“Fasin blong Stap Dipen long Yuwan I Mekem Yumi Kam Moa Strong,” Liahona, Ogis 2023.
Mesej blong Liahona blong Evri Manis, Ogis 2023
Fasin blong Stap Dipen long Yuwan I Mekem Yumi Kam Moa Strong
Blong stap dipen long yuwan i minim se yumi save kea long ol nid blong yumiwan mo ol famli blong yumi. Taem yumi save dipen long yumiwan, yumi gat moa paoa blong save givim seves long Lod mo kea long ol narawan. Be blong stap dipen long yuwan i no minim se yumi mas go tru ol jalenj blong yumi yumiwan. Yumi save askem help long ol fren, ol famli, ol memba blong wod o branj, mo ol profesonol taem yumi nidim hemia.
Ol Prinsipol blong Stap Dipen long Yuwan
Blong stap dipen long yuwan i nidim edukesen, fasin blong obei, mo had wok. Yumi mekem bes blong yumi blong kea long yumiwan, mo yumi save askem help long ol narawan taem yumi nidim. Blong stap dipen long yuwan tru, yumi mas lanem tu blong gat fet long Jisas Kraes. Afta, taem yumi wok blong helpem yumiwan, bae Hem i mekem yumi kam moa strong.
Fasin blong Stap Dipen long Yuwan long Saed blong Spirit
Yumi save bildim fasin blong stap dipen long yumiwan taem yumi wok blong mekem testemoni blong yumi long Jisas Kraes i kam moa strong. Yumi mekem hemia taem yumi prea, stadi olgeta skripja, go long jos, obei long ol komanmen, mo mekem ol nara samting we i karem yumi kam moa kolosap long Kraes. Blong save se Hem i wantem blong helpem yumi, bae i givim fet long yumi blong stap strong, nomata taem laef i had.
Fasin blong Stap Dipen long Yuwan long Saed blong Ol Samting long Wol
Fasin blong stap dipen long yuwan long saed blong ol samting long wol, i tekem tu blong save kea long ol nid blong bodi blong yumiwan mo famli blong yumi. Hemia i tekem tu kaekae, haos, helt, mo ol nara nid. Yumi mekem hemia taem yumi stap kasem wan gud edukesen, stap lanem o mekem ol skil blong yumi we yumi nidim i kam bigwan moa, stap wok had, stap yusum taem blong yumi wetem waes, mo stap manejem gud mane blong yumi.
Fasin blong Stap Dipen long Yuwan long Saed blong Filing
Fasin blong stap dipen long yuwan long saed blong filing, i paoa ia blong save jenis folem ol jalenj long saed blong filing, wetem strong paoa long tingting mo fet. Yumi evriwan i gat ol jalenj mo ol samting we i mekem yumi slodaon. Tangkyu long gospel, yumi save se yumi save jusum olsem wanem blong handelem ol jalenj ia. Blong stap handelem wetem fet long Lod, i mekem paoa blong yumi i kam moa bigwan blong go tru ol nara hadtaem wetem moa hop.
Edukesen
Oltaem yumi mas stap lanem samting. God i wantem yumi blong tijim ol maen blong yumi mo mekem ol skil blong yumi oli kam moa gud truaot long laef ia mo i go long nekis wan. Moa yumi lanem samting, bae yumi save stap olsem wan moa gud paoa blong gud fasin mo lukaot long yumiwan, famli blong yumi, mo olgeta we oli stap long nid.
Ol Blesing blong Stap Dipen long Yuwan
Ol profet oli bin tijim se, taem yumi kam moa gud blong stap dipen long yumiwan, bae yumi gat blesing blong hop mo pis we i moa bigwan. Bae yumi save helpem ol famli blong yumi mo ol narawan we oli stap long nid. Mo bae yumi kasem blesing wetem moa janis mo paoa blong save gohed blong progres.
Ol Risos blong Jos
Stek blong yu i save givim ol grup blong stap dipen long yuwan. Hemia i save tijim yu ol prinsipol blong stap dipen long yuwan mo ol skil olsem blong stap manejem mane blong yu o faenem wan wok we i moa gud. Yu save faenem ol risos we i go wetem hemia long Gospel Laebri. Jusum “Ol Buk mo Lesen” mo afta “Fasin blong Stap Dipen long Yuwan.”
© 2023 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Monthly Liahona Message Message, August 2023. Language. 19046 852