“Ang Aton Iwag sa Kamingawan” Liahona, Ene. 2024.
Bulanan nga Mensahe sa Liahona, Enero 2024
Ang Aton Iwag sa Kamingawan
Sila nga sinsero nga nagabasa sang Libro ni Mormon, nagapangabuhi sa iya sini mga pagsulundan, kag nagapangamuyo parte sa kamatuoran sini makabatyag sang Balaan nga Espiritu kag magadugang ang ila pagtuo sa, kag testimonya sa, Manluluwas.
Image of the brother of Jared with shining stones [Litrato sang Utod ni Jared upod sa nagabanaag nga mga bato] ni Normandy Poulter
Bisan sang bata pa ako, may ara ako sang testimonya parte sa Libro ni Mormon. Natandog gid ako sang istorya sang utod ni Jared kag sang iya katawhan sa ila pagbiyahe pakadto sa “duta nga ginpangako” (Eter 2:9)
Sang may makita nga kahigayonan sa pagbiyahe paagi sa wala suga nga mga barkasa, ang utod ni Jared nagpamangkot, “Yari karon, O Ginuo, tugutan mo bala nga tabukon namon ining dako nga tubig sa kadudulman?” Bilang sabat, ang Ginuo nagsiling, “Ano bala ang luyag ninyo nga himuon ko agud makaangkon kamo sing iwag sa inyo mga sakayan-dagat?” (Eter 2:22, 23).
Nahibal-an sang utod ni Jared nga ang Ginuo gamhanan sa tanan. Nahibal-an niya nga ang Ginuo ang ginhalinan sang tanan nga kasanag. Nahibal-an niya nga ang Ginuo nagsugo sa iya katawhan nga magpanawag sa Iya sa tion sang panginahanglan. Gani, nga ginapakita ang pagtuo sa Ginuo, ang utod ni Jared naghanda sang 16 ka magagmay nga bato. Madumduman ninyo nga iya dayon ginpangabay ang Ginuo nga tandugon sang Iya tudlo ang mga bato, “agud magabanaag ang mga ini sa kadudulman” (Eter 3:4).
Ang laragway sang Ginuo nga nagatandog sadtong mga bato nagtatak gid sa akon pamensaron sugod sang primero ko nga pagbasa sina nga istorya. Makit-an ko ina nga eksena nga dawsa nagakatabo ini sa akon mismo atubang. Ayhan bangod ina nga ang laragway sang kadudulman nga ginatabog sang kasanag matuod gid para sa akon.
Kon indi ko mabatyagan ang Balaan nga Espiritu, kon dawsa malayo ako sa Espiritu sang Ginuo, akon mabatyagan ang kadudulman. Apang kon magbasa ako sang Libro ni Mormon, ang kasanag nagabalik. Ang Libro ni Mormon nangin para sa akon isa ka nagabanaag nga bato nga gintandog sang Ginuo. Nagpasanag ini sa akon pagpanglakaton sa kabuhi.
Kapawa sa Katubtuban
Pareho sa ila nga gindala paagi sang kamot sang Ginuo sa dumaan nga mga Amerika, tanan kita nagaatubang sang mga problema kag kabudlayan padulong sa ginpangako nga pangkahitaasan. Apang himuon sang Ginuo sa aton ang ano man nga Iya ginhimo para sa mga Jarednon kag sa mga Nefinhon. Giyahan Niya kita kag iwagan ang aton dalan—kon magtuman kita sa Iya, magpakita sang pagtuo sa Iya, kag magpangabay sang Iya bulig.
Ang Ginuo nagsiling kay Nefi, “Kag ako man ang inyo mangin iwag sa kamingawan; kag ihanda ko ang alagyan sa inyo unahan, kon lamang tumanon ninyo ang akon mga kasuguan; gani, mientras tanto nga inyo tumanon ang akon mga kasuguan pagapangunahan kamo padulong sa duta nga ginpanaad; kag mahibal-an ninyo nga paagi sa akon nga kamo ginpangunahan” (1 Nefi 17:13).
Ginhambalan sang Ginuo ang utod ni Nefi nga si Jacob, “Ako ang mangin isa ka kapawa sa ila sa wala’y katubtuban, nga nagapamati sa akon mga pulong” (2 Nefi 10:14).
Parte sa Manluluwas, ang propetang Abinadi nagsaksi, “Sia ang kapawa kag ang kabuhi sang kalibutan; huo, isa ka kapawa nga nagapadayon, nga indi gid nga mas-a magdulom” (Mosias 16:9)
Parte sa Iya Kaugalingon, ang Manluluwas nagpamatuod, “Ako ang kapawa kag ang kabuhi sang kalibutan.” Sia nagpadayon, “Yari karon ako ang kapawa; nagpahamtang ako sang halimbawa para sa inyo” (3 Nefi 9:18; 18:16).
Nagabatyag sang Kasanag
Palangga ko ang aton propeta nga si Pangulong Russell M. Nelson. Ginbugayan ako nga makaserbisyo kaupod sia. Kon nagalakat sia sa isa ka lugar, inang lugar gilayon nga mas naganami sa pamatyagan. Dala niya sa iya kaugalingon ang Kapawa ni Cristo.
Ang Kapawa ni Cristo matuod. Ini “amo ang diosnon nga enerhiya, gahum, ukon impluwensya nga nagahalin sa Dios paagi kay Cristo nga nagahatag sang kabuhi kag kapawa sa tanan nga butang.” Isa ini ka ginapakamahal nga espirituhanon nga regalo nga sarang maggiya sang mga anak sang Dios sa Balaan nga Espiritu kag sa ebanghelyo ni Jesucristo.1 Ang pagbasa sang Libro ni Mormon nagapabaskog sinang Kapawa.
Kon kaisa, kinahanglan naton binagbinagon ang nagligad agud madumduman kon paano kita ginbuligan sa aton pagpanglakaton. Kon nagapamalandong kita, liwat naton mabatyagan ang impluwensya sang Maluluwas. Kon ang balaan nga mga kasulatan nagasiling, “Dumduma, dumduma” (Helaman 5:12), sa hunahuna ko ang mga ini nagasiling , “Indi lamang nga dumdumon ang sadto inyo natun-an kag nabatyagan; kundi, batyagon sa liwat inang kapawa.”
Para sa pila ka tawo, ang mabatyagan ang espirituhanon nga kapawa mahapos lang nga nagaabot. Para sa iban, ang espirituhanon nga kapawa mabudlay mabatyagan tungod sang personal nga mga kabudlayan ukon kalibutanon nga mga sablag. Pero kon matutom kita, ang kapawa magaabot—kon kis-a sa mga paagi nga wala naton ginapaabot.
Si Pangulong Nelson nga naglaygay sa aton nga “mainampuon nga tun-an ang Libro ni Mormon adlaw-adlaw,”2 nakigbahin sang madamo nga paagi nga ang Libro ni Mormon nagapapalapit sa aton sa Manluluwas kag nagabulig sa aton nga mabatyagan ang kapawa sang ebanghelyo, maintiendihan ang mga kamatuoran sang ebanghelyo, kag mapangabuhi ang mga panudlo sang ebanghelyo.
Kon basahon naton ang Libro ni Mormon, si Pangulong Nelson nagsiling, ang aton paghangop sa, kag pag-apresyar sa Pagbayad-sala ni Jesucristo magatubo.
Aton mabatyagan ang handum nga “mabun-ag liwat” (Mosias 27:25) kay ang libro nagabulig sa aton nga maeksperiensyahan ang pagbag-o sang tagipusuon (tan-awa sa Mosias 5:2).
Kon nagabasa kag nagatuon kita sa mga panudlo sang Libro ni Mormon parte sa pagtipon sang Israel, aton mabatyagan ang dugang nga handom nga pangitaon ang aton minatay kag hikuton ang mga ordinansa sang kaluwasan kag pagpahitaas para sa ila sa templo.
Mabatyagan naton ang kapawa kon nagabaton kita sang mga sabat sa aton mga pamangkot, giya sa paghimo sang mga desisyon, kag kabakod sa paghinulsol kag pagbato sa kalainan.
Kag kon kita nagabasa sang mga kamatuoran sa Libro ni Mormon, aton mabatyagan ang pag-ayo, kaumpawan, pagpanumbalik, pagsapopo, kabakod, paglugpay, kag kalipay sa aton kalag.3
“O nian, indi bala ini matuod-tuod?” Si Alma nagpamangkot parte sa pag-ulbo, pagtubo sang liso sang kamatuoran, ihibalo, kag testimonya. “Ginasiling ko sa inyo, Huo, sanglit ini kapawa; kag kon ano man ang kapawa, maayo, sanglit ini makita, gani pat-od gid nga inyo mahibal-an nga ini maayo” (Alma 32:35).
Christ’s Image [Imahe ni Cristo], ni Heinrich Hofmann
Pangitaa ang Manluluwas sa Kadudulman
Sang ang akon abyan nga si Kamryn nagaedad 10 anyos, natapikan sia sing pinasahi pero permanente nga balatian sa mata nga nag-impeksyon sang cornea sang iya natuo nga mata.4 Kon kaisa, sa mga tinion nga ang naangot nga kasakit nagsigesige kag indi na maagwanta, si Kamryn indi na makabatas sang kasanag. Ang iya mga ginikanan, kay nagakabalaka nga basi mabulag sia, ginapadulom ang mga bintana sang iya kuwarto agud tinguhaan sia nga mangin komportable. Si Janna, iloy ni Kamryn, naghinumdum:
“Pagkatapos sang anom ka bulan sang iya diagnosis, nagsulod ako sa iya madulom nga kuwarto. Sang nag-adjust na ang akon mga mata, nakita ko si Kamryn nga nagabarikutot sa iya hiligdaan. Grabe gid ang iya sakit nga wala gid sia bisan naggiho ukon naghibi sang iya nabatian nga nagapasulod ako. Nagahigda lang sia didto nga nagapiyong ang duha ka mata sa pagpalanghubag.
“Nagluhod ako sa kilid sang iya hiligdaan, ginkuha ang iya kamot, kag ginpisga ini makatlo ka beses—ang amon sekreto nga code para sa ‘Palangga ta ka.’ Kalabanan nagapisga sia balik sing apat ka beses para sa ‘mas palangga ta ka,’ pero wala sia nagbalos. Grabe gid ang iya pasakit. Nga nagatinulo ang mga luha sa akon mga guya, gintulok ko ang akon anay mapagsik nga 10 anyos nga bata nga nagabarikutot. Ginsuboan gid ako.”
Si Janna nagpangamuyo sing hanuot kag mahipos.
“Ginhambalan ko ang Amay nga Langitnon nga Sia ang nakahibalo sang pinakamaayo, pero nagpangabay ako, ‘Palihog, buligi sia.’ Samtang nagapungko ako didto nga nagapangamuyo, nakabatyag ako sang kaumpawan. Nakabatyag ako sang katawhay sang akon madumduman ang parte sa Manluluwas nga si Jesucristo: ‘Sia ang iwag. Pangitaa Sia sa kadudulman.’”
Gin-alsa ni Janna ang iya ulo kag naghutik sa dulunggan ni Kamryn: “Pangitaa ang Manluluwas sa kadudulman.”
Pagkatapos, natulogan si Kamryn nga nagpamati sang mga himno kag balaan nga mga kasulatan sa library app sang Simbahan.
Kon nagalubha ang impeksyon sang iya mata, ginapangita ni Kamryn ang Manluluwas sa kadudulman.
Litrato nga ginhatag sang pamilya ni Kamryn
Ang balatian ni Kamryn sa masami indi aktibo, pero kon nagalubha gani, ginapaumpawan sia ni Janna kag sang iya bana nga si Darrin kag ginabutangan naman liwat sang mga habol ang mga bintana sa iya kuwarto. Sa sulod sadtong mga tinion, si Kamryn nagsiling, “Ginapangita ko lang ang Manluluwas sa kadudulman.”5
Kon ang kabuhi dawsa “isa ka madulom kag mapung-aw nga kamingawan” (1 Nefi 8:4), pwede man naton pangitaon ang Manluluwas sa kadudulman. Nagasaksi ako nga ang Libro ni Mormon, nga may pagsaksi “nga si Jesus amo ang Cristo, ang Wala Katapusan nga Dios,”6 magagiya sa aton pakadto sa Iya. Nahibal-an ko nga sila nga nagabasa sang Libro ni Mormon, nagapangabuhi suno sa iya sini mga pagsulundan, kag nagapangamuyo parte sa pagkamatuod sini makabatyag sang Balaan nga Espiritu kag magadako ang ila pagtuo sa, kag testimonya sa Manluluwas.
Kabay nga magpakita kita sang kapasalamatan sa sining “pinakahusto” nga libro7 paagi sa pagbasa sini, pagpakamahal sini, kag paggamit sini agud magpabakod sang aton pagtuo kag sang pagtuo sang iban nga tawo sa Kasanag sang Kalibutan.
© 2024 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, January 2024. Language. 19273 861