Parau poro’i tā’āva’e nō te Liahona ’Ēperēra 2023

Fa’aro’o ia Iesu Mesia

Iesu Mesia, nā Harry Anderson

Te fa’aro’o ia Iesu Mesia, ’o te parau tumu mātāmua ïa o te ’evanelia (hi’o Te mau Hīro’a Fa’aro’o 1:4). E tauturu tō tātou fa’aro’o ia tātou ’ia rave i te mau mā’itira’a ’o tē arata’i ia tātou i tō tātou Metua i te Ao ra. E nehenehe tātou e ha’a nō te ha’apūai i tō tātou fa’aro’o i te roara’a o tō tātou orara’a.

E aha te Fa’aro’o ?

Te fa’aro’o ’o te hō’ē ïa ti’aturira’a ’aore rā, te ti’aturi pāpū i te hō’ē mea. Te roa’ara’a te fa’aro’o, o te tīa’ira’a ïa ’e te ti’aturira’a i te mau mea parau mau, noa atu ē, ’aita tātou e ’ite ra i te reira ’aore rā, ’aita e māramarama hope roa i te reira (hi’o Hebera 11:1 ; Alama 32:21).

Fa’ata’ara’a nō roto mai i Te Mesia ’e te ha’apa’o ture tao’a rahi, nā Heinrich Hofmann

Fa’aro’o fa’atumuhia i ni’a ia Iesu Mesia

Nō te arata’i atu i te fa’aorara’a, e ti’a i tō tātou fa’aro’o ’ia fa’atumuhia i ni’a ia Iesu Mesia ’ei Faaora ’e ’ei Tāra’ehara nō tātou. Te roa’ara’a te fa’aro’o i te Mesia o te ti’aturira’a ïa iāna. Te aura’a ra, o te tūru’ira’a hope roa ïa i ni’a iāna—ma te ti’aturi i tōna mana, tōna māramarama, ’e tōna here. ’Oia ato’a te ti’aturira’a ’e te pe’era’a i tāna mau ha’api’ira’a.

Fa’arahira’a i tō tātou fa’aro’o

E hōro’a te fa’aro’o nō ’ō mai i te Atua ra, terā rā e ti’a ia tātou ’ia ’imi i te reira ’e ’ia ha’a nō te tāpe’a pūai noa i te reira. E nehenehe tātou e fa’arahi i tō tātou fa’aro’o nā roto i te purera’a ’e te tuatāpapara’a i te mau pāpa’ira’a mo’a ’e te mau ha’api’ira’a a te mau peropheta nō te mau mahana hope’a nei. E ha’apūai ato’a tātou i tō tātou fa’aro’o ’ia ora ana’e tātou ma te parau-ti’a ’e ’ia ha’apa’o ana’e i tā tātou mau fafaura’a.

Te orara’a nā roto i te fa’aro’o

’Ua hau atu te fa’aro’o i te ti’aturi-noa-ra’a. O te ’ohipara’a ïa i ni’a i te reira ti’aturira’a. E fa’a’ite tātou i tō tātou fa’aro’o i roto i te huru o tō tātou orara’a. E tūra’i te fa’aro’o ia Iesu Mesia ia tātou ’ia pe’e i tōna hi’ora’a maita’i roa. E arata’i tō tātou fa’aro’o ia tātou ’ia ha’apa’o i te mau fa’auera’a, ’ia tātarahapa i tā tātou mau hara, ’ia rave ’e ’ia ha’apa’o i te mau fafaura’a.

E nehenehe te fa’aro’o e arata’i atu i te mau temeio ra

E hopoi mai te fa’aro’o mau i te mau temeio, ’oia ho’i te mau ’ōrama, te mau moemoea, te mau fa’aorara’a ma’i, ’e te tahi atu mau horo’a no ’ō mai i te Atua ra. Tē vai ra i roto i te mau pāpa’ira’a mo’a e rave rahi ’ā’amu nō te mau ta’ata tei fāri’i i te mau temeio nō ’ō mai i te Fatu ra nō tō rātou fa’aro’o iāna. Hi’o « Temeio » i roto i te Arata’i nō te mau pāpa’ira’a mo’a nō te tahi mau hi’ora’a.

E nehenehe te fa’aro’o e hōro’a mai i te hau

E nehenehe te fa’aro’o i te Atua ’e i tāna fa’anahora’a nō te fa’aorara’a e ha’apūai ia tātou i roto i tō tātou mau tāmatara’a. E nehenehe te fa’aro’o e hōro’a mai ia tātou i te pūai nō te haere ti’a atu i mua e nō te fa’aruru i tō tātou mau fifi ma te itoito. Noa atu ē, e mea pāpū ’ore te ananahi, e nehenehe tō tātou fa’aro’o i te Fa’aora e hōro’a mai i te hau ia tātou.

E arata’i te fa’aro’o ia Iesu Mesia i tō tātou fa’aorara’a

E arata’i te fa’a’ohipara’a i te fa’aro’o i te Mesia i tō tātou fa’aorara’a. ’Ua fa’aineine te Mesia i te ’ē’a nō tātou nō te fāri’i i te ora mure ’ore. ’Ia ora ana’e tātou nā roto i tō tātou fa’aro’o iāna, e nehenehe tā tātou mau hara e fa’a’orehia ’e e ho’i fa’ahou e ora i pīha’i iho i te Atua.

Nō roto mai i te mau pāpa’ira’a mo’a

E tae mai te fa’aro’o nā roto i te fa’aro’ora’a i te parau a te Atua (hio i te Roma 10:17).

Te fa’aro’o ’aore e ’ohipa e mea pohe ïa (hi’o Iakobo 2:17–18).

E ti’a i te Fatu ’ia rave i te mau mea ato’a nō tātou mai te mea e fa’aro’o tō tātou (hi’o 1 Nephi 7:12).

Te mau parau e ha’amana’o

Fafaura’a : e parau fafau mo’a tā tātou e rave i mua i te Atua. E rave tātou i te mau fafaura’a i roto i te mau ’ōro’a mai te bāpetizora’a ’e te ’ōro’a hiero.

Te semeio : hō’ē ’ohipa maere tei tupu nā roto i te mana o te Atua. E ’ite tātou i te mau temeio nō tō tātou fa’aro’o i te Fatu.

Fa’anahora’a nō te fa’aorara’a : Te fa’anahora’a a te Atua nō te tauturu i tāna mau tamari’i ’ia upo’oti’a i ni’a i te hara ’e te pohe nō te ho’i iāna ra. E mea faufa’a te fa’aro’o ia Iesu Mesia i roto i teie fa’anahora’a nō te mea nā roto ana’e i tāna tāra’ehara e nehenehe ai tātou e fa’aorahia.

Ha’api’i rahi mai ā

Mai te mea e uira’a tā ’outou nō ni’a i te fa’aro’o, e nehenehe ’outou e parauparau i tō ’outou mau taea’e ’e ’aore rā mau tuahine aupuru, i tō ’outou mau fa’atere pāroita, ’e ’aore rā ’āma’a, ’e ’aore rā i te mau misiōnare. E ’ite-ato’a-hia ia ’outou te mau ha’api’ira’a ’e te tahi atu mau rāve’a tauturu nō ni’a i te fa’aro’o i ni’a i te ChurchofJesusChrist.org ’aore rā i roto i te fa’anahora’a rorouira o te Vaira’a buka ’evanelia.

© 2023 nā Intellectual Reserve, Inc. fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Parau poro’i tā’āva’e nō te Liahona, ’Ēperēra 2023. Language. 19006 000