“Panagsagana a Dumar-ay iti Templo,” Liahona, Dis. 2023.
Mensahe ti Binulan a Liahona , Disiembre 2023
Panagsagana a Dumar-ay iti Templo
Ladawan ti Ogden Utah Temple ni Mark Brunson
Kadagiti templo ti Ti Simbaan ni Jesucristo dagiti Santo iti Ud-udina nga Aldaw, mabalintayo nga umawat kadagiti sagrado a katulagan ken ordinansa para iti bagbagitayo ken kadagiti kapuonantayo. Tumabunotayo iti templo tapno ipakitatayo ti ayat ken panagyamantayo iti Nailangitan nga Ama ken ni Jesucristo. Makapagsaganatayo a dumar-ay iti templo babaen ti panangsursuro ken panangibiag iti ebanghelio ni Jesucristo. Para iti ad-adu pay nga impormasion maipapan kadagiti templio, kitaen iti Gospel Basics iti artikulo a “Temple Work” iti isyu ti Oktubre 2021 ti Liahona.
Ladawan ti Durban South Africa Temple ni Matthew Reier
Ti Balay ti Apo
Dagiti templo ti maaw-awagan a “balay ti Apo.” Sagrado dagitoy a lugar a pakariknaantayo iti Espiritu ti DIos ken ti panagayatna kadatayo. Dagitoy pay ti lugar a mabalintayo ti agaramid kadagiti katulagan ken umawat kadagiti naisangsangayan nga ordinansa a mangisagana kadatayo a maaddaan iti biag nga agnanayon. (Dagiti katulagan ket sagrado a kari iti nagbaetan ti Dios ken dagiti annakna.) Ti panagbalin a napudno kadagiti katulagantayo ken panangawat kadagitoy nga ordinansa ti mangtulong kadatayo a maaddaan iti naisangsangayan a relasion iti Nailangitan nga Ama ken ni Jesucristo.
Ladawan ti Guayaquil Ecuador Temple ni Janae Bingham
Asino ti Mabalin a Dumar-ay iti Templo?
Aramiden dagiti miembro ti Simbaan iti panagbuniag kadagiti natay mangrugi iti tawen nga agtawenda iti 12. Awaten ti maysa a miembro ti endowment no isuna ket agtawen iti saan a nababbaba ngem 18, miembro ti Simbaan iti di kumurang a maysa a tawen, ken agtarigagay nga agaramid ken agtungpal kadagiti katulagan iti templo (kitaen iti General Handbook: Serving in The Church of Jesus Christ of Latter-day Saints, 27.2.2, ChurchofJesusChrist.org). Ti maysa a lalaki wenno babai a nakaawaten iti endowment-da iti templo ket mabalin a mailantip (agkasar) para iti kinaagnanayon iti templo.
Dagiti Katulagan ken Ordinansa
Agaramidkayunto kadagiti katulagan ken umawat kadagiti ordinansa iti templo. “Ti iseserrek iti relasion ti katulagan iti Dios ti mangibegkes kadatayo Kenkuana iti wagas a mangpalaka iti amin a banag maipapan iti biag” (Russell M. Nelson, “Overcome the World and Find Rest,” Liahona, Nob. 2022, 97). Ti ordinansa ket maysa a sagrado a pisikal nga aramid a maannong babaen ti turay ti priesthood. Addaan dagiti ordinansa iti nauneg a naespirituan a kaipapanan. Kas pagarigan, no makipasetkayo iti ordinansa, ipakitayo iti Dios a sitatallugodkayo nga umawat ken agtungpal kadagiti katulaganna.
Bukod a Panagsagana
Agsagana iti naespirituan babaen ti panangsurot kadagiti pannursuro ni Jesucristo ken panangtungpal kadagiti katulagan nga inaramidyo iti DIos iti panagbuniag. Mabalinyo pay nga adalen dagiti resources ti Simbaan, kas kadagiti nasantuan a kasuratan ken mensahe iti sapasap a komperensia. TiTemples.ChurchofJesusChrist.org mangipaay iti impormasion maipapan iti no ania ti namnamaen no dumar-aykayo iti templo. Karamanna pay daytoy dagiti adu pay a detalye maipapan kadagiti katulagan, ordinansa ken simbolismo iti templo.
Ladawan ti Nauvoo Illinois Temple ni Eve Tuft
Simbolismo
Masansan a mangisuro ti Dios a mangus-usar kadagiti simbolo. Kas pagarigan, ti panagbuniag—ti pannakairarem iti danum ken sumang-at manen—ket maiyarig iti ipapatay ti daan a kinataoyo ken ti pannakaipasngay manen ti baro a kinataoyo (kitaen iti Taga-Roma 6:3–6). Itudo dagiti ordinansa ti templo ken ni Jesucristo ken ti Pannubbotna. Mabalin a narigat a maawatan ti amin a simbolismo iti umuna a gundaway nga idadar-ay iti templo, ngem mabalinyo nga itultuloy ti agsursuro bayat ti panagsubliyo iti templo iti intero a panagbiagyo.
Rekomenda ti Templo
Tapno sumrek iti templo, nasken a nakasaganakayo ken maikarikayo. Mabalinyo ti umawat iti recommend a sumrek iti templo kalpasan ti pannakainterbyuyo iti bishop wenno branch president ken iti stake wenno mission president. Agdamag dagitoy a lider iti maysa a grupo (set) dagiti saludsod tapno masigurado nga agbibiagkayo iti ebanghelio ni Jesucristo. Mabalin a kasaritanakayo dagiti lideryo a nasaksakbay maipapan kadagitoy a saludsod.
Panagsubli iti Templo Para Kadagiti Kapuonam
Kayat ti Nailangitan nga Ama nga amin dagiti annakna ket makitulag Kenkuana ken umawat kadagiti sagrado nga ordinansa. Dagitoy nga ordinansa, kas iti panagbuniag ken ti endowment, ket nasken a maaramid kadagiti templo para kadagiti pimmusayen a saan a nakaawat iti ebanghelio. Mabalinyo ti agsubli iti templo tapno agaramid kadagiti ordinansa para kadagiti pimmusayen a miembro ti pamiliayo.
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, December 2023. Language. 19049 864