Paghanda sa Pagkadto sa Templo

mga tawo nga nagalakat pakadto sa Templo sang Ogden Utah

Sa mga templo sang Ang Simbahan ni Jesucristo sang mga Santos sa Ulihing mga Adlaw makabaton kita sang sagrado nga mga kasugtanan kag mga ordinansa para sa aton mga kaugalingon kag sa aton mga katigulangan. Nagakadto kita sa templo agud ipakita ang aton pagpalangga kag pagpasalamat sa Amay nga Langitnon kag kay Jesucristo. Mahimo kita maghanda sa pagkadto sa templo paagi sa pagtuon kag pagpangabuhi sang ebanghelyo ni Jesucristo. Para sa dugang nga impormasyon parte sa mga templo, tan-awa sa artikulo sang Gospel Basics “Temple Work” sa Oktubre 2021 nga isyu sang Liahona.

Litrato sang Durban South Africa Temple ni Matthew Reier

Ang Balay sang Ginuo

Ang mga templo ginatawag nga “balay sang Ginuo.” Balaan ini nga mga lugar kon sa diin mahimo naton mabatyagan ang Espiritu sang Dios kag ang Iya pagpalangga sa aton. Balaan man ini nga mga lugar sa diin nagahimo kita sang mga kasugtanan kag nagabaton sang pinasahi nga mga ordinansa nga magahanda sa aton nga makaangkon sang kabuhi nga walay katapusan. (Ang mga kasugtanan sagrado nga mga promisa sa tunga sang Dios kag sang Iya mga kabataan.) Ang mangin tampad sa aton mga kasugtanan kag ang pagbaton sining mga ordinansa nagabulig sa aton nga maangkon ang espesyal nga kaangtanan upod sa Amay nga Langitnon kag kay Jesucristo.

Litrato sang Guayaquil Ecuador Temple ni Janae Bingham

Sin-o ang Pwede Magkadto sa Templo?

Ang mga miyembro makahikot sang mga bunyag para sa patay sugod sa tuig nga mag-edad sila 12 anyos. A miyembro makabaton sang endowment kon sia nagaedad indi magnubo sa 18, nangin miyembro sang Simbahan indi magnubo isa ka tuig, kag nagahandum nga maghimo kag magtuman sang mga kasugtanan sa templo (tan-awa sa Mga Pinili nga Bahin halin sa Libro sang Pangkabilogan nga Pagsulundan, 27.2.2, ChurchofJesusChrist.org). Ang lalaki kag babayi nga nakabaton na sang ila endowment sa templo mahimo maselyohan (makasal) para sa walay katapusan sa templo.

Mga Kasugtanan kag Mga Ordinansa

Magahimo ka sang mga kasugtanan kag magabaton sang mga ordinansa sa templo. “Ang magsulod sa kasugtanan nga relasyon upod sa Dios nagahigot sa aton sa Iya sa paagi nga nagapahapos sang tanan parte sa kabuhi” (Russell M. Nelson, “Overcome the World and Find Rest,” Liahona, Nob. 2022, 97). Ang ordinansa isa ka sagrado nga pisikal nga buhat nga ginahikot paagi sa awtoridad sang priesthood. Ang mga ordinansa may madalom nga espirituhanon nga kahulugan. Halimbawa, kon nagapartisipar ka sa isa ka ordinansa, ginapakita mo sa Dios nga sugot ka nga magbaton kag magtuman sang Iya mga kasugtanan.

Personal nga Preparasyon

Magpreparar sa espirituhanon paagi sa pagsunod sa mga pinanudlo ni Jesucristo kag pagtuman sang mga kasugtanan nga imo ginhimo upod sa Dios sa tion sang bunyag. Mahimo mo man tun-an ang mga balasahon sang Simbahan, pareho sang balaan nga mga kasulatan kag mga pamulongpulong sa pangkabilogan nga komperensya. Ang Temples.ChurchofJesusChrist.org nagahatag sang impormasyon kon ano ang paabuton kon magkadto ka sa templo. May ari man ini sang dugang nga detalye parte sa mga kasugtanan, mga ordinansa, kag mga simbolismo sa templo.

Litrato sang Nauvoo Illinois Temple ni Eve Tuft

Simbolismo

Ang Ginuo masami nga nagatudlo gamit ang mga simbolo. Halimbawa, ang bunyag—ang pagtugmaw pa-idalom sa tubig kag pagbutwa liwat—daw pareho sa pagkapatay sang imo daan nga pagkatawo kag pagkabun-ag liwat sang imo bag-o nga pagkatawo (tan-awa sa Mga Taga-Roma 6:3–6). Ang mga ordinansa sa templo nagatudlo padulong kay Jesucristo kag sa Iya Pagbayad-sala. Mahimo nga sa primero mo nga pagkadto sa templo mabudlay maintiendihan ang tanan nga mga simbolismo, pero pwede ka magpadayon sa pagtuon sa imo pagbalikbalik sa templo sa bug-os mo nga kabuhi.

Rekomendasyon sa Templo

Para makasulod sa templo, kinahanglan mo mangin handa kag kaangay-angay. Makabaton ka sang rekomendasyon sa pagsulod sa templo pagkatapos sang interbyu sang imo bishop ukon branch president kag sang stake ukon mision president. Ining mga lider may mga ipamangkot sa imo agud masiguro nga ginapangabuhi mo ang ebanghelyo ni Jesucristo. Ang imo mga lider mahimo nga makigsugilanon sa imo parte sa sining mga pamangkot sing mas temprano.

Pagbalik sa Templo para sa Imo mga Katigulangan

Gusto sang Amay nga Langitnon nga ang Iya tanan nga kabataan makahimo sang mga kasugtanan upod sa Iya kag magbaton sang sagrado nga mga ordinansa. Ining mga ordinansa, pareho sang bunyag kag endowment, kinahanglan nga hikuton sa mga templo para sa mga nagkalamatay nga wala makabaton sang ebanghelyo. Pwede ka magbalik sa templo agud hikuton ang mga ordinansa para sa imo napatay na nga mga miyembro sang pamilya.

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, August 2023. Language. 19049 861