Imitunganyirize y’Itorero rya Yesu Kristo

Yesu Kristo ni we muyobozi mukuru w’Itorero rya Yesu Kristo ry’Abera b’Iminsi ya Nyuma. Amurikira abahanuzi n’intumwa kugira ngo bayobore Itorero muri iki gihe, nk’uko yabikoze mu bihe by’Isezerano Rishya. Bunganirwa n’abandi bayobozi b’Itorero.

Itorero rya Yesu Kristo ry’Abera b’Iminsi ya Nyuma ni Itorero ry’Umukiza. “Ryubatswe ku rufatiro rw’intumwa n’abahanuzi, Yesu Kristo ubwe ni we buye rikomeza imfuruka” (Abefeso 2:20). Ibi bisobanuye ko ari igice cy’urufatiro cy’ingirakamaro kuruta ibindi. Ayobora Itorero binyuze mu bahanuzi n’intumwa yatoranyije ngo babe abayobozi.

Ubuyobozi bwa Mbere

Umuyobozi w’Itorero ni umuhanuzi w’Imana ku isi uyu munsi. Ni Intumwa nkuru kandi ni na we muntu wenyine ku isi wakira amahishurirwa yo kuyobora Itorero ryose. Nyagasani aramumurikira kugira ngo amenye Intumwa ebyiri zo guhamagara ngo zibe abajyanama be. Ni bo bagize Ubuyobozi bwa Mbere. Bose uko ari batatu ni abahanuzi, bamenya, n’abahishura.

Ihuriro ry’Intumwa Cumi n’Ebyiri

Abanyamuryango b’Ihuriro ry’Intumwa Cumi n’Ebyiri na bo ni abahanuzi, bamenya, n’abahishura. Bahamagariwe kuba abahamya badasanzwe ba Yesu Kristo. Bagenda ku isi hose bigisha kandi bahamya ibijyanye na We. (Reba Inyigisho n’Ibihango 107:23,33.)

Amahuriro y’Aba Mirongo Irindwi

Abagize Aba Mirongo Irindwi na bo bahamagarirwa kuba abahamya ba Yesu Kristo (reba Inyigisho n’Ibihango 107:25). Bafasha Ihuriro ry’Intumwa Cumi n’Ebyiri kwigisha inkuru nziza no kubaka Itorero ku isi hose.

Ifoto yafotowe na Machiko Horii

Abayobozi b’Ibanze

Abagize Ubuyobozi bwawe bw’urumambo cyangwa bw’akarere, ubwepiskopi cyangwa ubuyobozi bw’ishami, ndetse n’ubuyobozi bw’ihuriro ry’abakuru n’ubw’umuryango w’ihumure na bo bahamagawe n’Imana. Bashobora kugufasha kwiga ndetse no gukurikiza inkuru nziza Ushobora kwiga ibijyanye n’imwe muri iyo mihamagaro mu nkuru yo muri Werurwe 2022 ijyanye n’iby’Ibanze by’Inkuru Nziza yitwa, “Gukora Imihamagaro y’Itorero.”

© 2023 by Intellectual Reserve, Inc. All rights reserved. Cyacapiwe muri Leta Zunze Ubumwe z’Amerika. Ukwemerwa kw’Icyongereza: 6/19. Ukwemerwa k’ubusemuzi: 6/19. Ubusemuzi bwa Monthly Liahona Message, October 2023. Language. 19048 716