Ach Saram non ewe Fonu Pon

Seni Preseten Henry B. Eyring

Oruemonun Chon Aninis non ewe Aewin Presetensi

Ekkewe ra ennetin aneani ewe Puken Mormon, manaueni annukun, me iotek usun ennetin epwe mefi ewe Ngun mi Fel me napono ar nuku non, me pwarata usun, ewe Chon Amanau.

Pwan mwo nupwen ai emon chok anuon, a wor ai pwarata usun ewe Puken Mormon. Ua wesen sani porousen pwin Jared we me noun kewe aramas non ar sai ngeni “ewe fonuen pwon” (Ether 2:9).

Nupwen ra weri pwe repwene sai non mwoto ese saram non, pwin Jared we a tingor, “Nengeni, O Samon, kopwe mutata pwe aupwe saino won ei anonnonen matau non rochopwak? Iwe ewe Samon a apasa ngeni pwin Jared we, “Met ka mochen upwe fori pwe epwe tongeni wor ami saram non wami kewe mwota?” (Ether 2:22, 23).

Ewe pwin Jared a sinei pwe ewe Samon a fokkun uren manaman. A sinei pwe ewe Samon i ewe popunapen saram meinisin. A sinei pwe ewe Samon a annuku noun aramas repwe kokkori Itan nupwen fansoun mi namot. Iwe, a anganga nuku non ewe Samon, ewe pwin Jaren a amonnata 16 foukukunun fau. En mi chechemeni pwe a tingorei ewe Samon epwe atapa ekkewe fau won outun, “pwe repwe sarameno me non rochopwak” (Ether 3:4).

Ununun an ewe Samon we atapa ekkewe fau achok nom non ekieki seni chok ai ua keran annea ena tutunap. Ua tongeni kuna met a fis usun nge ita a fen fis me mwen mesei. Meni pokiten ewe ekiekin rochopwak a tongeni morono ren saram a fokkun ennet ngeni ei.

Nupwen use mefi ewe Ngun mi Fel, nupwen ua ekis tumunungaw ngeni Ngunun ewe Samon, ua mefi rochopwak. Nge nupwen ua aneani ewe Puken Mormon, ewe saram a niwinsefan. Me rei ewe Puken Mormon a fen usun eu saramen fau ewe samon a atapa. A asarama ai sai non ei manau.

Eu Saram Ese Much

Usun ekkewe ra feito seni poun ewe Samon me non ewe fonu Merika, sia weri sokkun wenuwon me rochopwak non ach sai ngeni ewe fonuen pwonen manau tekia. Nge ewe Samon epwe fori ngeni kich met A fori ngeni ekkewe chon Jared me ekkewe chon Nifai. Epwe emweni kich me asarama mwach—ika sia aneasosich Ngeni, anganga ach nuku non I, me tingor An aninis.

Ewe Samon a ereni Nifai, “Ngang upwe pwan noumi saram non ewe fonu pon; iwe ngang upwe amonnata ewe an mwemi, ika pwe ami oupwe aneasochisi ai kewe annuk; ina minne, non ukukun ami oupwe aneasochisi ai kewe annuk ami oupwe emmwen ngeni ewe fonuen pwon; me ami oupwe sinei pwe ami oua emmwen seniei.” (1 Nifai 17:13).

Ewe Samon a ereni pwin Nifai we Jacob, “Upwe eu saram ngenir tori fefeino, ion mi ousening ai kapas” (2 Nifai 10:14).

I ewe Chon Amanau, ewe soufos Abinadi a pwarata, “I ewe saram me ewe manauaen fonufan; ewer, eu saram ese much, pwe ese tongeni epwe chiwen rochopwak” (Mosaia 16:9).

Usun pwisin I, ewe Chon Amanau a pwarata, “Ngang ewe saram me ewe manauen fonufan.” A apachata, “Nengeni Ngang ewe saram; ua fen awora ew nenien appiru fan itemi” (3 Nifai 9:18; 18:16).

Mefi ewe Saram

Ua men tongei nouch we soufos, Preseten Russell M. Nelson. Ua men feioch ai fiti ne angang. Nupwen a fetanong non eu rum, ena rum a fokkun mwitir ne sarameno. A onomu ewe Saramen Kraist non i.

Ewe Saramen Kraist amen ennet. Eu “manamanen pochokun, manaman, ika tufich seni ewe Kot ngeni Kraist a ngeni kich manau me asarama mettoch meinisin.” Eu amwararen niffangen ngun minne a tongeni emweni noun Kot semirit ngeni ewe Ngun mi Fel me ewe kapas allimen Jises Kraist.¹ Aneani ewe Puken Mormon a apochokuna ena Saram.

Fan ekkoch a auchea sipwe nengensefaniti manauach me chechemeni ifa usun an anisi kich non ach sai. Nupwen sipwe nengensefaniti, sia tongeni mefi sefan manamanen ewe chon Amanau. Nupwen ekkewe pukefel ra apasa, “Chechemeni, chechemeni” (Ilaman 5:12), Ua ekieki nge ra kapas ngeni kich, “Kosap chok chechemeni met ka sinei ika mefi me akkom; nge, mefi sefan ena saram.”

Ren ekkoch, mefi saramen ngun a mecheres ne feito. Ren ekkoch, saramen ngun epwe weires ar repwe mefi pokiten an emon me emon riaffou ika orukoruken fonufan. Nge ika sia nukuchar, saram epwe feito—non fansoun minne sise kan tepereni.

Preseten Nelson, ewe a pesei kich sipwe “iotek ne kaeo ewe Puken Mormon iteiten ran,”² a aiti kich ekkoch anen ewe Puken Mormon epwe arapakanakich ngeni ewe Chon Amanau me anisi kich sipwe mefi saramen ewe kapas allim, sinei ewe ennet, me manaueni ewe kapas allim.

Nupwen sia anea ewe Puken Mormon, Preseten Nelson a apasa, ach weweiti, me kinisou ren, ewe Achasefanin Jises Kraist epwe napono.

sipwe fokkun mochen sipwe “upsefan” (Mosaia 27:25) nupwen ewe puk epwe anisi kich ne mefi eu ekkesiwinin netip (nengeni Mosaia 5:2).

Nupwen sia annea me kaeo afanafanen ewe Puken Mormon usun ochufengenin ewe imwen Israel, sipwe mefi eu waten mochenin sipwe kuta ach kewe mi mano me fori angangepinen amanau me manau tekia fan iter me non ewe tempel.

Sipwe mefi saram nupwen sia angei ponuwen ach kewe kapas eis, emwen ach fori met sia mochen, me pochokun ne aier me ungeni mi ngaw.

Me nupwen sipwe aneani ewe ennet non ewe Puken Mormon, sia mefi chikar, ourur, unusoch, aninis, pochokun, umoumoch, me pwapwa non manauach.³

“O ika epwe ina, esap ei mi ennet?” Alma a kapas eis usun ewe marinon, marin ewe iran ennet, tufichin sinei, me pwarata. “Ua apasa ngeni kemi, Ewer, pokiten mi saram; me met mi saram, mi och, pokiten mi weweoch, iei minne mi auchea pwe oupwe sinei pwe mi och” (Alma 32:35).

Sasingin Kraist, seni Heinrich Hofmann

Kuna ewe Chon Amanau non ewe Rochopwak

Nupwen chienei we Kamryn a 10 ierin, a tori eu semwen amen weires minne a efeiengawa taman mesan we efou me won ewe peniemwan.⁴ Fan ekkoch, nupwen metekin a fifis me weires, Kamryn ese tongeni epwe engino ngeni saram. Inan kewe me saman, ra fokkun noninen ika a chuun, rakan epetano asamochon ruman we an epwe kinamwe. Inen Kamryn we, Janna, a chemesafani:

“Ren ukukun ruanu maram mwirin an tori, Ua tonong non rumwan we amen unusen rochopwak. Nupwen ua ekis afatano mesei, Ua tongeni kuna Kamryn a kinumufengeni won an we pet. A fokkun weires ren metek ese tufichin epwe mwokut ika fen kechiw nupwen an rong ai ua tonong Achok kokon ikewe fan mesan kewe me ruefou amen pwo.

“Ua fotopwukutiw unukun an we pet, komochuno poun non pei, me fiei fan unungat—am mwonomwonen esisin ne apasa ‘Ai tong ngonuk.’ Iteitan ekan soun fiei pei fan ruanu esisinen ‘Ai tong ngonuk fan chommong,’ nge ese ponueni. A fokkun weires ren metekin. A fokkun nikasusur mesei, Ai nengeni sefan nei we ier 10 a fokkun kinumunum usun efou pwor. Netipei a riafou.”

Janna a iotek non mwonomwon, seni netipan.

“Ua ereni Semei won Nang pwe ngang mi sinei pwe I mi sinei met mi murino, nge ua iotek, ‘Kose mochen anisi.’ Nupwen ua mwomot ikewe ne iotek, eu memefin kinamwe a ponuweino. Ua fokkun kinamwe ai ekieki usun ewe Chon Amanau Jises Kraist a feito non ekieki: ‘I ewe saram. Kuta I non ewe kiroch.’”

Janna a chimweta me mwongunungununon non seningen Kamryn. “Kopwe kutta ewe Chon Amanau non ewe kiroch.“

Mwirin, Kamryn a onutono an ausening konupin me pukefel won ewe Mwichefen library app.

nengin mi tukutukuno mesan — Nupwen semwenin mesan kewe ra metekita, Kamryn a kutta ewe Chon Amanau non ewe kiroch.

Napengeni semwenin mesen Kamryn kewe mikan chok kinamwe, nge nupwen epwe riaffou ren metekin, Janna me punuwan we, Darrin, rakan ekinamwei me pachesefanieta panaket won asamwachon ruman we. Non ekkena fansoun amen kan metek, Kamryn a apasa, “ua chok kutta ewe Chon Amanau non ewe kiroch.”⁵

Nupwen manauach epwe usun “eu rochen me toputopun fonu” (1 Nifai 8:4), apwan auchea sipwe kutta ewe Chon Amanau non ewe kiroch. Ua pwarata pwe ewe Puken Mormon, ren an pwarata “pwe Jises I ewe Kraist, ewe Kot Ese Much,”⁶ epwe emweni kich ngeni I. Ua sinei pwe ion ra ennetin aneani ewe Puken Mormon, manaueni annukun, me ioteki usun ennetin epwe mefi ewe Ngun mi Fel me anapano an nuku non, me pwarata usun, ewe Chon Amanau.

Amwo sipwe pwarano ach kinisou rei ei puk mi “unusen pung”⁷ ren ach aneani, aucheani, me nounou an epwe apochokunano ach nuku me an ekkoch non ewe Saramen Fonufan.

© 2024 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porousen Liahona Iteiten Maram, January 2024. Language. 19273 901