“Stap Rere blong Go long Tempol,” Liahona, Disemba 2023.
Liahona Mesej blong Evri Manis, Disemba 2023
Stap Rere blong Go long Tempol
Pikja blong Ogden Yuta Tempol we i kam long Mark Brunson
Long ol tempol blong Jos Ia blong Jisas Kraes blong Ol Lata-dei Sent yumi save kasem ol tabu kavenan mo odinens blong yumiwan mo long bihaf blong ol pupu blong yumi. Yumi go insaed long tempol blong soem bigfala lav mo fasin blong talem tangkyu long Papa long Heven mo Jisas Kraes. Yumi save mekem rere yumiwan blong go long tempol taem yumi stap lanem mo laef folem gospel blong Jisas Kraes. Blong moa infomesen abaot ol tempol, luk long Gospel Besik atikol “Tempol Wok” long Oktoba 2021 we oli raetem long Liahona.
Pikja blong Duban Saot Afrika Tempol i kam long Matthew Reier
Haos blong Lod
Ol tempol oli singaotem ol “haos blong Lod.” Oli ol tabu ples we yumi save filim Spirit blong God mo lav blong Hem long yumi. Oli ol ples tu we yumi save mekem ol kavenan mo kasem ol spesel odinens we bae i rere yumi blong gat laef ia we i no save finis. (Ol Kavenan oli ol tabu promes bitwin Papa long Heven mo ol pikinini blong Hem.) Blong stap fetful long ol kavenan blong yumi mo stap kasem ol tabu odinens ia, i helpem yumi blong gat wan spesel rilesensip wetem Papa long Heven mo Jisas Kraes.
Pikja blong Gwayakil Ekuado Tempol we i kam long Janae Bingham
?Hu ia i Save Go Insaed long Tempol?
Ol memba blong Jos oli save mekem baptaes long bihaf blong ol dedman taem oli gat 12 yia. Wan memba i save kasem endaomen sapos hem i gat 18 yia, hem i bin wan memba blong Jos blong 1 yia, mo i wantem blong mekem mo kipim ol tempol kavenan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 27.2.2, ChurchofJesusChrist.org). Wan man mo wan woman we tufala i kasem endaomen blong tufala finis insaed long tempol i save sil (mared) blong taem we i no save finis.
Ol Kavenan mo Ol Odinens
Bae yu mekem ol kavenan mo kasem ol odinens insaed long tempol. “Blong go insaed long wan kavenan rilesensip wetem God i fasemtaet yumi wetem Hem long wan wei we i mekem evri samting abaot laef i kam moa isi” (Russell M. Nelson, “Winim Wol ia mo Faenem Pis,” Liahona, Novemba 2022, 97). Wan odinens i wan tabu aksen we man i mekem tru long atoriti blong prishud. Ol odinens oli gat dip mining long saed blong spirit. Eksampol, taem yu tekpat long wan odinens, yu stap soem long God se yu wantem blong kasem mo kipim ol kavenan blong Hem.
Fasin blong Stap Rere blong Yuwan
Stap rere long saed blong spirit taem yu stap folem ol tijing blong Jisas Kraes mo stap kipim ol kavenan we yu mekem wetem God long taem we yu bin kasem baptaes. Yu save stadi tu ol risos blong Jos, olsem ol skripja mo ol toktok blong jeneral konfrens. Temples.ChurchofJesusChrist.org i givim ol infomesen abaot wanem we bae yu kasem taem yu go long tempol. Mo tu, i gat fulap moa infomesen abaot ol tempol kavenan, ol odinens, mo ol simbol.
Pikja blong Nauvu Ilinoa Tempol i kam long Eve Tuft
Ol simbol
Lod i oltaem tij wetem ol simbol. Eksampol, baptaes—stap go andanit long wota mo stap kam antap bakegen—i olsem we olfala man blong bifo i ded mo yu kam wan niu man we i bon bakegen (luk long Rom 6:3–6). Ol tempol odinens i poen i go long Jisas Kraes mo Atonmen blong Hem. Bae i had blong andastanem evri simbol blong fas taem we yu go long tempol, be yu save gohed blong stap lanem olgeta taem yu gobak long tempol tru aot long laef blong yu.
Tempol Rekomen
Blong go insaed long tempol, yu nid blong stap rere mo stap klin inaf. Yu save kasem wan rekomen blong go insaed long tempol afta we yu gat wan intaviu wetem bisop o branj presiden mo stek o misin presiden. Ol lida ia bae oli askem sam kwestin blong mekem sua se yu stap laef folem gospel blong Jisas Kraes. Ol lida blong yu oli save tokbaot long yu fas taem ol kwestin ia.
Stap Gobak long Tempol long bihaf blong ol Pupu blong Yu
Papa long Heven i wantem evri pikinini blong Hem blong oli mekem ol kavenan wetem Hem mo kasem ol tabu odinens. Ol odinens ia, olsem baptaes mo endaomen, oli mas mekem nomo insaed long tempol blong olgeta we oli bin ded mo oli no kasem gospel long wol. Yu save gobak long tempol blong mekem ol odinens blong ol famli memba blong yu we oli ded finis.
© 2023 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Monthly Liahona Message, December 2023. Language. 19049 852