“Txoj Kev Npaj Mus rau lub Tuam Tsev,” Liyahaunas, Kaum Ob Hlis Ntuj 2023.
Zaj Lus hauv Liyahaunas Txhua Hli, Kaum Ob Hlis Ntuj 2023
Txoj Kev Npaj Mus rau lub Tuam Tsev
Daim duab txog lub Tuam Tsev Ogden Utah los ntawm Mark Brunson
Nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg cov tuam tsev peb txais tau cov kab ke thiab tej kev khi lus dawb ceev rau peb tus kheej thiab peb cov poj koob yawm txwv. Peb mus rau lub tuam tsev kom qhia tias peb hlub Leej Txiv Saum Ntuj Ceeb Tsheej thiab Yexus Khetos thiab peb ris Nkawd txiaj. Peb npaj mus rau lub tuam tsev thaum peb kawm thiab ua raws li Yexus Khetos txoj moo zoo. Yog xav paub ntxiv txog cov tuam tsev, cia li saib zaj lus ntawm Tej lub Ntsiab Cai ntawm Txoj Moo Zoo hu ua “Tes Hauj Lwm hauv lub Tuam Tsev” nyob hauv phau xov xwm Liyahaunas rau lub Kaum Hli Ntuj xyoo 2021.
Daim duab txog lub Tuam Tsev Durban South Africa los ntawm Matthew Reier
Tus Tswv lub Tsev
Cov tuam tsev hu ua “tus Tswv lub tsev.” Yog tej qhov chaw dawb huv uas peb hnov tau Vajtswv tus Ntsuj Plig thiab Nws txoj kev hlub peb. Kuj yog tej qhov chaw rau peb khi lus thiab txais cov kab ke tshwj xeeb uas npaj peb txais tau txoj sia nyob mus ib txhis. (Tej kev khi lus yog cov lus dawb ceev uas cog tseg ntawm Vajtswv thiab Nws cov me nyuam.) Qhov uas peb ua raws nraim li peb tej kev khi lus thiab txais cov kab ke no pab peb sib raug zoo nrog Leej Txiv Saum Ntuj Ceeb Tsheej thiab Yexus Khetos.
Daim duab txog lub Tuam Tsev Guayanquil Ecuador los ntawm Janae Bingham
Pub Leej Twg Mus hauv lub Tuam Tsev?
Cov mej zeej hauv lub Koom Txoos ua tau kev cai raus dej rau cov neeg tuag pib lub xyoo uas lawv muaj 12 xyoos. Ib tug mej zeej txais tau vaj txiaj ntsim yog tias nws muaj 18 xyoo, yog ib tug mej zeej ntawm lub Koom Txoos rau ib xyoos lawm, thiab xav khi lus thiab ua raws li tej kev khi lus (saib Phau Qhia Kev Coj lub Koom Txoos: Kev Ua Hauj Lwm hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, 27.2.2, ChurchofJesusChrist.org). Yuav pub ib tug txiv neej thiab ib tug poj niam uas tau txais nkawd vaj txiaj ntsim lawm ua kev cai sib khi (sib yuav) mus ib txhis li hauv lub tuam tsev.
Kev Khi Lus thiab cov Kab Ke
Koj yuav khi lus thiab txais cov kab ke hauv lub tuam tsev. “Thaum peb ua kev khi lus nrog Vajtswv ces ua rau txhua tsav txhua yam hauv lub neej no yooj yim dua.” (Russell M. Nelson, “Kov Yeej lub Ntiaj Teb thiab Nrhiav Tau Kev So,” Liyahaunas, Kaum Ib Hlis Ntuj 2022, 97). Ib txoj kab ke yog ib tug txheej txheem dawb ceev uas ua raws li txoj cai ntawm lub pov thawj hwj. Cov kab ke muaj lub ntsiab los ntawm sab ntsuj plig tseem ceeb heev. Piv txwv hais tias, thaum koj ua ib txoj kab ke, koj qhia rau Vajtswv tias koj txaus siab txais thiab ua raws li Nws tej kev khi lus.
Kev Npaj Koj tus Kheej
Cia li npaj koj sab ntsuj plig thaum koj ua raws li Yexus Khetos tej lus qhia thiab ua raws li tej kev khi lus uas koj tau nrog Vajtswv khi thaum koj ua kev cai raus dej. Koj kuj kawm tau cov ntaub ntawv los ntawm lub Koom Txoos, xws li cov vaj lug kub thiab tej zaj lus ntawm lub tuam rooj sab laj. Temples.ChurchofJesusChrist.org kuj muaj xov xwm txog tej yam uas koj yuav kawm thaum koj mus rau lub tuam tsev. Muaj tej lus qhia txog tej kev khi lus, cov kab ke, thiab tej lub cim ntawm lub tuam tsev.
Daim duab txog lub Tuam Tsev Nauvoo Illinois los ntawm Eve Tuft
Siv lub Cim
Tus Tswv qhia ntau yam los ntawm kev siv lub cim. Piv txwv hais tias, kev cai raus dej—yog kev raus rau hauv dej thiab kev tawm hauv dej los—yeej yog ib lub cim txog qhov uas lub qub neej tuag lawm thiab koj yug los ua ib tug neeg tshiab (saib Loos 6:3–6). Cov kab ke hauv lub tuam tsev yog tej lub cim txog Yexus Khetos thiab Nws txoj Kev Theej Txhoj. Tej zaum yuav nyuaj rau koj to taub tag nrho tej lub cim thawj zaug uas koj mus rau lub tuam tsev, tiam sis koj kawm tau ntxiv thaum koj rov qab mus rau lub tuam tsev tas koj lub neej.
Daim Ntawv Tso Cai Nkag Tuam Tsev
Koj yuav tsum npaj siab thiab tsim nyog mus rau hauv lub tuam tsev. Koj txais tau ib daim ntawv nkag tuam tsev tom qab koj nrog koj tus npisov los yog ceg ntseeg tus thawj tswj hwm thiab nrog ceg txheem ntseeg los yog qhov chaw tshaj tawm txoj moo zoo tus thawj tswj hwm ua xam phaj. Ob tug thawj coj no yuav nug koj tej lus nug kom ua tib zoo seb koj puas ua neej raws li Yexus Khetos txoj moo zoo. Koj cov thawj coj qhia tau koj txog tej lus nug no ua ntej.
Kev Rov Qab Mus rau lub Tuam Tsev Kom Pab Koj cov Poj Koob Yawm Txwv
Leej Txiv Saum Ntuj Ceeb Tsheej xav kom tag nrho Nws cov me nyuam nrog Nws khi lus thiab txais cov kab ke dawb ceev. Cov kab ke no, xws li kev cai raus dej thiab vaj txiaj ntsim, los yuav tsum ua hauv lub tuam tsev rau cov neeg uas tau tas sim neej thiab tsis txais txoj moo zoo. Koj muaj cib fim rov qab mus rau lub tuam tsev kom sawv koj cov poj koob yawm txwv uas tuag lawm cev ua cov kab ke.
© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, December 2023. Language. 19049 295