Parau poro’i tā’āva’e nō te Liahona, Tiunu 2023

E nehenehe te Vārua Maita’i e tauturu ia tātou

Te Vārua Maita’i ’o te toru ïa o te melo nō te Atuara’a. Tē fa’ahiti ato’a nei te mau pāpa’ira’a mo’a iāna ’ei Vārua, te Vārua Maita’i, ’aore rā te Fa’aa’o. ’A ha’api’i mai ai tātou i te fa’aro’o i tōna reo, e fa’a’ite pāpū mai ’oia ia tātou nō Iesu Mesia ’e e tauturu ia tātou ’ia ha’api’i mai i te mau parau mau o te ’evanelia.

Melo nō te Atuara’a

Te Metua i te ao ra, ’o Iesu Mesia ’e te Varua Maita’i, ’ua parauhia rātou te Atuara’a. ’Ua here rātou ia tātou ’e tē ’ohipa tāhō’ē nei rātou nō te fa’atupu i te ’ōpuara’a nō te fa’aorara’a. E tino ’i’o ’e te ivi tō te Metua i te ao ra ’e tō Iesu Mesia, ’aita rā ho’i tō te Vārua Maita’i. E vārua ’oia.

’Ite nō te Metua ’e nō te Tamaiti

« Te Vārua Maita’i, ’o tē fa’a’ite pāpū nei i te Metua ’e te Tamaiti » (2 Nephi 31:18). Tōna aura’a, e nehenehe tātou e fāri’i i te hō’ē ’itera’a pāpū nō te Metua i te ao ra ’e nō Iesu Mesia nā roto mai i te Vārua Maita’i.

E fa’a’ite pāpū ’oia i te parau mau

E fa’a’ite pāpū te Vārua Maita’i i te mau parau mau ato’a. E tauturu ’oia ia tātou ’ia ’ite ē, te ’evanelia—mai te fa’anahora’a nō te fa’aorara’a, te mau fa’auera’a a te Atua, te fa’aho’i-fa’ahou-ra’a mai, ’e te Tāra’ehara a Iesu Mesia—e parau mau ïa te reira. E ha’apūai ’oia i tō tātou ’itera’a pāpū, ’a tāmau noa ai tātou i te pure, i te ha’apa’o i te mau fa’auera’a ’e i te tuatāpapa i te ’evanelia.

E arata’i ’e e pāruru ’oia ia tātou

E nehenehe te Vārua Maita’i e arata’i ia tātou i roto i tā tātou mau fa’aotira’a ’e e pāruru ato’a i te ’ati pae tino ’e i te pae vārua. E tauturu ’oia ia tātou ’ia ’ite mai i te mau pāhonora’a i tā tātou mau uira’a, mai te mea e pure tātou ’e e tāmata i te rave i te mea ti’a. E arata’i noa ’oia ia tātou « ’ia rave i te ’ohipa maita’i » (Te Ha’api’ira’a Tumu ’e te mau Fafaura’a 11:12).

E tāmāhanahana ’oia ia tātou

I te tahi taime e parauhia te Vārua Maita’i ’ei « Fa’aa’o » (Ioane 14:26). E nehenehe ’oia e fa’a’ī ia tātou « i te ti’aturi ’e te here ti’a mau ra, » (Moroni 8:26) ’ia ha’ape’ape’a ana’e tātou, ’ia ’oto, ’aore rā ’ia mata’u. ’A tauturu ai ’oia ia tātou ’ia ’ite i te here o te Atua, e nehenehe tātou e upo’oti’a i ni’a i te mana’o paruparu ’e e ha’apūaihia i roto i tō tātou mau fifi.

Te hōro’a nō te Vārua Maita’i

I muri a’e i tō tātou bāpetizora’ahia, e fāri’i tātou i te hōro’a nō te Vārua Maita’i i roto i te hō’ē ’ōro’a tei pi’ihia te ha’amaura’a. ’Ia fāri’i ana’e tātou i teie hōro’a, e nehenehe tātou e fāri’i tāmau noa i te auhoara’a o te Vārua Maita’i, ’a ora noa ai ma te parauti’a.

Fa’ahōho’ara’a nā J. Kirk Richards

Nāhea tātou i te fa’aro’o i te Vārua Maita’i

E paraparau te Vārua Maita’i i te ta’ata nā roto i te mau rāve’a e rave rau. ’Oia hoi, mai te mau mana’o hau ’e te tāmāhanahana ’aore rā te mau mana’o nō ni’a i te mea e parau ’aore rā, e rave. ’A pure ai tātou nō te arata’ira’a ’e ’a fa’aro’o ai i tāna mau muhumuhura’a, e nehenehe tātou e ha’api’i mai e nāhea ’oia i te paraparau ia tātou.

Nō roto mai i te mau pāpa’ira’a mo’a

Nā te Vārua Maita’i ra e ha’api’i mai ia ’outou i te mau mea ato’a (hi’o Ioane 14:26).

E nehenehe ’outou e ’ite i te parau mau nā roto i te Vārua Maita’i (hi’o Moroni 10:5).

E nehenehe te Vārua Maita’i e paraparau ia ’outou nā roto i tō ’outou ferurira’a ’e tō ’outou ’ā’au (hi’o Te Ha’api’ira’a Tumu ’e te mau Fafaura’a 8:2).

Te mau parau e ha’amana’o

Fa’anahora’a nō te fa’aorara’a : Te fa’anahora’a a te Atua nō te tauturu i tāna mau tamari’i ’ia riro mai iāna ’e ’ia ho’i mai iāna ra.

’Itera’a pāpū : e ’itera’a pāpū pae vārua ē, e parau mau te hō’ē ’ohipa.

Te ’ōro’a : e ’ohipa mo’a ïa e ravehia nā roto i te ha’amanara’a o te autahu’ara’a.

Ha’api’i rahi mai ā

Mai te mea e mau uira’a tā ’outou nō ni’a i te Vārua Maita’i, e nehenehe ’outou e tuatāpapa i te mau pāpa’ira’a mo’a, te mau a’ora’a o te ’āmuira’a rahi ’e te tahi atu mau mātēria tauturu i roto i te Vaira’a buka ’evanelia (i ni’a ChurchofJesusChrist.org ’aore rā i roto i te fa’anahora’a ’āfa’ifa’i). E nehenehe ato’a ’outou e parauparau i tō ’outou mau taea’e ’aore rā mau tuahine aupuru, tō ’outou feiā fa’atere pāroita, ’aore rā ’āma’a, ’aore rā i te mau misiōnare.

© 2023 nā Intellectual Reserve, Inc. fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, April 2023. Language. 19006 895