Bulanan nga Mensahe sa Liahona, Hunyo 2023

Ang Balaan nga Espiritu Makabulig sa Aton

Ang Balaan nga Espiritu ang ikatatlo nga miyembro sang Pangulohan sang Dios. Ginatumod man Sia sang balaan nga mga kasulatan bilang ang Espiritu, ang Balaan nga Espiritu, ukon ang Manugpaumpaw. Samtang ginatun-an naton nga magpamati sa Iya tingug, magapamatuod Sia sa aton parte kay Jesucristo kag buligan kita nga matun-an ang mga kamatuoran sang ebanghelyo.

Miyembro sang Pangulohan sang Dios

Ang Amay nga Langitnon, si Jesucristo, kag ang Balaan nga Espiritu amo ang Pangulohan sang Dios. Palangga Nila kita kag nagabuligay Sila para ipatuman ang plano sang kaluwasan. Bisan pa nga ang Amay nga Langitnon kag si Jesucristo may mga lawas sang unod kag tul-an, ang Balaan nga Espiritu wala. Espiritu Sia.

Saksi sang Amay kag sang Anak

Ang Balaan nga Espiritu “nagasaksi nahanungod sa Amay kag sa Anak” (2 Nefi 31:18). Buot silingon sini nga makabaton kita sang testimonya parte sa Amay nga Langitnon kag kay Jesucristo paagi sa Balaan nga Espiritu.

Nagapamatuod sang Kamatuoran

Ang Balaan nga Espiritu nagasaksi sang tanan nga kamatuoran. Buligan Niya kita nga mahibal-an nga ang ebanghelyo—pati na ang plano sang kaluwasan, ang mga kasuguan sang Dios, ang Pagpanumbalik, kag ang Pagbayad-Sala ni Jesucristo—matuod. Pabakuron Niya ang aton testimonya kon padayon kita nga magpangamuyo, magsunod sa mga kasuguan, kag magtuon sang ebanghelyo.

Nagagiya kag Nagaprotekta sa Aton

Ang Balaan nga Espiritu makagiya sa aton sa aton mga desisyon kag makaprotekta sa aton batok sa pisikal kag espirituhanon nga katalagman. Buligan Niya kita nga magpangita sang mga sabat sa aton mga pamangkot kon magpangamuyo kita kag magtinguha nga himuon ang husto. Giyahan gid kita Niya pirme sa “paghimo sang maayo” (Doktrina kag mga Kasugtanan 11:12).

Nagapaumpaw sa Aton

Ang Balaan nga Espiritu kon kaisa ginatumod bilang “ang Manugpaumpaw” (Juan 14:26). Sarang Niya kita nga pun-on sang “paglaum kag himpit nga gugma” (Moroni 8:26) kon nagakabalaka kita, ginasubuan, ukon ginahadlukan. Samtang ginabuligan Niya kita nga mabatyagan ang pagpalangga sang Dios, sarang naton malampuwasan ang pagkaluya kag mangin mabakod sa aton mga pagtilaw.

Ang Dulot sang Balaan nga Espiritu

Pagkatapos naton nga mabunyagan, mabaton naton ang dulot sang Balaan nga Espiritu paagi sa isa ka ordinansa nga ginatawag kompirmasyon. Kon mabaton na naton ini nga regalo, sarang na naton makaupod pirme ang Balaan nga Espiritu basta nagapangabuhi kita sang matarong.

Ilustrasyon ni J. Kirk Richards

Paano Naton Mabatian ang Balaan nga Espiritu

Ang Balaan nga Espiritu nagahambal sa mga tawo sa madamo nga paagi. Pwede nga dala diri ang malinong, makapasulhay nga mga balatyagon ukon panghunahuna parte sa kon ano ang ihambal ukon himuon. Kon magpangamuyo kita para sa giya kag magpamati sa Iya mga pagpabatyag, matun-an naton kon paano Sia nagahambal sa aton.

Halin sa Balaan nga mga Kasulatan

Ang Balaan nga Espiritu magatudlo sa inyo sang tanan nga butang (tan-awa sa Juan 14:26).

Mahimo mo mahibal-an ang kamatuoran paagi sa Balaan nga Espiritu (tan-awa sa Moroni 10:5).

Ang Balaan nga Espiritu sarang maghambal sa imo sa imo panghunahuna kag sa imo tagipusuon (tan-awa sa Doktrina kag mga Kasugtanan 8:2).

Mga Dapat Tandaan

Plano sang kaluwasan: plano sang Dios para buligan ang Iya mga kabataan nga mangin pareho sa Iya kag makabalik sa Iya.

Testimonya: isa ka espirituhanon nga saksi nga matuod ang isa ka butang.

Ordinansa: isa ka sagrado nga buluhaton nga ginahikot paagi sa awtoridad sang priesthood.

Hibaloa sing Dugang

Kon may mga pamangkot ka parte sa Balaan nga Espiritu, pwede mo tun-an ang balaan nga mga kasulatan, mga mensahe sa pangkabilogan nga komperensya, kag iban pa nga mga balasahon sa Librarya sang Ebanghelyo (sa ChurchofJesusChrist.org ukon sa mobile app). Pwede mo man istoryahon ang imo ministering nga mga brother kag sister, ang imo mga lider sa ward ukon branch, ukon ang mga misyonero.

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, April 2023. Language. 19026 861