Jetōb Kwojarjar eo Emaron̄ Jipan̄ Kōj

Jetōb Kwojarjar ej membōr eo kein kajilu an Doulul in Anij. Jeje ko rekwojarjar rej barāinwōt kōnono kake E āinwōt Jetōb, Jetōb Kwojarjar, ak Rikaenōm̧m̧an. Ilo ad ekkatak n̄an ron̄jake Ainikien, E enaaj kam̧ool n̄an kōj kōn Jisōs Kraist im jipan̄ kōj ekkatak m̧ool ko an gospel in,

Membōr in Doulul in Anij

Jemedwōj Ilan̄, Jisōs Kraist, im Jetōb Kwojarjar rej Doulul in Anij. Rej iakwe kōj im jerbal ilo juon wōt n̄an kakūrm̧ool karōk in lo̧mo̧o̧r. Jemedwōj Ilan̄ im Jisōs Kraist ewōr ānbwinin kanniōkier im diier, ak Jetōb Kwojarjar ejjeļok. E ej juon jetōb.

Rikam̧ool eo an Jemān im Nejin

Jetōb Kwojarjar “ej kam̧ool kōn Jemān im Nejin” (2 Nipai 31:18). Meļeļe in bwe jemaron̄ bōk juon naan in kam̧ool kōn Jemedwōj Ilan̄ im Jisōs Kraist jen Jetōb Kwojarjar.

Kam̧ool kōn M̧ool

Jetōb Kwojarjar ej kam̧ool kōn aolep m̧ool. E enaaj jipan̄ kōj jeļā bwe gospel in—ekoba karōk in lo̧mo̧o̧r, kien ko an Anij, Jepļaaktok eo, im bwe Pinmuur eo an Jisōs Kraist—rej m̧ool. E enaaj kōkajoorļo̧k naan in kam̧ool eo ad ilo ad wōnm̧aanļo̧k wōt n̄an jar, kōjparok kien ko, im ekkatak gospel in.

Ej Tōl im Kōjparok Kōj

Jetōb Kwojarjar eo emaron̄ tōl kōj ilo jokāālet ko ad im kōjparok kōj jān kauwōtata an kanniōk im jetōb. E enaaj jipan̄ kōj lo uwaak ko n̄an kajjitōk ko ad eļan̄n̄e jej jar im kajjieon̄ kōm̧m̧ane ta eo ej jim̧we. E enaaj iien otemjej tōl kōj “n̄an kōm̧m̧an jim̧we” (Katak im Bujen ko 11:12).

Kaenōm̧m̧an Kōj

Jetōb Kwojarjar ej jet iien kōnono kake āinwōt “Rikaenōm̧m̧an” (John 14:26). E emaron̄ kaobrak kōj “kōn kōjatdikdik im iakwe eweeppān” (Moronai 8:26) n̄e jej inepata, būrom̧ōj, ak mijak. Ilo An jipan̄ kōj en̄jake iakwe eo an Anij, jemaron̄ anjo̧ ioon ebbweer im kajoorļo̧k ilo mālijjon̄ ko ad.

Menin Letok eo an Jetōb Kwojarjar

Ālkin ad peptaij, jej bōk menin letok eo an Jetōb Kwojarjar ilo juon kain̄i ņa etan kapene. N̄e jej bōk menin letok in, jemaron̄ iien otemjej bōk jemjerā eo an Jetōb Kwojarjar to̧o̧n wōt ad mour jim̧we.

kōmeļeļe jān J. Kirk Richards

Ekōjkan Ad Ron̄ Jetōb Kwojarjar

Jetōb Kwojarjar eo ej kōnono n̄an armej ro ilo wāween ko rooktak jān doon. Men kein ekitbuuj en̄jake ko an aenōm̧m̧an, kaenōm̧m̧an ak kōļmenļo̧kjeņ ko kōn ta eo n̄an ba ak kōm̧m̧ane. Ilo ad jar kōn tōl im ron̄jake im̧we ko An, jemaron̄ ekkatak ekōjkan An ekōnono n̄an kōj.

© 2023 jān Intellectual Reserve, Inc. Aolep mālim rej pād ie. Kar būriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukook eo an Monthly Liahona Message, April 2023. Language. 19026 874