Ejaak eo an Kabun̄ eo an Jisōs Kraist

Jisōs Kraist ej bōran Kabun̄ eo an Jisōs Kraist im Armej ro Rekwojarjar ilo Raan Ko Āliktata. E ej im̧we rikanaan ro im rijilōk ro n̄an tōl Kabun̄ eo rainin, āinwōt ke E eaar kōm̧m̧ane ilo tōre ko ilo Kallim̧ur Ekāāl. Rej bōk jipan̄ jān ritōl ro jet an Kabun̄ eo

Kabun̄ eo an Jisōs Kraist im Armej ro Rekwojarjar ilo Raan Ko Āliktata ej Kabun̄ eo an Rilo̧mo̧o̧r. Ej “kalōk ioon foundesōn an rū jelōk kab ri kanaan, Jisōs Kraist e make lukkuun dem̧an em̧” (Epesōs 2:20). Ej meļeļe in bwe E ej m̧ōtttan eo elukkuun aorōk tata an pedped eo. E ej tōl Kabun̄ in kōn rikanaan ro im rijilōk ro E ekar kāālōt n̄an aer erom ritōl ro.

Būreejtōnji eo Kein Kajuon

Būreejtōn eo an Kabun̄ in ej rikanaan eo an Anij ioon laļ in rainin. E eo ej Rijilōk eo eto tata an jerbal im armej eo de wōt ioon laļ in ej bōk revelesōn n̄an tōl aolepān Kabun̄ in. Irooj ej im̧we e n̄an jeļā ewi wōt Rijilōk ro ruo enaaj kūr n̄an jerbal āinwōt rikakpilōklōk ro an. Rej ejaake Būreejtōnji eo Kein Kajuon. Aolep rein jilu rej rikanaan ro, rilolo ro, im rikwaļo̧k revelesōn ro.

Doulul eo an Jon̄oulruo Rijilōk ro

Ro uwaan Doulul an Jon̄oulruo Rijilōk ro rej barāinwōt rikanaan ro, rilolo ro, im rikwaļo̧k revelesōn ro. Rej kūr n̄an erom āinwōt rikam̧ool ro rejenoļo̧k an Jisōs Kraist. Rej ito itak ilo aolepān peļaakin laļ in n̄an katakin im kam̧ool kōn E. (Lale Katak im Bujen Ko 107:23 33.)

Doulul ko an Jiljilimjuonn̄oul eo

Ro uwaan Jiljilimjuonn̄oul eo rej baāinwōt kūr n̄an erom rikam̧ool ro an Jisōs Kraist (lale Katak im Bujen Ko 107:25). Rej jipan̄ Doulul eo an Jon̄oulruo ro katakin gospel eo im kalōke Kabun̄ in ipeļaakin laļ in.

Pija jān Machicko Horii

Ritōl ro Ijo Jokwe ie

Stake ak district būreejtōnji eo, bisoprik ak branch būreejtōnji eo am̧, im būreejtōnji ko an doulul eo an elder ro im Doulul eo an Korā ro raar barāinwōt kūr jān Anij. Rej maron̄ jipan̄ eok katak im mour kōn gospel eo. Kwoj maron̄ katak kōn jet iaan kūr kein ilo M̧aaj 2022 ennaan eo an Pedped ko Im̧aan tata an Gospel eo, “Jerbal ilo Kūr ko an Kabun̄ in.”

© 2023 jān Intellectual Reserve, Inc. Aolep omālim rej pād ie. Kar būriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukok eo an Monthly Liahona Message, October 2023. Language. 19048 874