Ang Organisasyon sang Simbahan ni Jesucristo

Si Jesucristo amo ang pangulo sang Ang Simbahan ni Jesucristo sang mga Santos sa Ulihing mga Adlaw. Ginainspirar niya ang mga propeta kag apostoles nga giyahan ang Simbahan karon nga panahon, pareho sa Iya ginhimo sang panahon sang Bag-ong Katipan. Ginabuligan sila sang iban pa nga mga lider sang Simbahan.

Ang Simbahan ni Jesucristo sang mga Santos sa Ulihing mga Adlaw amo ang Simbahan sang Manluluwas. Ini “gintukod sa pundasyon sang mga apostoles kag mga propeta, nga si Jesucristo mismo ang pangulong bato” (Mga Taga-Efeso 2:20). Buot silingon nga Sia ang pinakaimportante nga bahin sang pundasyon. Ginagiyahan Niya ang Simbahan paagi sa mga propeta kag mga apostoles nga Iya ginpili bilang mga lider.

Ang Unang Pangulohan

Ang Pangulo sang Simbahan amo ang propeta sang Dios sa duta karon nga panahon. Sia ang pinakadugay na nga Apostoles kag ang solo nga tawo sa kalibutan nga nagabaton sang rebelasyon para giyahan ang bilog nga Simbahan. Ginainspirar sia sang Ginuo para mahibal-an kon sin-o nga duha ka Apostoles ang tawgon para magserbisyo bilang iya mga manuglaygay. Sila ang nagaporma sang Unang Pangulohan. Ining tatlo mga propeta, mga manugpanan-aw, kag mga manugpahayag sang rebelasyon.

Korum sang Dose ka Apostoles

Ang mga miyembro sang Korum sang Dose ka Apostoles mga propeta man, mga manugpanan-aw, kag manugpahayag sang rebelasyon. Gintawag sila para mangin espesyal nga mga saksi ni Jesucristo. Nagalibot sila sa bilog nga kalibutan para magtudlo kag magpamatuod parte sa Iya. (Tan-awa sa Doktrina kag mga Kasugtanan 107:23, 33.)

Mga Korum sang Seventy

Ang mga miyembro sang Seventy gintawag man nga mangin mga saksi ni Jesucristo (tan-awa sa Doktrina kag mga Kasugtanan 107:25). Ginabuligan nila ang Korum sang Dose nga itudlo ang ebanghelyo kag itukod ang Simbahan sa bilog nga kalibutan.

Litrato ni Machiko Horii

Lokal nga mga Lider

Ang imo stake ukon district presidency, bishopric ukon branch presidency, kag mga presidency sang elders quorum kag Relief Society gintawag man sang Dios. Makabulig sila sa imo nga tun-an kag ipangabuhi ang ebanghelyo. Matun-an mo ang pila sining mga calling sa Pundasyon sang Ebanghelyo nga artikulo sang Marso 2022 nga “Pagserbisyo sa mga Calling sa Simbahan.”

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, October 2023. Language. 19048 861