Porous ren Lioana Iteiten Maram, June 2023

Ewe Ngun mi Fel A Tongeni Anisi Kich

Ewe Ngun mi Fel ii ewe eunumenun kewe Unumon non Kot. Ewe pukefel mei pwan pwari pwun I ewe Ngun, ewe Ngun mi Fel, ika ewe chon Achipa. Nupwen sia kaieo ach sipwe ousening ngeni Mongungun, I epwe pwarata ngeni kich usun Jises Kraist pwan anisi kich ach sipwe sinei ekkewe ennetin ewe kapas allim.

Chochon ewe Unumon non Kot

Samach Kot won nang, Jises Kraist, me ewe Ngun mi Fel iei masowen ewe Godhead. Ir ra tongei kich me angang non tipew ar repwe wato ngeni kich ewe kokkotun manau ese much. Ika mwo pwun Samach won Nang me Jises Kraist mi wor fituker me chuur, ewe Ngun mi Fel ese wor ren. I emon ngun.

Chon pwarata ewe Sam me ewe Nau.

Ewe Ngun mi Fel “a pwarata usun ewe Sam me ewe Nau” (2 Nifai 31:18). Wewen pwun sia tongeni angei och pwarata usun Samach Kot won nang me Jises Kraist me non ewe Ngun mi Fel.

Pwarata ewe Ennet

Ewe Ngun mi Fel mi pwarata usun unusen ennet. I epwe anisi kich ach sipwe sineiochu ewe kapas allim—pwan pachenong ewe kokkotun manau ese much, an Kot kewe annuk, ewe Niwinsefanito, me ewe Achasefan an Jises Kraist—ir mi ennet. I epwe apochokuna ach pwarata nupwen ach sopwosopwono ne iotek, apwonueta ekkewe annuk, me kaieo ewe kapas allim.

Emweni me Tumwunu Kich

Ewe Ngun mi Fel mi tongeni emweni kich non ach finata me tumwunu kich seni osukosuken non aion me ngun. I epwe anisi kich ach sipwe kuna ponuwen ach kapas eis ika pwe sipwe iotek me fori met mi pung. I epwe emweni kich fansoun meinisin ne “fori mi pung” (Doctrine and Covenants 11:12).

Achipa Kich

Ewe Ngun mi Fel sia pwan eita ngeni fan ekoch pwe iei ewe “Chon Achipa” (John 14:26). I a tongeni wanong non netipach “apinukunuk me unusochun tong” (Moronai 8:26) nupwen ach ourek, netipeta, ika niwokus. Non an anisi kich ach sipwe mefi ewe tongen Kot, sia tongeni akufu nipwakingaw pwe sipwe pwaracho non ach sosot.

Ewe Nifangen ewe Ngun mi Fel

Murin ach papatais, sia angei ewe nifangen ewe Ngun mi Fel me non ew angangepin sia eita ngeni kapunguno. Nupwen sia angei ei niffang, sia tongeni angei chiechien ewe Ngun mi Fel fansoun meinisin ika pwe sia manau tupwon.

Sasing a feito seni J. Kirk Richards

Ifa Usun Ach Rongorong ngeni ewe Ngun mi Fel

Ewe Ngun mi Fel mi fos ngeni aramas non sokopaten wewe. Fan ekoch a fis non kinamwe, non memefin achipechip ika non weruwerin me orofesin met sipwe apasa ika fori. Nupwen ach iotek faniten emwen me ousening An kewe ourour, sia tongeni kaeo ifa usun A fos ngeni kich.

Seni ekkewe Pukefel

Ewe Ngun mi Fel epwe aiti ngonuk mettoch meinisin (nengeni John 14:26).

Ka tongeni sinei met mi ennet seni ewe Ngun mi Fel (nengeni Moronai 10:5).

Ewe Ngun mi Fel mi tongeni fos ngonuk non omw ekiek pwan non omw memef (nengeni Doctrine and Covenants 8:2).

Kapas kopwe Chechemeni

Kokkoten Manau ese Much: An Kot kokkot an epwe anisi Noun semirit ar repwe winiti usun I me niwin sefan ngeni I.

Pwarata: ew pwarata non ngun pwun och metoch mi ennet.

Angangepin: Ew foffor mi pin a fis ren mwumwutan ewe pristut.

Kutta Pwan Ekkoch

Ika mei wor omw kapas eis faniten ewe Ngun mi Fel, en mi tongeni aneia me kaieo seni ekkewe pukefel, kapasen non mwichenap, me pwan non ekkewe neeni me non ach ewe Gospel Library (ren ChurchofJesusChrist.org ika pwan non noumw ena mobile fon app). En mi pwan tongeni kapas ngeni noumi mwan ika fefin chon iamwir, noumi sou emwenin wart ika pranch, ika ekkewe misineri.

© 2023 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porous ren Liaona Iteiten Maram, April, 2023. Language. 19026 901