Bosoom Bosoom Liahona Amandzɛɛbɔ, Obiradzi 2023

Sunsum Krɔnkrɔn no Botum Aboa Hɛn

banyin a ɔtsena ase rohwɛ wi puei

Sunsum Krɔnkrɔn no yɛ Nyametsir a otsĩa ebiasa no. Kyerɛwsɛm no frɛ No Sumsum no, Sunsum Krɔnkrɔn no, anaa Ɔwerɛkyekyefo no. Ber a yesũa dɛ yɛbɛyɛ aso ama Ne ndze no, Ɔbɛgye Jesus Christ ho dase akyerɛ hɛn na Ɔaboa hɛn ma yesũa asɛmpa ho nokwar no.

Nyametsir mu Kuwba

Ɔsor Egya, Jesus Christ, na Sunsum Krɔnkrɔn no nye Nyametsir Wɔdɔ hɛn na Wɔyɛ edwuma koryɛ mu dze nkwagye ho nhyehyɛɛ no bɔbɔ adze. Ɔsor Egya na Jesus Christ wɔ honandua na mbiew dze, naaso Sunsum Krɔnkrɔn nnyi bi. Ɔyɛ sunsum.

ahwehwɛ a wɔakekã mu Egya nye Ɔba no mfonyin

Ɔgye Egya nye Ɔba no ho dase

Sunsum Krɔnkrɔn no a, “ɔgye Egya nye Ɔba no ho dase” (2 Nephi 31:18). Iyi kyerɛ dɛ yebotum edua Sunsum Krɔnkrɔn mu enya Ɔsor Egya nye Jesus Christ ho dase.

Ɔgye Nokwar ho Dase

Sunsum Krɔnkrɔn no gye nokwar nyina ho dase. Ɔbɔboa hɛn ma yehu dɛ asɛmpa no—a nkwagye ho nhyehyɛɛ, Nyankopɔn ne mbrasɛm, Nsanananmu no, na Jesus Christ No Werdambɔ no kã ho no—yɛ nokwar. Ɔbɛhyɛ hɛn dasee dzen ber a yɛkɔ do bɔ mpaa, yedzi mbrasɛm no do, na yesũa asɛmpa no.

nsa a okitsa kɔmpass

Ɔma hɛn Kwankyerɛ na Bambɔ

Sunsum Krɔnkrɔn no botum aboa hɛn wɔ hɛn adwenpɔwbɔ mu na Ɔabɔ hɛnho ban efi honandua na sunsum mu esian ho. Ɔbɔboa hɛn ma yeenya hɛn nsɛmbisa ho nyiano sɛ yɛbɔ mpaa na yɛbɔ mbɔdzen yɛ dza oye a. Obegya hɛn aber nyina ma “yɛayɛ papa” (Nkyerɛkyerɛ na Ahyɛmudzi 11:12).

Ɔkyekye Hɛn Werɛ

Ɔtɔfabi a Sunsum Krɔnkrɔn no wɔfrɛ no “Ɔwerɛkyekyefo” (John 14:26). Obotum dze “enyidado nye ɔdɔ a odzi mu” (Moroni 8:26) ahyɛ hɛn mã ber a yɛhaw, yedzi awerɛhow, anaa yesuro. Ber a ɔboa hɛn ma yɛtse Nyankopɔn no dɔ nkã no, yebotum edzi abagura do konyim na Ɔahyɛ hɛn dzen wɔ hɛn nsɔhwɛ mu.

Sunsum Krɔnkrɔn no n’Akyɛdze

Woenuma hɛn ekyir no, yɛgye Sunsum Krɔnkrɔn akyɛdze wɔ ayɛdze a wɔfrɛ no pisi mu. Hɛn nsa akã akyɛdze yi ekyir no, yebotum enya daa daa Sunsum Krɔnkrɔn anyɛnkoyɛ mber tsentsen a yɛbɔ bra tsenenee mu.

ɔbaa a ɔrekenkan kyerɛwsɛm

J. Kirk Richards na ɔyɛɛ nsaano mfonyin no

Mbrɛ Yesi Tsie Sunsum Krɔnkrɔn no

Sunsum Krɔnkrɔn no nye nkorɔfo nya nkitahodzi wɔ akwan soronko mu. Asomdwee na awerɛkyekye atsenka anaa nhumu a ɔfa dza yɛbɛkã anaa yɛbɛyɛ ho no ka ho. Ber a yɛbɔbɔ mpaa dze hwehwɛ kwankyerɛ na yetsie Ne nkenyan no, yebotum esũa ehu mbrɛ osi nye hɛn kasa.

Fi Kyerɛwsɛm no mu

Sunsum Krɔnkrɔn no bɛkyerɛkyerɛ wo ndzɛmba nyina (hwɛ John 14:26).

Yebotum edua Sunsum Krɔnkrɔn no mu ehu nokwar (hwɛ Moroni 10:5).

Sunsum Krɔnkrɔn no botum akasa akyerɛ wo wɔ w’adwen nye w’akoma mu (hwɛ Nkyerɛkyerɛ na Ahyɛmudzi 8:2).

Nsɛmfua a ɔwɔ dɛ Yɛkaa

Nkwagye ho nhyehyɛɛ: Nyankopɔn ne nhyehyɛɛ a ɔboa Ne mba ma wɔayɛ tse dɛ Ɔno na wɔasan akɔ Ne nkyɛn.

Dasegye: sunsum mu dasegye dɛ biribi yɛ nokwar.

Ayɛdze: ndzeyɛɛ krɔnkrɔn a wɔdze asɔfodzi tumdzi no yɛ.

Hwehwɛ Bi so Kã ho

Sɛ ewɔ Sunsum Krɔnkrɔn no ho nsɛmbisa a, ibotum esũa kyerɛwsɛm no, wiadze mfɛndzanan ehyiadzi mu kasa horow no, na ndzɛmba a ɔboa wɔ Asɛmpa Nwoma Korabea no mu ( wɔ ChurchofJesusChrist.org anaa wɔ mobile app do). Ibotum so nye wo nuambanyin anaa nkyerɛbaa a wɔrosom, wo ward anaa nkorbata baanodzifo, anaa asɛmpasomafo no akasa.

© 2023 odzi wɔ Intellectual Reserve, Inc. Wɔakora ho tumdzi nyinara Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, Ebɔbira 2023. ne nkyerɛasee Language. 19026 502