Bulanan nga Mensahe sa Liahona, Mayo 2023
Ang Pirme Naton nga Kaupod
Mga Bahin
Kinahanglan naton, kag kinahanglan ninyo sa palaabuton, ang pirme nga pagpakig-upod sang Balaan nga Espiritu. Karon, ginahandum naton ini, pero kahibalo kita halin sa eksperiyensya nga indi ini mahapos lab-uton. Ang tagsa sa aton nagahunahuna kag nagahambal kag nagahimo sang mga butang sa aton adlaw-adlaw nga kabuhi nga makasaklaw sang Espiritu.
Kon matabo ina, kay matabo gid ina, mahimo nga mabatyagan naton ang pagkadisgusto sang Ginuo. Kag mahimo nga matentar kita nga magbatyag nga nagaisahanon kita. …
Kon ginabudlayan kamo nga mabatyagan ang Balaan nga Espiritu, mahimo ninyo binagbinagon kon bala may dapat kamo hinulsulan kag magbaton sang kapatawaran. Pwede kamo magpangamuyo nga may pagtuo para mahibal-an kon ano ang dapat himuon para matinloan kag mas mangin kwalipikado sa pirme nga pagpakig-upod sang Balaan nga Espiritu.
Kon gusto ninyo nga makabaton sang pagpakig-upod sang Balaan nga Espiritu, kinahanglan handumon ninyo ini para sa husto nga rason. Ang inyo mga katuyuan kinahanglan amo man sa katuyuan sang Ginuo. Kon maiyaiyahon ang inyo motibo, mabudlayan kamo sa pagbaton kag pagkilala sang mga pagpabatyag sang Espiritu.
Ang yabi para sa akon kag para sa imo amo nga handumon kon ano ang gusto sang Manluluwas. Ang aton mga motibo kinahanglan tungod sa puro nga gugma ni Cristo. …
… Ang Balaan nga Espiritu ginapadala sa matinuohon nga mga miyembro sang kasugtanan sang Simbahan ni Jesucristo. Karon, mangin lainlain ang inyo mga eksperiyensya, kag ang Espiritu magagiya sa pinakabagay sa inyo pagtuo kag ikasarang sa pagbaton sang rebelasyon para sa inyo kag sa inyo mga ginapalangga kag ginaserbisyohan. Ginapangamuyo ko sa bug-os ko nga tagipusuon nga magtubo ang inyo pagsalig.
© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, November 2023. Language. 19050 861