Mukenji wa ku Ngondu wa Liahona, Ngondu wa Dikumi ne Muibidi 2023

Kudilongolola bua Kubuela mu Ntempelo

bantu benda baya batangila ku Ntempelo wa Ogden Utah

Foto wa Ntempelo wa Ogden Utah kudi Mark Brunson

Mu Tempelu ya Ekelezia wa Yezu Kilisto wa Bansantu ba Matuku a Ndekelu tudi mua kupeta bipungidi ne milulu bia tshijila buetu ne bua bankambua betu. Tudi tubuela mu Ntempelo bua kuleja dinanga ne ditaba dietu kudi Tatu wa mu Diulu ne Yezu Kilisto. Tudi mua kudilongolola bua kubuela mu Ntempelo mu kulonga ne kuenzela lumu luimpa lua Yezu Kilisto. Bua mamanyisha abungi pa ntempelo, tangila tunungu tushindama tua lumu luimpa“Mudimu wa Ntempelo” mu bualu bua Ngondu wa Dikumi 2021 bua Liahona.

Miaku pambelu pa Ntempelo wa Durban Afrique du Sud

Foto wa Ntempelo wa Durban Afrique du Sud kudi Matthew Reier

Nzubu wa Mukalenga

Ntempelo idi ibikidibua ne “Nzubu wa Mukalenga.” Idi miaba ya tshijila itudi mua kumvua Nyuma wa Nzambi ne dinanga dienda buetu. Idi kabidi miaba itudi mua kuenza bipungidi ne kupeta milulu ya pa buayi yatulongolola bua kupeta moyo wa tshiendelela. (Bipungidi bidi milayi ya tshijila pankatshi pa Nzambi ne bana Benda.) Dikala ne lulamatu ku bipungidi bietu ne dipeta milulu eyi bidi bituambuluisha bua kupeta malanda a pa buawu ne Tatu wa mu Diulu ne Yezu Kilisto.

Bansonga bimana pambelu pa Ntempelo wa Guayaquil Ecuador

Foto wa Ntempelo wa Guayaquil Ecuador kudi Janae Bingham

Nganyi udi Mua Kubuela mu Ntempelo?

Bidimba bia Ekelezia bidi mua kuenzela bafua ditambula padibi bikumbaja bidimu 12. Tshidimba tshidi mua kupeta diambika paditshi ne bidimu biobi bikesa nansha 18, tshikala tshidimba kukadi tshidimu tshijima, ne tshikala ne dijinga dia kuenza ne kulama bipungidi bia ntempelo (tangila Mukanda Munena wa Maludiki: Disadila mu Ekelezia wa Yezu Kilisto wa Bansantu ba Matuku a Ndekelu, 27.2.2, ChurchofJesusChrist.org). Muluma ne mukaji bakadi bapeta diambika diabu mu ntempelo badi mua kusuikibua (kuselangana) bua tshiendelela mu ntempelo.

Bipungidi ne Milulu

Newenza bipungidi ne neupeta milulu mu ntempelo. “Dibuela mu malanda a tshipungidi ne Nzambi didi ditusuika kudiye mu mushindu udi wenza tshintu tshionsu tshia moyo tshipepela” (Russell M. Nelson, “Kutshimuna Bukuapanu ne Kupeta Dikisha,” Liahona, Ngondu wa Dikumi ne Umua 2022, 97). Mululu udi tshienzedi tshia tshijila tshia mubidi tshidi tshikumbajibua ku bukôkeshi bua buakuidi. Milulu idi ne diumvuija dia ndondu dia nyuma. Tshilejilu, paudi udibuinka mu mululu, udi uleja Nzambi ne udi ne disua dia kupeta ne kulama Bipungidi Bienda.

Didilongolola dia Pankaya

Dilongolola mu nyuma mu kulonda malongesha a Yezu Kilisto ne kulama bipungidi biuvua muenza ne Nzambi ku ditambula. Udi mua kulonga kabidi biambuluishi bia Ekelezia, bu mudi mifundu ne miyuki ya mpungilu munena. Ntempelo.ChurchofJesusChrist.org udi ufila mamanyisha pa tshia kutekemena paudi ubuela mu ntempelo. Bidi biangata kabidi diumvuija diabungi pa bipungidi bia ntempelo, milulu, ne bimanyishilu.

pambelu pa Ntempelo wa Illinois Nauvoo

Foto wa Ntempelo wa Illinois Nauvoo kudi Eve Tuft

Bimanyishilu

Mukalenga utu utamba kulongesha mu kuenzela bimanyishilu. Tshilejilu, ditambula—mu kubuela muinshi mua mayi ne kupatuka kabidi—bidi bu difua dieba dia muntu wa kala ne diledibua dieba dipiadipia (tangila Lomo 6:3–6). Milulu ya mu ntempelo idi ituala ku Yezu Kilisto ne Bupikudi Buenda. Bidi mua kuikala bikola bua kumvua bimanyishilu bionsu musangu wa kumpala paudi ubuela mu ntempelo, kadi udi mua kutungunuka ne kulonga paudi upingana ku ntempelo mu matuku a moyo weba.

Dianyisha dia Kubuela mu Ntempelo

Bua kubuela mu ntempelo, udi ne bua kuikala mudilongolola ne mukumbana. Udi mua kupeta dianyisha dia kubuela mu ntempelo kunyima kua muyuki ne muepiskopo anyi mulombodi mukulu wa ditamba anyi ne mulombodi mukulu wa dikunji nansha mulombodi mukulu wa bukenji beba. Balombodi aba nebakuela tshisumbu tshia nkonku bua kutuishibuabu ne udi wenzela lumu luimpa lua Yezu Kilisto. Balombodi beba badi mua kuyukila neba pa nkonku eyi kumpala kua diba.

Kupingana ku Ntempelo bua Bankambua Beba

Tatu wa mu Diûlu mmusua bua ne bana Benda benza bipungidi Nenda ne bapeta milulu ya tshijila. Milulu eyi, bu mudi ditambula ne diambika, idi ne bua kuenjibua mu ntempelo bua aba bakadi bafua kabayi bapeta lumu luimpa. Udi mua kupingana ku ntempelo bua kuenza milulu bua bidimba bia diku dieba bikadi bifua.

Peta bia Bungi

Balombodi beba ba tshikongu anyi ba ditamba nebakuambuluisha bua kudilongolola bua kubuela mu ntempelo. Udi mua kulonga kabidi pa ntempelo ku temples.ChurchofJesusChrist.org.

Bifumina ku Mifundu

Tudi ne bua kuikala ne bianza bitoka ne mitshima mikezuka bua kupeta mabenesha a ntempelo (tangila Misambu 24:3–5).

ntempelo udi muaba utudi mua kulonga ngikadilu ya Nzambi (tangila Yeshaya 2:2–3).

Miaku ya Kuvuluka

Diambika: mululu wa ntempelo mutudi tuenzela bipungidi ne Nzambi.

Buakuidi: bukola ne bukôkeshi bua Nzambi.

© 2023 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, December 2023. Language. 19049 760