“Ti Organisasion ti Simbaan ni Jesucristo,” Liahona, Okt. 2023.
Binulan a Mensahe ti Liahona , Oktubre 2023
Ti Organisasion ti Simbaan ni Jesucristo
Ni Apo Jesucristo, ni Del Parson
Ni Jesucristo ti pangulo ti Ti Simbaan ni Jesucristo dagiti Santo iti Ud-udina nga Aldaw. Paregtaenna dagiti propeta ken apostol a mangidaulo iti Simbaan ita, kas iti inaramidna idi panawen ti Baro a Tulag. Tulongan ida dagiti dadduma pay a lider ti Simbaan.
Ti Simbaan ni Jesucristo dagiti Santo iti Ud-udina nga Aldaw ti Simbaan ti Mangisalakan. Daytoy ket “nabangon iti pundasion dagiti apostol ken propeta, a ni Jesucristo a mismo ti kangrunaan a bato a pasuli” (Taga Efeso 2:20). Kayat a sawen daytoy nga Isu ti kapatgan a paset ti pundasion. Isu ti mangiwanwan iti Simbaan babaen kadagiti propeta ken apostol a pinilina nga agbalin a lider.
Ti Umuna a Panguluen
Ti Presidente ti Simbaan ti propeta ti Dios ditoy daga ita. Isu ti senior nga Apostol ken ti kakaisuna a tao ditoy daga nga umaw-awat iti paltiing a mangiwanwan iti sibubukel a Simbaan. Paregtaen isuna ti Apo tapno maammuanna no asino kadagiti dua nga Apostol ti awaganna nga agserbi a kas mamagbagana. Buklenda ti Umuna a Panguluen. Amin a tallo ket propeta, mammaltiing, ken mammadto.
Korum dagiti Sangapulo-ket-dua nga Apostol
Dagiti miembro ti Korum dagiti Sangapulo-ket-dua nga Apostol ket isuda pay dagiti propeta, mammadto, ken mammaltiing. Naawaganda nga agbalin a naisangsangayan a saksi ni Jesucristo. Agbaniagada iti intero a lubong tapno mangisuro ken mangpaneknek maipapan Kenkuana. (Kitaen iti Doktrina Ken Katulagan 107:23, 33.)
Dagiti Korum ti Pitupulo
Naawagan met dagiti miembro ti Pitopulo nga agbalin a saksi ni Jesucristo (kitaen iti Doktrina ken Katulagan 107:25). Tulonganda ti Korum dagiti Sangapulo-ket-dua a mangisuro iti ebanghelio ken mangbangon iti Simbaan iti intero a lubong.
Ladawan nga innala ni Machiko Horii
Dagiti Lokal a Lider
Inawagan met ti Dios ti panguluenyo iti stake wenno district, panguluenyo iti bishopric wenno branch, ken dagiti panguluenyo iti elders quorum ken Relief Society. Matulongandakayo nga agsursuro ken agbiag iti ebanghelio. Mabalinmo nga adalen ti maipapan iti sumagmamano kadagitoy a takem (calling) iti Marso 2022 Gospel Basics article, “Serving in Church Callings.”
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, October 2023. Language. 19048 864