Evri Manis Liahona Mesej, Jun 2023

Tabu Spirit I Save Helpem Yumi

Tabu Spirit i nambatri memba blong Godhed. Ol skripja oli talem tu we Hem i olsem Spirit ia, Tabu Spirit, o Spirit blong Givhan. Taem yumi lanem blong lisin long voes blong Hem, Hem bae i testifae long yumi abaot Jisas Kraes mo bae i helpem yumi blong lanem ol trutok blong gospel.

Memba blong Godhed

Papa Long Heven, Jisas Kraes, mo Tapu Spirit, Olgeta oli Godhed. Olgeta oli lavem yumi mo oli wok wan blong mekem i hapen plan ia blong fasin blong sevem man. I nomata se Papa long Heven mo Jisas Kraes i gat bodi blong mit mo bun, Tabu Spirit i no gat. Hem i wan spirit.

Witnes blong Papa mo Pikinini

Tabu Spirit “i witnes long Papa mo Pikinini,”(2 Nifae 31:18). Hemia i minim se yu save kasem wan testemoni abaot Papa long Heven mo Jisas Kraes tru long Tabu Spirit.

Testifae abaot Trutok

Tabu Spirit i testifae long evri trutok. Hem bae i helpem yumi save se gospel—wetem plan ia blong fasin blong sevem man, ol komanmen blong God, Restoresen, mo Atonmen blong Jisas Kraes—oli tru. Hem bae i mekem testemoni blong yumi i kam strong taem yumi gohed blong prea, obei ol komanmen, mo stadi long gospel.

Lidim mo Protektem Yumi

Tabu Spirit i save helpem yumi long ol desisen we yumi mekem mo protektem yumi long ol denja long saed blong bodi mo spirit. Hem bae i helpem yumi faenem ol ansa blong ol kwestin blong yumi sapos yumi prea mo traem blong mekem wanem we i raet. Oltaem bae Hem i lidim yumi “blong mekem gud” (Doktrin mo Ol Kavenan 11:12).

Givim Kamfot long Yumi

Samtaem Tabu Spirit oli talem olsem wan “Kamfota” (Jon 14:26). Hem i save fulumap yumi “wetem hop mo lav we i stret evriwan” (Moronae 8:26) taem yumi wari, harem nogud, o fraet. Taem Hem i helpem yumi filim lav blong God, yumi save winim tingting we i kam slak mo bae i givim paoa long yumi long taem blong ol hadtaem.

Presen Ia we I Tabu Spirit

Afta we yumi kasem baptaes, yumi kasem presen ia we i Tabu Spirit long wan odinens we oli singaotem konfemesen. Long taem we yumi kasem presen ia, yumi save gat Tabu Spirit olsem kompanion blong yumi evritaem, sapos nomo yumi stap laef folem stret mo gud fasin.

Pikja droing i kam long J. Kirk Richards

Olsem wanem Yumi Save Harem Tapu Spirit

Tabu Spirit i save toktok long ol pipol long ol difren wei. Hem ia i tekem tu, pis, ol filing blong kamfot o ol niu tingting abaot wanem blong talem o mekem. Taem yumi prea blong spirit i lidim yumi mo lisin long ol kwaet toktok blong Hem, yumi save lanem olsem wanem Hem i stap toktok long yumi.

I Kam long Ol Skripja

Tabu Spirit bae i tijim yufala evri samting (luk long Jon 14:26).

Yu save kam blong save trutok, tru long paoa blong Tabu Spirit (luk long Moronae 10:5).

Tabu spirit i save toktok long yu, long maen mo long hat blong yu (luk long Doktrin mo Ol Kavenan 8:2).

Ol Toktok blong Tingbaot

Plan ia blong fasin blong sevem man: Hem i plan blong God blong helpem ol pikinini blong Hem blong kam olsem Hem mo blong gobak stap wetem Hem.

Testemoni: wan witnes long saed blong spirit se wan samting i tru.

Odinens: wan tabu wok we oli mekem tru long atoriti blong prishud.

Faenemaot Moa

Sapos yu gat sam kwestin abaot Tapu Spirit, yu save stadi long ol skripja, ol toktok blong jeneral konfrens, mo ol nara risos insaed long Gospel Laebri (long ChurchofJesusChrist.org o long mobael ap). Yu save toktok tu wetem ol givhan brata mo sista, insaed long wod blong yu o long ol branj lida, o ol misinari.

© 2023 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Monthly Liahona Message, April 2023. Language. 19026 852