Parau poro’i tā’āva’e nō te Liahona, Ātete 2023

E ha’apūaihia tātou nā roto i te fa’arava’ira’a ia tātou iho

Te aura’a nō te fa’arava’i iāna iho, ’o te utuutura’a tātou i tō tātou iho mau hina’aro ē tae noa atu te hina’aro o tō tātou ’utuāfare. ’Ua ’ite ana’e tātou i te fa’arava’i ia tātou iho, ’ua ti’a ato’a ïa ia tātou ’ia tāvini ’e ’ia aupuru maita’i a’e ia vetahi ’ē. E ara rā, te fa’arava’ira’a iāna iho, e ’ere roa ïa i te fa’arurura’a i te mau fifi ’o tātou ana’e iho. E ani tātou i te tauturu i te mau hoa, i te fēti’i, i te mau melo pāroita, ’āma’a, ’e i te feiā tōro’a ’ia hina’aro-noa-hia atu.

Te mau parau tumu nō te fa’arava’ira’a iāna iho

Te rirora’a ’ei ta’ata ’ite i te fa’arava’i iāna iho, tītauhia ïa te pa’ari i te pae ha’api’ira’a, te ha’apa’o ’e te itoito tu’utu’u ’ore. E ’imi tātou i te mau rāve’a ato’a nō te fa’arava’i ia tātou iho, ’e e ani tātou i te tauturu a vetahi ’ē ’ia hina’aro-noa-hia atu. Terā rā, te rirora’a ’ei ta’ata ’ite i te fa’arava’i iāna iho, tītau-ato’a-hia ïa ’ia ha’api’i nāhea ’ia mau te fa’aro’o i roto ia Iesu Mesia. I muri iho, ’a ’ohipa ai tātou nō te tauturu ia tātou iho, i reira ’oia e ha’apūai ai ia tātou.

Te fa’arava’ira’a iāna iho i te pae vārua

E patu tātou i te fa’arava’ira’a ia tātou iho i te pae vārua ma te ha’a ’ia pūai atu ā tō tātou ’itera’a pāpū nō Iesu Mesia. E nā reira tātou nā roto i te pure, te tai’ora’a i te mau pāpa’ira’a mo’a, te haerera’a i te purera’a, te ha’apa’ora’a i te mau fa’auera’a, ’e te tahi atu mau mea e ha’afātata ia tātou i te Mesia. Te ’itera’a ē, ’ua ineine roa ’oia i te tauturu ia tātou, e fa’atupu te reira i te fa’aro’o ’ia tāpe’a pāpū, noa atu te fifi o te orara’a nei.

Te fa’arava’ira’a iāna iho i te pae mātēria

Te fa’arava’ira’a iāna iho i te pae mātēria, ’o te aupurura’a ïa i tō tātou mau hina’aro pae tino nei ’e i te mau hina’aro o tō tātou ’utuāfare. ’Oia ho’i, te mā’a, te vāhi fa’aeara’a, te ea ’e tē vai atu ā. E nā reira tātou nā roto i te tītaura’a i te ’ite i te pae ha’api’ira’a, te roa’ara’a ’e te fa’anāneara’a i te mau ’aravihi e hina’arohia, te rave-itoito-ra’a i te ’ohipa, te fa’a’ohipa-māite-ra’a i tō tātou taime ’e i tā tātou moni.

Te fa’arava’ira’a iāna iho i te pae manava

Te fa’arava’ira’a iāna iho i te pae manava, ’o te ’itera’a ïa nāhea i te paiō i te mau fifi o te orara’a manava ma te itoito ’e te fa’aro’o. Tē fa’aruru nei tātou i te mau tāmatara’a ’e te mau taupupūra’a o te orara’a. ’Aua’a a’e te ’evanelia, ’ua ’ite tātou tei ia tātou te mā’itira’a nō te pāhono i te reira mau fifi. Te pāhonora’a ma te fa’aro’o i te Fatu, e fa’arahi ïa i tō tātou ’aravihi ’ia fa’aruru i te tahi atu ā mau fifi ma te tīa’ira’a pūai atu ā.

Te ha’api’ira’a

’Ia tāmau tātou i te ha’api’i-noa-ra’a. Tē hina’aro nei te Atua ’ia ha’api’i tātou i tō tātou ferurira’a ’e ’ia ha’amaita’i ho’i i tō tātou mau ’aravihi i roto i teie orara’a ’e i roto i te orara’a a muri a’e. Rahi noa atu tō tātou ’ite, maita’i noa atu ā tō tātou fa’aurura’a i ni’a i te maita’i ’e i ni’a i te fa’arava’ira’a ia tātou iho, i tō tātou ’utuāfare ’e i te feiā tei hina’aro i te tauturu.

Te mau ha’amaita’ira’a ’ia ’ite i te fa’arava’i iāna iho

’Ua ha’api’i mai te mau peropheta ē, ’a fa’anānea ai tātou i tō tātou ’ite i te fa’arava’i ia tātou iho, e ha’amaita’ihia tātou i te mau tīa’ira’a rahi ’e i te hau rahi roa. E mara’a ia tātou i te tauturu i tō tātou ’utuāfare ’e ia vetahi ’ē tei hina’aro i te tauturu. ’E e ha’amaita’ihia tātou i te mau rāve’a rahi atu ā ’e i te ’aravihi ’ia tāmau noa i te haere i mua.

Te mau rāve’a a te ’Ēkālesia

E nehenehe tā ’outou titi e fa’ata’a i te mau pupu fa’arava’ira’a iāna iho. E nehenehe te reira e ha’api’i ia ’outou i te mau parau tumu nō te fa’arava’ira’a ia ’outou iho ’e te mau ’aravihi mai te ti’a’aura’a i tā ’outou moni ’aore rā te ’imira’a i te hō’ē ’ohipa maita’i a’e. Tē vai ra te mau mātēria tauturu nō ni’a i te reira i roto i te Vaira’a buka ’evanelia. Mā’iti « Te mau buka ’e te mau ha’api’ira’a » ’e i muri iho « Fa’arava’ira’a iāna iho ».

Nō roto mai i te mau pāpa’ira’a mo’a

’Ia ’imi tātou i te ’ite nā roto i te ha’api’i ’e nā roto i te fa’aro’o (hi’o Te Ha’api’ira’a Tumu ’e te mau Fafaura’a 88:118).

E fa’afāna’o mai te Fatu i tōna mau ta’ata, ’ia ravehia rā te reira mai te au i tōna hina’aro (hi’o Te Ha’api’ira’a Tumu ’e te mau Fafaura’a 104:15–16).

Ha’api’i rahi mai ā

E ’ite ato’a ’outou i te mau a’ora’a nō te ’āmuira’a rahi nō ni’a i teie tumu parau ’e te tahi atu mau mātēria tauturu i roto i te Vaira’a buka ’evanelia (i ni’a i te ChurchofJesusChrist.org ’e ’aore rā i ni’a i te fa’aaura’a rorouira ’āfa’ifa’i). E nehenehe ato’a ’outou e paraparau i te mau melo o te pāroita ’aore rā o te ’āma’a, ’aore rā i te mau misiōnare.

© 2023 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, August 2023. Language. 19046 895