Te fa’anahora’a a te ’Ēkālesia a Iesu Mesia

Tē ti’a nei te Fa’aora i te upo’o o Te ’Ēkālesia a Iesu Mesia i te Feiā Mo’a i te mau Mahana Hope’a nei. E fa’auru ’oia i te mau peropheta ’e te mau ’āpōsetolo, nō te arata’i i te ’Ēkālesia i teie mahana, mai tāna i rave i te tau nō te Faufa’a ’Āpī. E tauturuhia rātou e te tahi atu feiā fa’atere o te ’Ēkālesia.

Te ’Ēkālesia a Iesu Mesia i te Feiā Mo’a i te mau Mahana Hope’a nei, ’o te ’Ēkālesia ïa a te Fa’aora. « I patuhia i ni’a iho i te niu a te mau ’āpōsetolo ’e te mau peropheta ra, ’e ’o Iesu Mesia iho te tihi rahi » (Ephesia 2:20). Te aura’a ra, ’o ’oia te tuha’a faufa’a roa a’e o te niu. Tē arata’i nei ’oia i te ’Ēkālesia nā roto i te mau peropheta ’e te mau ’āpōsetolo tāna i mā’iti ’ei feiā fa’atere.

Te Peresidenira’a Mātāmua

Te Peresideni o te ’Ēkālesia ’o te peropheta ïa a te Atua i ni’a i te fenua nei i teie mahana. ’O ’oia te ’āpōsetolo matahiapo ’e te ta’ata hō’ē roa i ni’a i te fenua nei ’o tē fa’ari’i i te heheura’a nō te arata’i i te ’Ēkālesia tā’āto’a. Tē fa’auru nei te Fatu iāna ’ia ’ite ē, ’o vai mā nā ’āpōsetolo e piti e pi’i nō te tāvini ’ei tauturu nōna. ’O rātou te Peresidenira’a Mātāmua. Rātou to’otoru e mau peropheta, e mau hi’o ’e e mau heheu parau.

Pupu nō te Tino ’Ahuru Ma Piti ’āpōsetolo

E mau peropheta, e mau hi’o ’e e mau heheu parau ato’a te mau melo nō te Pupu nō te Tino ’Ahuru Ma Piti ’āpōsetolo. ’Ua pi’ihia rātou ’ia riro ’ei ’ite ta’a ’ē nō Iesu Mesia. E rātere rātou nā te ao ato’a nei nō te ha’api’i e nō te fa’a’ite pāpū nō ni’a iāna. (Hi’o Te Ha’api’ira’a Tumu ’e te mau Fafaura’a 107:23, 33.)

Te mau pupu nō te Hitu ’Ahuru

’Ua pi’i-ato’a-hia te mau melo nō te Hitu ’Ahuru ’ia riro ’ei ’ite nō Iesu Mesia (hi’o Te Ha’api’ira’a Tumu ’e te mau Fafaura’a 107:25). Tē tauturu nei rātou i te pupu nō te Tino ’Ahuru Ma Piti ’ia ha’api’i i te ’evanelia ’e ’ia patu i te ’Ēkālesia nā te ao ato’a nei.

Hōho’a nā Machiko Horii

Te feiā fa’atere i te fenua iho

’Ua pi’i-ato’a-hia tō ’outou peresidenira’a titi ’aore rā māta’eina’a, te ’episekōpora’a ’aore rā te peresidenira’a ’āma’a, ’e te mau peresidenira’a pupu peresibutero ’e Sōtaiete Tauturu, e te Atua. E nehenehe tā rātou e tauturu ia ’outou ’ia ha’api’i mai ’e ’ia ora i te ’evanelia. E nehenehe ’outou e ha’api’i mai nō ni’a i te tahi o teie mau pi’ira’a i roto i te parau ve’a Mau parau niu o te ’evanelia nō Māti 2022, « Tāvinira’a i roto i te mau pi’ira’a o te ’Ēkālesia ».

© 2023 nā Intellectual Reserve, Inc. fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, October 2023. Language. 19048 895