“Vakavakarau ni Curu kina Valetabu,” Liaona, Tise. 2023.
iTukutuku Vakavula ni Liaona Tiseba 2023
Vakavakarau ni Curu kina Valetabu
iTaba ni Valetabu e Ogden Utah mai vei Mark Brunson
Ena veivaletabu Ni Lotu i Jisu Karisito ni Yalododonu Edaidai eda rawa ni ciqoma kina na veiyalayalati tabu kei na cakacaka vakalotu me baleti keda kei ira na noda qase e liu. Eda lako kina valetabu meda vakaraitaka na noda loloma kei na vakavinavinaka vua na Tamada Vakalomalagi kei Jisu Karisito. E rawa nida vakavakarau meda curuma na valetabu ena noda vulica ka bulataka tiko na kosipeli i Jisu Karisito. Me baleta na ikuri ni ivakamacala ni valetabu, raica na iTukutuku Taumada ni Kosipeli “Cakacaka ni Valetabu” ena ilavelave ni Liaona, ni Okotova 2021.
iTaba ni Valetabu e Durban Sauca Aferika mai vei Matthew Reier
Na Vale ni Turaga
Na Valetabu e vakatokai me “vale ni Turaga.” Era sa vanua tabu ka rawa nida vakila kina na Yalo ni Kalou kei na Nona loloma vei keda. Era vanua talega e rawa nida vakayacora kina na veiyalayalati ka ciqoma kina na veicakacaka vakalotu digitaki ka na vakarautaki keda me noda na bula tawamudu. (Na veiyalayalati era sa yalayala tabu ena kedrau maliwa na Kalou kei ira na Luvena.) Noda yalodina kina noda veiyalayalati ka ciqoma na veicakacaka vakalotu oqo ena vukei keda me tiko edua na veiwekani vakamareqeti kei na Tamada Vakalomalagi kei Jisu Karisito.
iTaba ni Valetabu e Guayaquil Ecuador mai vei Janae Bingham
O cei e Rawa ni Curu kina Valetabu?
E rawa nira veipapitaisotaki na lewe ni Lotu ena vukudra na mate me tekivu ena yabaki era na yabaki 12 kina. Sa rawa vua e dua na lewenilotu me ciqoma na edaumeni kevaka o koya esa yabaki 18 ke lailai sara, sa yabaki dua na nona lewena na lotu, ka gadreva me cakava ka maroroya na veiyalayalati ni valetabu (raica na iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 27.2.2, ChurchofJesusChrist.org). Sa rawa ni rau vauci (vakamau) e dua na tagane kei na dua na yalewa erau sa ciqoma oti na nodra edaumeni ni valetabu me tawamudu ena valetabu.
Veiyalayalati kei na Cakacaka Vakalotu
O na cakava na veiyalayalati ka ciqoma na cakacaka vakalotu ena valetabu. “Noda curu kina dua na veiwekani ni veiyalayalati kei na Kalou ena vauci keda Vua ena sala e vakarawarawataka na veika taucoko me baleta na bula” (Russell M. Nelson, “Vakamalumalumutaka na Vuravura ka Kunea na Vakacegu,” Liaona, Nove. 2022, 97). Na cakacaka vakalotu sa ikoya e dua na cakacaka tabu ka vakayacori ena lewa ni matabete. Na cakacaka vakalotu e titobu na kena ibalebale vakayalo. Me ivakaraitaki, nio vakaitavi ena dua na cakacaka vakalotu, o vakaraitaka vua na Kalou nio sa gadreva mo ciqoma ka maroroya na Nona veiyalayalati.
Noda Vakavakarau Yadua
Vakavakarau vakayalo ena nomu muria na ivakavuvuli i Jisu Karisito ka maroroya na veiyalayalati o cakava vata kei na Kalou ena papitaiso. E rawa talega nio vulica na veivurevure ni Lotu eso, me vaka na ivolanikalou kei na vosa ni koniferedi raraba. Temples.ChurchofJesusChrist.org e tu kina na itukutuku me baleta na veika me namaki nio curu kina valetabu. E oka tale ga kina na veikamatailalai me baleta na veiyalayalati ni valetabu, cakacaka vakalotu, kei na ivakatakilakila.
iTaba ni Valetabu e Nauvoo Illinois mai vei Eve Tuft
iVakatakilakila
E dau vakayagataka vakalevu na Turaga na ivakatakilakila me veivakavulici kina. Me kena ivakaraitaki, na papitaiso—ena nunu e loma ni wai ka cabe tale mai—e vaka na kena mate na tamata makawa ka sucu tale na tamata vou (raica na Roma 6:3–6). Na cakacaka vakalotu ni valetabu e dusi Jisu Karisito kei na Nona Veisorovaki. Ena dredre beka mo kila vakavinaka na ivakatakilakila taucoko ena imatai ni gauna o curu kina valetabu, ia sa rawa mo tomana na vuli nio lesu kina valetabu ena gauna ni nomu bula taucoko.
iVolatara ni Valetabu
Mo curu i valetabu, e gadrevi mo vakavakarau ka bula kilikili. E rawa nio ciqoma e dua na ivolatara mo curu i valetabu ni oti e dua na veivakatarogi vata kei nomu bisopi se peresitedi ni tabana vata kei peresitedi ni iteki se tabana ni kaulotu. Era na taroga na iliuliu eso na taro me vakadeitaka nio bulataka tiko na kosipeli i Jisu Karisito. E rawa nira vosa vei iko na nomu iliuliu me baleta na veitaro oqo ni bera na kena gauna.
Lesu i Valetabu me baleti ira na Nomu Qase e Liu
Na Tamada Vakalomalagi e vinakati ira kece na Luvena mera cakava na veiyalayalati vata kei Koya ka ciqoma na veicakacaka tabu vakalotu. Na cakacaka vakalotu oqo, me vakataka na papitaiso kei na edaumeni, e dodonu me caka ena valetabu me baleti ira era sa takali yani ka sega ni ciqoma na kosipeli. E rawa nio lesu i valetabu mo cakava kina na cakacaka vakalotu me baleti ira na lewe ni nomu matavuvale era sa mate.
© 2023 mai na Intellectual Reserve, Inc. All rights reserved. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. Vakadewa ni Monthly Liahona Message, December 2023. Language. 19049 858