jelm̧ae apan̄ ko ad kōn peran. Jekdo̧o̧n n̄e ilju im jeklaj eo āinwōt jab jeļā kake, tōmak eo ad ilo Rilo̧mo̧o̧r emaron̄ letok n̄an kōj aenōm̧m̧an.

Tōmak ilo Jisōs Kraist ej Tōlļo̧k n̄an Lo̧mo̧o̧r

Kōjerbal tōmak ilo Kraist enaaj tōlļo̧k kōj n̄an lo̧mo̧o̧r. Kraist ekar kōpooj iaļ eo n̄an kōj n̄an bōk mour indeeo. Ilo ad mour kōn tōmak eo ad ilo E, jemaron̄ jeorļok jerawiwi ko ad im bar ro̧o̧l im mour ippān Anij bar juon alen.

Jān Jeje ko Rekwojarjar

Tōmak ej itok jān ron̄jake naan eo an Anij (lale Rom 10:17).

Tōmak ilo an ejjeļo̧k jerbal emej (lale Jemes 2:17–18).

Irooj emaron̄ kōm̧m̧ane aolep men ko n̄an kōj eļan̄n̄e ewōr ad tōmak (lale 1 Nipai 7:12).

Naan ko n̄an keememeji

Bujen: juon kallim̧ur ekwojarjar jej kōm̧m̧ane ippān Anij. Jej kōm̧m̧ane bujen ko ilo kain̄i ko āinwōt peptaij im menin letok kwojarjar eo an tampeļ.

Mennin Bwilōn̄: juon iien ekabwilōn̄lōn̄ kar kōm̧m̧an jān kajoor an Anij. Jej lo mennin bwilōn̄ ko kōn tōmak eo ad ilo Irooj.

Karōk in lo̧mo̧o̧r: karōk eo an Anij n̄an jipan̄ ajri ro Nejin anjo̧ ioon jerawiwi im mour n̄an bar ro̧o̧l n̄an Ippān. Tōmak ilo Jisōs Kraist eaorōk ilo karōk in kōnke kōn wōt Pinmuur eo An jemaron̄ in lo̧mo̧o̧r.

Kappukot Eļapļo̧k

Eļan̄n̄e ewōr am̧ kajjitōk ko kōn tōmak, kwomaron̄ kōnono ippān m̧aan im kōrā ro an jerbal in karejar ro am̧ , ritōl ro an ward ak branch eo am̧, ak mijenede ro. Kwomaron̄ barāinwōt lo katak ko im kein jipan̄ ko jet kōn tōmak ilo ChurchofJesusChrist.org ak ilo Gospel Library app eo.

© 2023 jān Intellectual Reserve, Inc. Aolep mālim ko rej pād ie. Kar būriin ilo USA. Kōmālim ilo kajin English: 6/19. Kōmālim ukook eo: 6/19. Ukook eo an Monthly Liahona Message, March 2023. Language. 19006 874