Ubutumwa Ngarukakwezi bwa Liyahona , Kamena 2023

Roho Mutagatifu Ashobora Kudufasha

Roho Mutagatifu ni umwe mu bagize Ubumana. Ibyanditswe bitagatifu na byo bivuga ko ari Roho, Roho Mutagatifu, cyangwa Umuhoza. Uko twiga kumva ijwi Rye, azaduhamiriza Yesu Kristo kandi adufashe kwiga ukuri kw’inkuru nziza.

Umwe mu bagize Ubumana

Data wo mu ijuru, Yesu Kristo, na Roho Mutagatifu ni Ubumana. Baradukunda kandi bakorana mu bumwe kugira ngo umugambi w’agakizaushyirwe mu ngiro. N’ubwo Data wo mu ijuru na Yesu Kristo bafite imibiri y’inyama n’amagufa, Roho Mutagatifu we nta byo afite. Ni roho.

Umuhamya wa Data na Mwana

Roho Mutagatifu “uhamiriza Data na Mwana “(2 Nefi 31:18). Ibi bivuga ko dushobora kwakira ubuhamya bwa Data wo mu ijuru na Yesu Kristo binyuze muri Roho Mutagatifu.

Ahamya Ukuri

Roho Mutagatifu ahamya ukuri kose. Azadufasha kumenya ko inkuru nziza—harimo umugambi w’agakiza, amategeko y’Imana, Ukugarurwa, n’Impongano ya Yesu Kristo—ari ukuri. Azakomeza ubuhamya bwacu uko dukomeza gusenga, dukurikiza amategeko, kandi tukiga inkuru nziza.

Aratuyobora Akanaturinda

Roho Mutagatifu ashobora kutuyobora mu myanzuro yacu akanarinda imibiri na roho byacu akaga. Azadufasha kubona ibisubizo ku bibazo byacu nidusenga ngo dukore ibiri byo. Azahora atuyobora mu gukora icyiza (Inyigisho n’Ibihango 11:12).

Araduhoza

Roho Mutagatifu rimwe na rimwe bavuga ko ari “Umuhoza” (Yohana 14:26). Ashobora kutwuzuzamo “ibyiringiro n’urukundo rudakemwa” (Moroni 8:26) igihe duhangayitse, tubabaye, cyangwa dufite ubwoba. Uko adufasha kwiyumvamo urukundo rw’Imana dushobora kudacika intege ubundi tugakomezwa mu bigeragezo byacu.

Impano ya Roho Mutagatifu

Nyuma y’uko tubatijwe, twakira impano ya Roho Mutagatifu mu mugenzo witwa ukwemezwa. Iyo tumaze kwakira iyi mpano, dushobora kugira umubano uhoraho wa Roho Mutagatifu igihe cyose tubayeho mu bukiranutsi.

Igishushanyo cyashushanyijwe na J. Kirk Richards

Uko Twumva Roho Mutagatifu

Roho Mutagatifu ashobora kuvugana n’abantu mu buryo butandukanye. Ubu bushobora kuba ibyiyumviro bihumuriza cyangwa ibitekerezo ku bijyanye n’icyo kuvuga cyangwa gukora. Uko dusenga dusaba ubujyanama kandi tunatega amatwi inamabyifuzo ze, dushobora kwiga uburyo atuvugishamo.

Ibivuye mu Byanditswe Bitagatifu

Roho Mutagatifu azakwigisha ibintu byose (reba Yohana 14:26)

Ushobora kumenya ukuri binyuze muri Roho Mutagatifu (reba Moroni 10:5).

Roho Mutagatifu ashobora kukuvugisha mu bwenge bwawe no mu mutima wawe (reba Inyigisho n’Ibihango 8:2).

Amagambo yo Kwibuka

Umugambi w’Agakiza: Umugambi w’Imana ufasha abana Bayo guhinduka nka Yo no kuyigarukira.

Ubuhamya: umuhamya wa roho ko ikintu ari ukuri.

Umugenzo: igikorwa gitagatifu gikorwa mu bushobozi bw’ubutambyi.

Menya Ibindi Byisumbuyeho

Ubaye ufite ibibazo ku bijyanye na Roho Mutagatifu, ushobora kwiga ibyanditswe bitagatifu, ibyavuzwe mu giterane rusange, n’ibindi byifashishwa mu isomero ry’inkuru nziza (kuri ChurchofJesusChrist.org cyangwa muri porogaramu ya telefoni ngendanwa). Ushobora kandi no kuvugana n’abavandimwe bafasha b’igitsina gabo cyangwa gore bawe, abayobozi b’ishami cyangwa paruwasi yawe, cyangwa abavugabutumwa.

© 2023 by Intellectual Reserve, Inc. All rights reserved. Cyacapiwe muri Leta Zunze Ubumwe z’Amerika. Ukwemerwa kw’Icyongereza: 6/19. Ukwemerwa k’ubusemuzi: 6/19. Ubusemuzi bwa Monthly Liahona Message, April 2023. Language. 19026 716