Un̄n̄are Peid Make Ej Kōkajoorļo̧k Kōj

Ad maron̄ Un̄n̄are peid make ej meļeļein bwe jemaron̄ kakke aikuj ko ad make im baam̧le ko ad. N̄e jej un̄n̄are peid make, enej em̧m̧anļo̧k ad jerbal n̄an Irooj im lale ro jet. Ak un̄n̄are peid make ejjab meļeļein bwe jej aikuj in jelm̧ae apan̄ ko ad make. Jemaron̄ in kajitōk n̄an jipan̄ jān m̧ōttad, baam̧le ko, ak membōr ro an branch eo, im ro retijem̧ļo̧k n̄e jej aikuji.

Pedped ko an Un̄n̄are Peid Make

N̄an erom̧ juon eo ej un̄n̄are pein make enej aikuj jeļāļo̧kjeņ, pokake, im niknik. Jej kōm̧m̧ane ijo jemaron̄e n̄an ad lale kōj make, im jemaron̄ kajjitōk jipan̄ ippān ro jet n̄e emenin aikuj. N̄an erom̧ juon eo ej un̄n̄are pein make, ijoke, jej aikuj in ekkatak n̄an tōmak ilo Jisōs Kraist. Innām ilo ad jerbal n̄an jipan̄ kōj make, E enaaj kōkajoorļo̧k kōj.

Un̄n̄are Peid Make ilo Jetōb

Jemaron̄ ejaake kilen un̄n̄are peid ilo jetōb ilo ad jerbal im kōkajoorļo̧k naan in kam̧ool eo ad ilo Jisōs Kraist. Jej kōm̧m̧ane menin ilo ad jar, ekkatak jeje ko rekwojarjar, etal im jar, pokake kien ko, im kōm̧m̧ani men ko jet me rej kepaakļo̧k kōj n̄an Kraist. Ilo ad jeļā bwe Ej m̧ōņōņō in jipan̄ kōj ej letok ad tōmak n̄an jutak pen men̄e mour in epen.

Un̄n̄are Peid Make ilo Kanniōk

Un̄n̄are peid make ilo kanniōk ekoba ad maron̄ in lale mennin aikuj ko an anbwin im baam̧le eo ad. Men in ekitbuuj m̧ōn̄a, em̧, ājmour, im menin aikuj ko jet. Jej kōm̧m̧ane men in ilo ad bōk jeļāļo̧kjeņ, ekkatak ak kōļapļo̧k kapāāl ko rōmennin aikuj, niknik, kōjparok iien ko ad, im lale jāān ko ad.

Un̄n̄are Peid Make ilo En̄jake

Un̄n̄are peid make ilo en̄jake ej maron̄ in kōkkare kōj n̄an apan̄ ko rejelet en̄jake kōn peran im tōmak. Kōj aolep ewōr ad apan̄ im utam̧we ko. Kam̧m̧oolol gospel in, jejeļā jemaron̄ kālet wāween ad ņa mejļan apan̄ kein. Eo̧ron̄ kōn tōmak ilo Irooj ej kōļapļo̧k maron̄ eo ippād n̄an jelm̧ae men ko jet reppen ilo eļap kōjatdikdik.

Jeļāļo̧kjeņ

Jej aikuj ekkatak aolep iien. Anij ekōņaan bwe jen kōļapļok lōļātāt ko ad im kōkm̧anm̧anļo̧k kapāāl ko ipped ilo mour in im eo tok juon. Ilo ad ekkatak eļapļok, enej ļapļo̧k ad kōm̧m̧an eļap oktak n̄an o̧naake kōj make, baam̧le eo ad, im ro rej aikuj.

Kōjeram̧m̧an ko jān Ad Maron̄ Un̄n̄are Peid Make

Rikanaan ro rekar katakin bwe ilo ad kōkōm̧anm̧anļo̧k ad un̄n̄are peid make, jenaaj jeraam̧m̧an kōn eļap kōjatdikdik im aenōm̧m̧an. Jenaaj maron̄ jipan̄ baam̧le ko ad im ro rej pād ilo aikuj. Im jenaaj jeraam̧m̧an kōn elōn̄ iien ko rem̧m̧an im kōn maron̄ eo n̄an wōnm̧aanļok im edek.

Kein Jipan̄ ko an Kabun̄ in

Stake eo am̧ emaron̄ lewaj kūrūb ko jān un̄n̄are peid make. Men kein remaron̄ katakin eok pedped ko an un̄n̄are peid make im kapāāl ko ikijeen kilen lale jāān ko am̧ ak kappok jerbal em̧m̧anļo̧k. Komaron̄ bar lo kein jipan̄ rot kien ilo Gospel Library eo. Kālet “Books and Lessons” innām “Self-Reliance.”

© 2023 jān Intellectual Reserve, Inc. Aolep omālim rej pād ie. Kar būriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukook eo an Monthly Liahona Message, August 2023. Language. 19046 874