“Hɛn kan wɔ Sardo,’’ Liahona, Sanda 2024
Bosoom bosoom Liahona Amandzɛɛbɔ, Sanda 2024
Hɛn Kan wɔ Sardo
Hɔn a nokwar mu ara wɔkenkan Mormon Nwoma no, dze ne mbra no bɔ bra, na wɔbɔ mpaa wɔ no nokwaryɛ ho no bɛtse Sunsum Krɔnkrɔn ne nkã na oetu hɔn gyedzi mpon wɔ, na hɔn dasee, wɔ Agyenkwa no ho.
Normandy Poulter yɛɛ Jared no nuabanyin a okitsa mboba a wɔhyerɛn mfonyin no
Ber a nna meyɛ banyimba no mpo, nna mowɔ dasegye wɔ Mormon Nwoma no ho. M’enyigye tsitsir ara kegyinaa Jared no nuabanyin na no nkorɔfo wɔ hɔn akwantu dze kɔ “anohoba asaase’’ do hɔnho asɛm do (Ether 2:9).
Ber a wokehyiaa dɛ wɔdze hɛmba a nkandzea nnyi mu tu kwan no, Jared no nuabanyin no bisaa dɛ, “Hwɛ, O Ewuradze, ana ebɛma yetwa nsu kɛse yi wɔ sum mu?’’ Oriyi ano no, Ewuradze see dɛ, “Ebɛnadze na hom pɛ dɛ meyɛ ma hom ama hom eenya kan wɔ hɛn yi mu?’’ (Ether 2:22, 23).
Nna Jared no nuabanyin nyim dɛ Ewuradze kitsa tum nyinara. Nna onyim dɛ Ewuradze nye kan nyinara ne farbaa. Nna onyim dɛ Ewuradze ahyɛ no nkorɔfo dɛ wɔmfrɛ No wɔ hia ber mu. Ntsi no, wɔdze gyedzi wɔ Ewuradze mu ridzi dwuma no, Jared no nuabanyin siesiee mboba nkakraba 16. Hom kaa dɛ nkyii ɔserɛɛ Ewuradze dɛ ɔmfa Ne nsatseaba nkã mboba no, “ama wɔhyerɛn wɔ sum mu’’ (Ether 3:4).
Ewuradze a ɔdze Ne nsa rekekã mboba no mfonyin no aka m’adwen do ofitsi ber a midzii kan kenkan asɛm no. Mutum hu dɛm ɔyɛkyerɛ no tse dɛ ma orisi wɔ m’enyim. Ebia siantsir no nye dɛ nna kan no a ɔrepam sum efi hɔ no no mfonyin no yɛ nokwar ma me.
Sɛ menntse Sunsum Krɔnkrɔn ne nkã, ber a maatwe moho kakra efi Ewuradze no Sunsum no ho a, metse sum nkã. Naaso sɛ mekenkan Mormon Nwoma no a, kan no san ba. Emi dze Mormon Nwoma no ayɛ tse dɛ boba a Ewuradze dze Ne nsa akã ma ɔhyerɛn. Ɔahyerɛn wɔ m’abrabɔ akwantu nyina mu.
Daapem Kan
Tse dɛ hɔn a Ewuradze nam Ne nsa do dze hɔn baa tsetse Americas no, hɛn nyinara yehyia ehum na nda a ɔyɛ sum wɔ hɛn akwantu ber mu dze kɔ nkwagye ntowdo anohoba asaase no do. Naaso Ewuradze bɛyɛ dza Ɔyɛe dze maa Jaredfo na Nephifo no ama hɛn. Ɔbɔweɔn hɛn na ɔahyerɛn hɛn kwan—sɛ yɛyɛ setsie ma No, yesie gyedzi wɔ No mu, na yɛtotɔserɛ No mboa a.
Ewuradze kãa kyerɛɛ Nephi dɛ, “Na mebɛyɛ hom kandzea so wɔ sar no do; na mibesiesie kwan wɔ hom enyim ama hom, sɛ ɔba dɛ hom dzi me mbrasɛm do a; dɛm ntsi, mbertsentsen biara a hom bedzi me mbrasɛm do no wɔdze hom bɔkɔ anohoba asaase no do; na hom bohu dɛ ɔnam mo do na wɔdze hom kɔree” (1 Nephi 17:13).
Ewuradze kãa kyerɛɛ Nephi no nuabanyin Jacob dɛ, “Mebɛyɛ kan ama hɔn a wotsie me nsɛm no, afebɔɔ’’ (2 Nephi 10:14).
Nkɔnhyɛnyi Abinadi gyee Agyenkwa noho dase dɛ, “Ɔno nye wiadze kan no na nkwa no; nyew, kan a onnyi ewiei, dɛ onnkodum da’’ (Mosiah 16:9).
Agyenkwa no gyee Ɔnoara Noho dase dɛ, “Emi nye wiadze kan nye nkwa no.’’ Ɔdze kãa ho dɛ, “Hwɛ Emi nye kan no; mayɛ fasusu ama hom’’ (3 Nephi 9:18; 18:16).
Ɔtse Kan ne Nkã
Modɔ hɛn nkɔnhyɛnyi, President Russell M. Nelson. Ɔayɛ nhyira ama me dɛ mosom wɔ ne nkyɛn. Sɛ ɔba dan mu a, ntsɛmara na dan no mu ahyerɛn. Ɔdze Christ ne Kan no nam.
Christ ne Kan no yɛ nokwar. Ɔno “nye ahoɔdzen, tum krɔnkrɔn, anaa nhyɛdo a ofi Nyankopɔn hɔ nam Christ do na ɔma ndzɛmba nyinara nkwa na kan.’’ Ɔyɛ sunsum mu akyɛdze a ɔsom bo a obotum egya Nyankopɔn ne mba akɔ Sunsum krɔnkrɔn na Jesus Christ n’asɛmpa no hɔ.1 Erekenkan Mormon Nwoma no hyɛ dɛm Kan no dzen.
Ɔtɔfabi a ohia dɛ yebu hɛn kɔn ekyir wɔ hɛn abrabɔ mu dze kaa mbrɛ yeesi yeenya mboa wɔ hɛn akwantu mu. Sɛ yebu hɛn kɔn ekyir a, yebotum aatse Agyenkwa no ne nhyɛdo nkã bio. Sɛ kyerɛwsɛm no kã dɛ, “Kaa, kaa’’ (Helaman 5:12), m’adwen nye dɛ wɔrekã akyerɛ hɛn dɛ, “Mma nnkaa dza nna inyim anaa itsee nkã pɛn ara: mbom, tse dɛm kan no ne nkã bio.’’
Binom dze, wɔretse sunsum mu kan nkã no ba ntsɛm. Binom so no, sunsum mu kan botum ayɛ dzen dɛ wobotum atse nkã osian ankorankor aperdzi anaa wiadze ndanenyi ahorow ntsi. Naaso sɛ yɛyɛ anokwafo a, kan bɛba—ɔtɔfabi a wɔ akwan a hɛn enyi nnda ho kwan mu.
President Nelson, a oetu hɛn fo dɛ “mpaabɔ mu ara yensũa Mormon Nwoma no dabiara,’’2 akyɛ akwan horow a Mormon Nwoma no botum dze hɛn abɛn Agyenkwa no yie na ɔaboa hɛn ma yɛatse asɛmpa kan nkã, yɛatar asɛmpa nokwar, na yɛdze asɛmpa nkyerɛkyerɛ no abɔ bra.
President Nelson kãa dɛ, sɛ yɛkenkan Mormon Nwoma no a, hɛn ntseasee wɔ Jesus Christ no Werdambɔ, na hɛn enyisɔ ma no no, benyin.
Yɛbɛtse nkã dɛ yeenya pɛ dɛ “wɔwo hɛn fofor’’ (Mosiah 27:25) osiandɛ nwoma no boa hɛn ma yenya akoma nsakyer (hwɛ Mosiah 5:2).
Sɛ yɛkenkan na yesũa Mormon Nwoma no ne nkyerɛkyerɛ fa Israel mboano ho a, yɛbɛtse nkã dɛ hɛn pɛ dɛ yɛbɔhwehwɛ hɛn ewufo na yɛayɛ nkwagye na nkwagye ntowdo ayɛdze horow ama hɔn wɔ temple no benyin.
Yɛbɛtse kan nkã ber a yenya hɛn nsɛmbisa ho nyiano, akwankyerɛ wɔ adwenpɔw bɔ mu, na ahoɔdzen dɛ yebonu hɛn ho na yeekwetsir bɔn.
Na sɛ yɛkenkan nokwar a yehu no wɔ Mormon Nwoma no mu a, yɛbɛtse ayarsa, awerɛkyekyer, nsanananmu, mboa, ahoɔdzen, awerɛhyɛmu, na enyigye ma hɛn kra nkã.3
“O nkyii, ana iyi nnyɛ nokwar?’’ Alma bisae a ɔfa no nokwar, nyimdzee, na dase aba nyeyeree na ne nyin ho. “Mese hom dɛ, Nyew, osiandɛ ɔyɛ kan; na adze biara a ɔyɛ kan no oye, osiandɛ ɔda edzi pefee, dɛm ntsi ɔsɛ dɛ hom hu dɛ oye’’ (Alma 32:35).
Christ no Mfonyin, Heinrich Hofmann yɛɛ nsaano mfonyin no
Hwehwɛ Agyenkwa no wɔ Sum no mu.
Mber a me nyɛnko Kamryn dzii mfe 10 no, onyaa enyiwa yarba bi a ɔkãa n’enyiwa nyimfa no duodoo mu a ɔannkɔ.4 Ɔtɔfabi na yaw a ɔdze ba no yɛ ntaataa do na onntum nnsɔw a, Kamryn nntum nnhwɛ kan biara. Nna n’awofo haw dɛ annyɛ n’enyiwa bofura no, wɔma a ne pia mu ntokura no yɛ etumtum dze bɔɔ mbɔdzen dɛ obenya ahotɔ. Janna, Kamryn ne maame, kaa dɛ:
“Ne yarba n’ekyir abosoom anan no, mokɔɔr ne dan sunkamm no mu. Ber a m’enyinwa saa no, muhun Kamryn dɛ ɔamoa no ho dɛ ba a ɔhyɛ yafun mu wɔ mpa no do. Nna ɔwɔ yaw mu dodoodow dɛ nna onntum nnkeka no ho anaa mpo oenntum ennsũ ber a ɔtsee dɛ maba hɔ. Nna ɔda hɔ ara dɛ n’enyiwa ebien no emuamua na wɔahohon.
“Mubuu ntwɛr wɔ ne mpa ho, dze ne nsa too medze mu, na memiaa no mpɛn ebiasa—hɛn nsumaamu ‘Modɔ wo’ sɛnkyerɛdze. Ɔtaa dɛ ɔbɛsan emia no mpɛn anan dze akyerɛ ‘Modɔ wo mbordo,’ naaso ɔanngye do. Nna ɔwɔ yaw dodoodow mu ankasa. Nyinsuwa nam m’afon ho no, mohwɛɛ nkyɛ mpɛn bi me mfe 10 ɔhyewbɔ ba a, ɔamoa dɛ bɔɔl. Awerɛhow kãa me.
Janna bɔɔ akoma bun mu mpaa, wɔ kommyɛ mu.
“Mekãe kyerɛɛ Ɔsor Egya dɛ minyim dɛ Onyim dza oye papaapa, naaso mobɔ mpaa dɛ, ‘Meserɛ boa no.’ Ber a nna metsena hɔ robɔ mpaa no, ayamuyie ahomka bi hyɛɛ mo do. Menyaa asomdwee ber a Agyenkwa Jesus Christ no ho adwendwen baa m’adwen mu dɛ: ‘Ɔno nye kan no. Hwehwɛ No wɔ sum no mu.’’
Janna maa ne tsir do na ɔwasaa guu Kamryn n’asowa mu dɛ: “Ɔwɔ dɛ ehwehwɛ Agyenkwa no wɔ sum no mu.’’
N’ekyir no, Kamryn dae a nna oritsie asɔr ndwom na kyerɛwsɛm no wɔ Asɔr nwoma korabea app. no do.
Sɛ n’enyiwa ne yarba no kɔ sor a, Kamryn hwehwɛ Agyenkwa no wɔ sum no mu.
Enyidzi mu ara Kamryn n’ebusua mfonyin
Mber dodow noara nna Kamryn ne yarba no da dzinn, naaso sɛ n’amandzehu no kɔ sor a, Janna na no kun, Darrin, kyekye no werɛ na bio no wɔdze nkuntu hata ne pia mu ntokura no do. Mber yaayaw mu no, Kamryn kã dɛ, “Morohwehwɛ Agyenkwa ara wɔ sum no mu.’’5
Sɛ ɔbra yɛ “kado wenwen’’ a (1 Nephi 8:4), yebehia so dɛ yɛhwehwɛ Agyenkwa no wɔ sum no mu. Megye dase dɛ Mormon Nwoma no a, ɔdze ne dasee “dɛ Jesus nye Christ no, Onnyiewiei Egya no,’’6 begya hɛn akɔ No hɔ. Minyim dɛ hɔn a nokwar mu ara wɔkenkan Mormon Nwoma no, no dze ne mbra no bɔ bra, na wɔbɔ mpaa wɔ no nokwaryɛ ho no bɛtse Sunsum Krɔnkrɔn ne nkã na oetu hɔn gyedzi mpon wɔ, na hɔn dasee, wɔ Agyenkwa no ho.
Hom mma yɛnkyerɛ ndaase ma nwoma yi a “ɔtsen dodow’’7 ber a yɛrekenkan, ɔsom hɛn bo, na yɛdze ridzi dwuma dze ahyɛ hɛn gyedzi dzen na nkaafo so hɔn gyedzi dzen wɔ Wiadze Kan mu no.
© 2024 odzi wɔ Intellectual Reserve, Inc.Wɔakora ho tumdzi nyinara. Wotsimtsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, Sanda 2024. ne nkyerɛaseeLanguage.19273 502