“M̧aanjabpopo n̄an Deļo̧n̄e Tampeļ,” Liaona, Tij. 2023
Ennaan eo an Liaona Kajjojo Allōn̄, Tijem̧ba 2023
M̧aanjabpopo n̄an Deļo̧n̄e Tampeļ
Pija in Ogden Utah Tampeļ jān Mark Brunson
Ilo tampeļ ko an Kabun̄ eo an Jisōs Kraist im Armej ro Rekwojarjar ilo Raan Ko Āliktata jemaron̄ in bōk bujen ko rekwojarjar im kain̄i ko n̄an kōj make im rūtto ro jibūd im jim̧aad. Jej etal n̄an tampeļ eo n̄an kwaļo̧k ad iakwe im kam̧m̧oolol n̄an Jemedwōj Ilan̄ im Jisōs Kraist. Jemaron̄ in m̧aanjabpopo n̄an deļo̧n̄e tampeļ eo ilo ad ekkatak im mour kōn gospel eo an Jisōs Kraist. N̄an meļeļe ko reļļapļo̧k kōn tampeļ, lale bwebwenato jān Pedped in katak ko m̧oktata “Jerbal in Tampeļ” ilo kōnono eo an Oktoba 2021 Liaona.
Pija in Durban South Africa Temple jān Matthew Reier
M̧weo Im̧ōn Irooj
Tampeļ ko rej ņa etaer “m̧weo im̧ōn Irooj.” Rej jikin ko rekwojarjar me jemaron̄ en̄jake Jetōb eo an Anij im An iakwe n̄an kōj. Rej barāinwōt jikin ko me jemaron̄ kōm̧m̧an bujen ko im būki kain̄i ko raorōk me renaaj kepooj kōj n̄an bōk mour indeeo. (Bujen ko rej kallim̧ur ko ikōtaan Anij im ajri ro Nejin.) Ad tiljek n̄an bujen ko ad im būki kain̄i kein rekwojarjar rej jipan̄ kōj bōk juon jem̧jerā ejenolo̧k ippān Jemedwōj Ilan̄ im Jisōs Kraist.
Pija in Guayaquil Ecuador Tampeļ jān Janae Bingham
Wōn ro Remaron̄ Etal n̄an Tampeļ?
Membōr ro an Kabun̄ in remaron̄ kōm̧m̧ani kōpeptaij ko kōn ro remej ilo iiō eo rej erom̧ 12. Juon membōr emaron̄ bōk mennin letok kwojarjar eo eļan̄n̄e ļeo ak lio ej diktata 18, ekar membōr in Kabun̄ in diktata juon iiō, im ej kōņaan kōm̧m̧an im kōjparok bujen ko an tampeļ (lale Bok in Bōk Meļeļe: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 27.2.2, ChurchofJesusChrist.org). Juon em̧m̧aan ak juon kōrā eo em̧ōj an bōk mennin letok kwojarjar eo aer emaron̄ in liāp (m̧are) n̄an indeeo ilo tampeļ eo.
Bujen ko im Kain̄i ko
Kwonaaj kōm̧m̧an bujen ko im bōk kain̄i ko ilo tampeļ eo. “Reļo̧n̄e juon bujen ippān Anij ej kapen kōj n̄an E ilo juon wāween ekōm̧m̧an bwe aolep men ilo mour ren pidodo” (Russell M. Nelson, “Anjo̧ Ioon laļ n̄an Lo Ami Kakkije,” Liaona, Nob. 2022, 97). Juon kain̄i ej juon m̧akūtkūt ekwojarjar im ej kōm̧m̧an kōn mālim eo an priesthood eo. Kain̄i ko ewōr m̧wilaļ in meļeļein ilo jetōb. N̄an waanjon̄ak, n̄e kwoj bōk koņaam̧ ilo juon kain̄i, kwoj kwaļo̧k n̄an Anij bwe kwoj m̧ōņōņō in bōke im kōjparok bujen ko An.
Kōppopo eo Am̧ make
M̧aanjabpopo ilo jetōb n̄an ļoori katak ko an Jisōs Kraist im kōjparoki bujen ko kwaar kōm̧m̧ani ippān Anij ilo peptaij. Komaron̄ barāinwōt katak kein jipan̄ ko an Kabun̄ in, āinwōt jeje ko rekwojarjar im kōnono ko ilo kweilo̧k eo eļap. Temples.ChurchofJesusChrist.org ej letok meļeļe ko kōn ta eo kōtmāne n̄e kwoj etal n̄an tampeļ eo. Ebar āinwōt kitbuuj eļapļo̧k meļeļe ko kōn bujen ko an tampeļ, kain̄i ko, im kōkkaļļe ko.
Pija in Nauvoo Illinois Tampeļ jān Eve Tuft
Kōkkaļļe
Irooj emakijkij an katakin kōjerbal kōkkaļļe ko. N̄an waanjon̄ak, peptaij—tulo̧k ium̧win dān im bar wanlōn̄tak—ej āinwōt kwe eo m̧okta kwaar mej im kwe eo kokāāl em̧ōj am̧ bar ļotak (lale Rom 6:3–6). Kain̄i ko an tampeļ rej jitōn̄ļo̧k Jisōs Kraist im Pinmuur eo An. Emaron̄ in lukkuun pen meļeļe aolep kōkkaļļe ko jinoin am̧ deļo̧n̄e tampeļ eo, ak kwomaron̄ wōnm̧aanļo̧k ekkatak ilo am̧ jepļaakļo̧k n̄an tampeļ eo ilo aolepān am̧ mour.
Peba in Mālim n̄an Deļo̧n̄e Tampeļ
N̄an deļo̧n̄e tampeļ eo, kwoj aikuj in m̧aanjabpopo im erreo. Kwomaron̄ bōk juon am̧ peba in mālim n̄an deļo̧n̄e tampeļ eo ālkin am̧ intōrpiu ippān bisop eo ak branch būreejtōn eo im ippān stake ak mijen būreejtōn eo. Ritōl rein renaaj kajjitōk kajjitōk ko n̄an lukkuun lale n̄e kwoj mour kōn gospel eo an Jisōs Kraist. Ritōl ro am̧ remaron̄ in kōnono n̄an kwe kōn kajjitōk ko m̧oktaļo̧k jān am̧ intōrpiu.
Jepļaakļo̧k n̄an Tampeļ kōn Ro Jibum̧ im Jim̧m̧am̧
Jemedwōj Ilan̄ ej kōņaan bwe aolep ajri ro Nejin ren kōm̧m̧ani bujen ko Ippān im bōk kain̄i ko rekwojarjar. Kain̄i kein, āinwōt peptaij im mennin letok kwojarjar eo, rej aikuj in kōm̧m̧an ilo tampeļ ko kōn ro em̧ōj aer mej ilo aer kar jab bōk gospel eo. Komaron̄ jepļaakļo̧k n̄an tampeļ eo im kōm̧m̧ane kain̄i ko kōn ro uwaan baam̧le eo am̧ remej.
© 2023 by Intellectual Reserve, Inc. All rights reserved. Printed in USA. Kōmālim ilo kajin In̄lij: 6/19. Kōmālim ukook eo: 6/19. Ukook eo an Monthly Liahona Message, December 2023. Language. 19049 874