Bulanan nga Mensahe sa Liahona, Hulyo 2023

Pagpaambit sang Ebanghelyo ni Jesucristo

dalagita nga may balaan nga mga kasulatan sa iya sabak

Kon mahunahuna naton ang mga bugay nga nagakabaton naton tungod mga miyembro kita sang Ang Simbahan ni Jesucristo sang mga Santos sa Ulihing mga Adlaw, gusto naton nga ipaambit ang ebanghelyo sa aton mga pinalangga. Pwede naton ipaambit ang aton mga testimonya sang kamatuoran paagi sa aton mga pulong kag sa aton ehemplo. Pwede kita magpangamuyo para sa inspirasyon nga mahibal-an kon kay sin-o magpaambit kag kon ano ang ihambal.

Si Jesus nga nagalab-ot sa isa ka lupog

Palanggaa ang Iban

Importante nga bahin sang pagpaambit sang ebanghelyo ang pagpalangga sa iban. Kon ipakita naton ang aton pagpalangga sa iban paagi sa Cristohanon nga mga buhat, ginapaambit naton ang ebanghelyo ni Jesucristo—kon kis-a bisan wala nagahambal. Kag kon mahibal-an sang iban nga tunay ang aton pag-ulikid sa ila, basi mas mangin bukas sila sa pagpamati sang aton mga panghunahuna parte sa ebanghelyo. (Tan-awa sa Gary E. Stevenson, “Love, Share, Invite,” Liahona, Mayo 2022, 84–87.)

Magpaambit sa Normal kag Natural nga mga Paagi

Pwede naton ipaambit kon ano ang nanamian naton sa ebanghelyo. Kon himuon naton ini nga parte sang aton adlaw-adlaw nga pagpangabuhi, indi na ini mangin masaw-a ukon mabudlay. Halimbawa, pwede naton iistorya sa aton pamilya kag mga abyan kon ano ang ginahimo naton kon Domingo. Ukon pwede naton iistorya sa ila ang kalipay nga aton nabatyagan kon magserbisyo kita sa iban. (Tan-awa sa “Dieter F. Uchtdorf, ““Pang-misyonaryo nga Buluhaton: Pagpaambit sang Kon Ano nga Ara sa Imo Tagipusuon,” Liahona, Mayo 2019, 15–18.)

Hagara ang Iban nga Mag-upod sa Aton

Pwede naton hagaron ang iban nga magtuon pa gid parte sa ebanghelyo. Halimbawa, pwede naton sila hagaron nga magkadto sa miting ukon aktibidades sang Simbahan, magbasa sang Libro ni Mormon, magtan-aw sang video parte sa Simbahan, ukon makigkita sa mga misyonero. Ini nga mga eksperiyensya makabulig sa ila nga mabatyagan ang Espiritu kag magtubo ang handum nga maghibalo pa gid.

duha ka gulangon nga babayi nga nagapungko kag nagaistoryahanay

Magpamangkot parte sa Ila Eksperiyensya

Pagkatapos nga magkadto ang mga abyan kag miyembro sang pamilya sa simbahan ukon magpatudlo sa mga misyonero, pwede naton sila pamangkuton parte sa ila eksperiyensya. Basi bag-o sa ila ang iban nga mga ginatudlo sa ebanghelyo, gani pwede naton sabton kon may mga pamangkot sila. Pwede naton ipakita ang aton pagpalangga kag suporta sa ila pagpaninguha nga magpalapit kay Cristo.

Dugangi ang Ila Ginapatihan

Ginahatagan naton bili kag ginarespeto ang mga ginapatihan sang iban, kag ginatinguhaan naton nga dugangan ang pagtuo nga ara na nga daan sa ila. Halimbawa, ang abyan nga nagabatyag sang kasulhay sa Biblia pwede man makakita sang kasulhay sa mga pinanudlo nga ginapaambit naton halin sa Libro ni Mormon.

mga dalagita nga nagabulig sa tigulang nga babayi nga magtabok sa dalan

Buligi ang Bag-o nga mga Miyembro sang Simbahan

Kon magpamiyembro ang mga tawo sa Simbahan, makabulig kita sa pagpabakod sang ila pagtuo. Pwede kita mangin abyan nila, sabton ang ila mga pamangkot, kag suportahan sila kon makabaton sila sang mga calling. Pwede naton sila paisogon nga magpadayon sa pagsunod kay Jesucristo kag magtuon parte sa Iya ebanghelyo.

duha ka misyonero nga mga elder kag tawo nga ululupod nga nagatan-aw sang telepono

Magserbisyo sa Full-Time nga Misyon

Dugang pa sa pagpaambit sang ebanghelyo sa aton adlaw-adlaw nga pagpangabuhi, ang mga miyembro sang Simbahan pwede nga tawgon sa pagserbisyo sa full-time nga misyon. Kon handa sila, ang lamharon nga mga lalaki pwede na magserbisyo sa edad nga 18. Ang lamharon nga mga babayi kag mas gulang nga mga miyembro pwede man magserbisyo. Makita ninyo ang dugang nga impormasyon sa ChurchofJesusChrist.org/callings/missionary.

Halin sa Balaan nga mga Kasulatan

Ginsugo ni Jesucristo ang Iya mga disipulo nga ipaambit ang ebanghelyo sa tanan (tan-awa sa Marcos 16:15).

Ang mga gintawag sa pagserbisyo dapat maghimo sini upod ang bug-os nila nga “tagipusuon, ikasarang, panghunahuna kag kusog” (tan-awa sa Doktrina kag mga Kasugtanan 4).

Makaangkon kita sang dako nga kalipay kon buligan naton ang iban nga batunon ang ebanghelyo (tan-awa sa Doktrina kag mga Kasugtanan 18:15–16).

Online nga mga Bulig

“Paano ko ipaambit ang Libro ni Mormon sa isa ka abyan?” “Paano ko ipatigayon nga maistorya sang akon abyan ang mga misyonero?” Ini kag ang iban pa nga mga pamangkot masabat sa ChurchofJesusChrist.org/share.

Ang Librarya sang Ebanghelyo (sa ChurchofJesusChrist.org ukon gamit ang mobile app) may koleksyon man sang mga bulig, pati ang aton tig-una nga mga ginapatihan. Pilia ang “Pagpaambit sang Ebanghelyo” para magtuon sing dugang kon ano kag paano magpaambit.

Para magtuon pa gid parte sa pagpabakod sang bag-o nga mga miyembro, pangitaa sa Librarya sang Ebanghelyo sa “Mga Handbook kag mga Calling” kag dayon sa “Mga Calling sa Ward ukon Branch.”

Hibaloa sing Dugang

Kon may mga pamangkot ka parte sa pagpaambit sang ebanghelyo, pwede mo istoryahon ang imo mga ministering brother ukon sister, ang mga lider sang inyo ward ukon branch, ukon ang mga misyonero.

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, July 2023. Language. 19045 861