Na Bula Rawati Koya e Vakaqaqacotaki Keda

rua na tamata e rau masia tiko na iyaya ni kana

Na bula rawati koya e kena ibalebale ni da na rawa ni qarava na veika eda gadreva kei na nodra o ira na noda matavuvale. Ni da sa yaco me da bula rawati keda, sa na rawa talega vakavinaka me da qarava na Turaga ka lomani ira tale eso. Ia na bula rawati koya e sega ni kena ibalebale me da na sotava na noda bolebole vakaikeda. E rawa ni da kere veivuke vei ira na itokani, matavuvale, lewe ni tabanalevu se tabana, kei ira na kenadau ena gauna eda gadreva kina.

iVakavuvuli Tudei ni Bula Rawati Koya

Na bula rawati koya e gadrevi kina na vuli, talairawarawa, kei na cakacaka vakaukauwa. Eda solia na noda vinaka taucoko me da qaravi keda kina, ka rawa ni da kere veivuke mai vei ira na tani ena gauna e gadrevi kina. Me yaco me da bula rawati keda vakaidina, e dodonu me da vulica talega me da vakabauti Jisu Karisito. Ni da sa cakacaka me da vukei keda vakai keda, ena vakaukauwataki keda o Koya.

Bula Rawati Keda Vakayalo

E rawa ni da tara cake na noda bula rawati keda vakayalo ena noda cakacakataka me vakaqaqacotaki na noda ivakadinadina kei Jisu Karisito. Eda vakayacora oqo ni da masu, ni da vulica na ivolanikalou, lako i lotu, talairawarawa ki na ivakaro, ka vakayacora na veika tale eso e kauti keda vakavoleka vei Karisito. Ni da kila ni sa tuvakarau tu o Koya me vukei keda ena solia vei keda na vakabauta me da tudei tiko ena gauna mada ga e dredre kina na bula.

Bula Rawati Koya Vakayago

Na bula rawati koya vakayago e oka kina na noda rawa ni taqomaka na noda gagadre vakayago vakaikeda keda kei na nodra o ira na noda matavuvale. Oqo e oka kina na kakana, na veivakavaletaki, na noda bula, kei na gagadre tale eso. Eda vakayacora oqo ena noda cakacakataka me da vuli vinaka, na vuli se vakarabailevutaki ni kila-maqosa e gadrevi, na cakacaka vakaukauwa, na vakayagataki vakavuku ni noda gauna, ka vakatulewataka vakavinaka na noda ilavo.

Bularawati Koya Vakayalo

Na bula rawati koya vakayalo sa ikoya na noda rawa ni moica na bolebole ni lomada ena yaloqaqa kei na vakabauta. E da sotava taucoko tu na vei bolebole eso kei na veivakataotaki. Ena vuku ni kosipeli, eda vulica kina ni rawa ni da digitaka na sala me da sotava kina. Ni da sotava na bolebole eso ena noda vakabauta na Turaga ena vakalevutaka na noda rawata me da sotava na veika dredre tale eso ena inuinui.

Vuli-Ka

E dodonu me da dau vuli tikoga. E vinakata na Kalou me da vakatavulica na noda vakasama ka vakatorocaketaka na noda maqosa ena bula taucoko oqo kei na kena e tarava. Na levu ga ni noda vuli, na levu ni noda rawa ni veivakayarayarataki vinaka cake ka vakarautaka na veika vinaka me baleti keda, na noda matavuvale, kei ira era gadreva tu na veivuke.

Na Veivakalougatataki ni Bula Rawati Koya

Era sa vakatavulica na parofita ni gauna eda vakatorocaketaka kina na noda bula rawati keda, eda na vakalougatataki ena inuinui kei na vakacegu. Eda na rawa ni vukei ira na noda matavuvale kei ira era vakaleqai tu. Ka da na vakalougatataki ena veimadigi e levu cake kei na noda rawata me da toso tikoga ki liu.

iVurevure ni Lotu Eso

E rawa ni solia na nomu iteki na ilawalawa ni bula rawati koya. Oqo e rawa ni ra vakavulica vei iko na ivakavuvuli ni bula rawati koya kei na kila-ka me vaka na vakatulewataki ni ilavo se kunei ni dua na cakacaka e vinaka cake. E rawa ni o kunea na ivurevure veisemati ena Gospel Library. Digitaka na “iVola kei na Lesoni (Books and Lessons)” ka qai tarava yani na “Bula Rawati Koya (Self-Reliance).”

© 2023 mai na Intellectual Reserve, Inc. Dodonu taucoko e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. iVakadewa ni iTukutuku Vakavula ni Liaona, Epereli 2023. Language. 19026 000