“Amonata ne Tonong non ewe Tempel,” Liahona, Dec. 2023.
Porous ren Liahona Iteiten Maram, December 2023
Amonata ne Tonong non ewe Tempel
Sasingin Ogden Utah Tempel seni Mark Brunson
Non ekkewe tempel ren Ewe Mwichefenin Jises Kraist ren Aramas mi Pin non Fansoun Soponon sia tongeni angei ekkewe pwon mi pin me angangepin fan itach me mwirimwirich kewe. Sia tonong non ewe tempel ach sipwe pwarano ach tong me kinisou ngeni Samach won Nang me Jises Kraist. Sia tongeni amonata ach sipwe tonong non ewe tempel ren ach kaeo me manaueni ewe kapas allimen Jises Kraist. Ren pwan ekkoch porousen ewe tempel, nengeni ewe nongonong ren Gospel Basic “Temple Work” non ewe October 2021 Liahona mi katou.
Sasingin Durban South Africa Tempel seni Matthew Reier
Ewe Imwen ewe Samon
Ekkewe tempel ra iteni ewe “imwen ewe Samon.” Ir ekkewe neni mi pin ikewe sia tongeni mefi Ngunun Kot me An tong ngeni kich. Ir ra pwan ekkewe neni sia tongeni fori ach kewe pwon me angei auchean angangepin minne repwe amonakicheta ach sipwe angei manau esemuch. (Covenants ir ekkewe pwon mi pin nefinen Kot me Noun kewe semirit.) Ren ach nikitu ngeni ach kewe pwon mi pin me angei ekkei angangepin a anisikich an epwe wor ew marar mi auchea ngeni Samach Kot won Nang me Jises Kraist.
Sasingin Guayaquil Ecuador Tempel seni Janae Bingham
Ion mi Tongeni Tonong non ewe Tempel?
Chon ewe Mwichefen ra tongeni fori papatais ren mi mano poputa non ewe ier ra ier 12. Emon memper a tongeni angei ewe endowment t ika neminewe ika atewe a 18, i epwe chon ewe Mwichefen ren ukukun 1 ier, me mochen fori me aponueta ekkew pwon mi pin (nengeni General Handbook: Angang non Ewe Mwichefenin Jises Kraist ren Aramas mi Pin non Fansoun Soponon, 27.2.2, ChurchofJesusChrist.org). Emon mwan me emon fefin ra fen angei ar endowment non tempel ra tongeni riri (pupunu) fochofoch non ewe tempel.
Ekkewe Pwon mi Pin me Angangepin
Kopwe fori ekkewe pwon mi pin me angei ekkewe angangepin non ewe tempel. “Tonong non ew marar mi pwon fiti Kot a ochufengenikich ngeni I non ew napanap a forimettoch meinisin ussun manau an epwe mecheres” (Russell M. Nelson, “Overcome the World and Find Rest,” Liahona, Nov. 2022, 97). Ew angangepin a ew mokutukutun ewe inis mi pin a for meren ewe a wor an pung seni ewe pristut. Ekkewe angangepin a wor anononun wewen non pekin ngun. Awewe chok, nupwen ka pachenong non ew angangepin, ka pwarano ngeni Kot pwe ka mochen kopwe angei me aponueta An kewe pwon.
Amonata Won Pusin Om
Amonata non pekin ngun ren om tapweno mwirin an Jises Kraist kewe afanafan e aponueta ekkewe pwon mi pin ka fori fengen me Kot atun papatais. Kapwan tongeni kaeo mettochun Mwichefen, ussun ekkewe pukefen me ekkewe afanafanen mwichenap. Temples.ChurchofJesusChrist.org a awora porous ussun met ka awitiwiti nupwen ka tonong non ewe tempel. A pachenong pwan ekkoch tichikin porousen ekkewe pwon mi pin, angangepin non tempel, me esisin.
Sasingin Nauvoo Illinois Tempel seni Eve Tuft
Esisin
Ewe Samon a osukuna aean esisin. Awewe chok, papatais—tonong fan ewe konik me tosefaniu—ussun nge inisum we minen nom a mano me inisum we minefo a upusefan (nengeni Rome 6:3–6). Ekkewe angangepin non tempel ra iti ngeni Jises Kraist me An ewe Achasefan. Meni epwe weires ach sipwe weweiti meinisin kewe esisin non ewe aewin ka tonong non ewe tempel, nge ka tongeni sopweni ne kaeo nuwen kapwan niwinsefan ngeni ewe tempel non unusen manauom.
Toropwen Mumutan non Tempel
Ren om kowe tonong non ewe tempel, a auchea kopwe amonata me nimenimoch. Ka tongeni angei echo taropwen mumuta om kopwe tonong non ewe tempel mwirin ew interfiu ren noum pisop ika pranch preseten me ren ewe steik ika presetenin misin. Ekkei sou emwen repwe eisinuk ekkoch kapas eis ar repwe fat pwe en mi manaueni ewe kapas allimen Jises Kraist. Noum kewe sou emwen ra tongeni porous ngonuk ussun ekkei kapas eis me mwen ewe fansoun.
Niwinsefan ngeni ewe Tempel fan iten Mwirimwirum Kewe
Samach won Nang a mochen meinisin Noun semirit repwe fori ekkewe pwon mi pin fengen me I me angei ekkewe angangepin mi pin. Ekkkei angangepin, ussun papatais me endowment, repwe for me non ekkewe tempel fan iten ekkana ra mano nge rese angei ewe kapas allim. Ka tongeni niwinsefan ngeni ewe tempel om kowe fori ekkewe angangepin fan iten om kewe famini mi mano.
© 2023 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porous ren Liaona Iteiten Maram, December, 2023.Language. 19049 901