Ɔfiɔŋ-ke-ɔfiɔŋ Etop Liahona eke Ɔyɔhɔ Ɔfiɔŋ Itiokiet 2023

Edisana Spirit Ekeme Edinwam Nnyin

Edisana Spirit edi udiana owo ita ke Mbuot-Abasi. Ŋwed Abasi nko owut Enye nte Spirit, Edisana Spirit, mme Ndɔŋesit. Nte nnyin ikpepde ndikpaŋ-utɔŋ nnɔ uyo Esie, Enye eyetiŋ ikɔ ntiense ɔnɔ nnyin abaŋa Jesus Christ onyuŋ anwam nnyin ndikpep mme akpanikɔ eke ikɔ Abasi.

Udiana-owo eke Mbuot-Abasi

Ete eke Heaven, Jesus Christ, ye Edisana Spirit edi Mbuot-Abasi. Mmɔ ema nnyin enyuŋ enam utom ke edidianan-kiet man enam uduak erinyaŋa ukpɔŋada itie. Okposuk nte Ete eke Heaven ye Jesus Christ enyenede mme ikpɔkidem eke obuk ye ɔkpɔ, Edisana Spirit inyeneke. Enye edi spirit.

Ntiense eke Ete ye Eyen

Edisana Spirit “etie ntiese abaŋa Ete ye Eyen” (2 Nephi 31:18). Emi ɔwɔrɔ ete ke nnyin imikeme ndibɔ ikɔ ntiense kabaŋa Ete eke Heaven ye Jesus Christ oto ke Edisana Spirit.

Anditiŋ-ikɔ-ntiense mbaŋa Akpanikɔ

Edisana Spirit etiŋ-ikɔ-ntiense abaŋa ofuri akpanikɔ. Enye eyenwam nnyin idiɔŋɔ ke ikɔ Abasi—ke esit edide uduak erinyaŋa ukpɔŋ, ibet eke Abasi, Erifiak-men-ndi, ye Erisio-isop eke Jesus Christ—edi akpanikɔ. Enye eyesɔŋɔ ikɔ ntiense nnyin ke nte nnyin ikade iso ndibɔŋakam, inim mme mbet, inyuŋ ikoot ikɔ Abasi.

Ada-usuŋ onyuŋ Ekpeme Nnyin

Edisana Spirit ekeme edida nnyin usuŋ ke mme ubiere nnyin onyuŋ ekpeme nnyin osio ke unɔmɔ obukidem ye eke spirit. Enye eyenwam nnyin man ikut mme ibɔrɔ inɔ mme mbume nnyin edieke nnyin ibɔŋde akam inyuŋ idomo ndinam se inende. Enye kpukpru ini eyeda nnyin usuŋ “man inam si ifɔnde” (Doctrine ye Covenants 11:12).

Ɔdɔŋ Nnyin esit

Edisana Spirit ke ubak-ini esikot nte “Ndɔŋesit” (John 14:26). Enye ekeme ediyɔhɔ nnyin “ye idorenyin ye nsasana ima” (Moroni 8:26) kini nnyin ifinade-idem, ifuhɔde, mme ikopde-ndik. Nte Enye anwamde nnyin ndikop ima Abasi, nnyin imikeme ndikan ubiɔŋɔ inyuŋ ibɔ-ɔsɔŋɔ ke mme idomo nnyin.

Enɔ eke Edisana Spirit.

Ke ema ekenim nnyin baptism ekure, nnyin imikeme edibɔ eke Edisana Spirit ke edinam ikɔ Abasi kiet emi ekotde ndori-ubɔk. Inikiet emi nnyin ibɔde enɔ emi, nnyin imikeme edinyene ofuri-ini nsaŋa eke Edisana Spirit ke nte nnyin idude edinen uwem.

Mbuwet-eduride otode J. Kirk Richards

Nte Nnyin Ikopde Edisana Spirit

Edisana Spirit esineme nneme ɔnɔ mme owo ke mme nsio-nsio usuŋ. Emi ekeme edisine mmem-mmem, ifure-ifure ekikere mme ifiɔk kabaŋa se iditiŋde mme idinamde. Nte nnyin ibɔŋde akam iyom ndausuŋ inyuŋ ikpaŋ-utɔŋ inɔ mme ntuuk Esie, nnyin iyekpep idiɔŋɔ nte Enye etiŋde ikɔ ɔnɔ nnyin.

Otode Ŋwed Abasi

Edisana Spirit eyekpep mbufo kpukpru ŋkpɔ (se John 14:26).

Afo emekeme edidiɔŋɔ akpanikɔ oto ke Edisana Spirit (se Moroni 10:5).

Edisana Spirit ekeme editiŋ-ikɔ ɔnɔ mbufo ke ekikere mbufo ye ke esit mbufo (se Doctrine ye Covenants 8:2).

Mme Ikɔ eke Editi-de

Uduak erinyaŋa-ukpɔŋ: Uduak Abasi man anwam nditɔ Esie ndikabare ntie nte Enye man enyɔŋ ebine Enye.

Ikɔ ntiense: ntiense eke spirit ete ke ŋkpɔ oro edi akpanikɔ.

Edinam Ikɔ-Abasi: nsasana edinam enamde ke odudu itie-oku.

Yom Ediwak Ŋkpɔ Efen

Edieke afo enyenede mbume kabaŋa Edisana Spirit, afo emekeme edikot ŋwed Abasi, mme etetiŋ-ikɔ eke akwa mbono, ye mme ŋwed efen odude ke Gospel Library (ke ChurchofJesusChrist.org mme odude ke mobile app). Afo nko emekeme edineme ye ɔnɔ-unwam eyen-eka eren mme ŋwan, mme adausuŋ eke ward mme eke branch, mme ɔkwɔrɔ-ikɔ Abasi mbufo.

©2023 eketode Intellectual Reserve, Inc. Ekpan kpukpru unen ndimiŋ nwed emi. Ekemiŋ ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop Liahona, Ɔyɔhɔ Ɔfiɔŋ Inaŋ 2023. Language. 19026 553