“Ti Silawtayo iti Langalang,” Liahona, Ene. 2024.
Binulan a Mensahe iti Liahona , Enero 2024
Ti Silawtayo iti Langalang
Dagiti sipupudno a mangbasa iti Libro ni Mormon, agbiag a maitunos kadagiti bilinna, ken agkararag maipapan iti kinapudnona ket mariknadanto ti Espiritu Santo ken pumigsanto ti pammatida iti, ken pammaneknekda iti Mangisalakan.
Ladawan ti kabsat ni Jared nga addaan kadagiti agrimrimat a bato ni Normandy Poulter
Uray idi ubingak pay, adda pammaneknekko iti Libro ni Mormon. Nangnangruna a naallukoy ti riknak iti estoria ti kabsat ni Jared ken dagiti taona iti panagdaliasatda iti “naikari a daga” (Ether 2:9).
Idi naipasango iti manamnama a panagdaliasat kadagiti di nasilawan a barko, sinaludsod ti kabsat ni Jared, “Adtoy, O Apo, ipalubosmo kadi a daliasatenmi daytoy dakkel a danum iti kasipngetan?” Kas sungbat, kinuna ti Apo, “Ania ti kayatmo nga aramidek tapno maaddaankayo iti silaw kadagiti sasakayanyo?” (Ether 2:22, 23).
Ammo ti kabsat ni Jared a mannakabalin-amin ti Apo. Ammona a ti Apo ti gubuayan ti amin a lawag. Ammona a binilin ti Apo dagiti taona nga umawag Kenkuana iti panawen ti panagkasapulan. Gapuna, iti panangipakatna iti pammatina iti Apo, nangisagana ti kabsat ni Jared iti 16 a babassit a bato. Malagipyo a kiniddawna idin iti Apo a sagidenna dagiti bato babaen ti ramayna, “tapno agrimatda iti kasipngetan” (Ether 3:4).
Naikitikit iti panunotko ti ladawan ti Apo a mangsagsagid kadagidiay a bato sipud pay idi damo a nabasak dayta nga estoria. Makitak dayta nga eksena a kasla mapaspasamak iti imatangko. Nalabit dayta ket gapu ta pudno kaniak ti ladawan a ti sipnget ket mapukaw babaen ti lawag.
No diak marikna ti Espiritu Santo, no medio out of tune-ak iti Espiritu ti Apo, mariknak ti kinasipnget. Ngem no basaek ti Libro ni Mormon, agsubli ti lawag. Ti Libro ni Mormon para kaniak ket kas iti agrimrimat a bato a sinagid ti Apo. Sinilawanna ti panagdaliasatko iti biag.
Maysa a Silaw iti Agnanayon
Kas kadagiti inyeg ti ima ti Apo kadagiti nagkauna nga America, maipasangotayo amin kadagiti bagyo ken nasipnget nga aldaw bayat ti panagdaliasattayo iti naikari a daga ti pannakaitan-ok. Ngem aramiden ti Apo kadatayo no ania ti inaramidna kadagiti Jaredite ken Nephite. Iwanwannatayo ken silawanna ti dalantayo—no agtungpaltayo Kenkuana, ipakitatayo ti pammati Kenkuana, ken agpakaasitayo iti tulongna.
Imbaga ti Apo ken ni Nephi, “Ket siakto met ti silawyo iti langalang; ket isaganak ti dalan a pagnaanyo no tungpalenyo la ketdi dagiti bilinko; gapuna, no tungpalenyo la ketdi dagiti bilinko, iturongkayonto iti naikari a daga; ket ammuenyonto a naiturongkayo gapu kaniak” (1 Nephi 17:13).
Kinuna ti Apo ken ni Jacob a kabsat ni Nephi, “Siakto ti agnanayon a silawda, a dumngeg kadagiti balikasko” (2 Nephi 10:14).
Maipapan iti Mangisalakan, nasaksian ni propeta Abinadi nga, “Isu ti silaw ken biag ti lubong; wen, silaw nga awan inggana, a saan a pulos a mapasipnget” (Mosiah 16:9).
Ti mismo a Mangisalakan pinaneknekanna, “Siak ti silaw ken ti biag ti lubong.” Innayonna, “Adtoy siak ti silaw; nangaramidak iti pagulidananyo” (3 Nephi 9:18; 18:16).
Panangrikna iti Lawag
Ay-ayatek ti propetatayo, ni Presidente Russell M. Nelson. Naaddaanak iti pribilehio nga agserbi iti sibayna. No sumrek iti maysa a siled, dagus a rumaniag dayta a siled. Adda kenkuana ti Silaw ni Cristo.
Pudno ti Silaw ni Cristo. Daytoy ti “nadiosan nga enerhia, pannakabalin, wenno impluensia nga agtaud iti Dios babaen ken Kristo ken mangted iti biag ken lawag iti amin a banag.” Maysa daytoy a napateg a naespirituan a sagut a mangiturong kadagiti annak ti Dios iti Espiritu Santo ken iti ebanghelio ni Jesucristo.1 Ti panagbasa iti Libro ni Mormon ket mangpapigsa iti dayta a Silaw.
No dadduma, masapul a lagipentayo ti napalabas iti biagtayo tapno malagiptayo no kasano a natulongannatayo iti panagdaliasattayo Bayat ti pananglagiptayo iti napalabas, mariknatayo manen ti impluensia ti Mangisalakan. No kunaen dagiti nasantuan a kasuratan, “Laglagipenyo, laglagipenyo” (Helaman 5:12), panagkunak ibagbagada kadatayo, “Saanyo laeng a laglagipen ti naammuanyo wenno nariknayo idi; imbes ketdi, mariknayo manen dayta a lawag.”
Para iti dadduma, nalaka laeng a mariknada ti naespirituan a lawag. Para kadagiti sabsabali, mabalin a narigat a marikna ti naespirituan a lawag gapu kadagiti personal a panagrigat wenno nailubongan a pakasingaan. Ngem no napudnotayo, dumtengto ti lawag—no dadduma kadagiti wagas a ditay namnamaen.
Ni Presidente Nelson, a nangbalakad kadatayo a, “ti nainkararagan a panangadal iti Libro ni Mormon iti inaldaw,”2 ket nangibinglay iti sumagmamano a wagas a ti Libro ni Mormon ti mangyasideg kadatayo iti Mangisalakan ken tumulong kadatayo a mangrikna iti lawag ti ebanghelio, mangtarus kadagiti kinapudno ti ebanghelio, ken agbiag kadagiti pannursuro ti ebanghelio.
Bayat ti panangbasbasatayo iti Libro ni Mormon, kinuna ni Presidente Nelson, dumakkel ti pannakaawattayo iti, ken panangdayawtayo iti, Pannubbot ni Jesucristo.
Mariknatayto ti tarigagay a “maipasngay manen” (Mosiah 27:25) bayat a tulongannatayo ti libro a mangpadas iti panagbalbaliw iti pusotayo (kitaen iti Mosiah 5:2).
Bayat ti panangbasa ken panangadaltayo kadagiti pannursuro ti Libro ni Mormon maipapan iti pannakaummong ti Israel, mariknatayo a mapadakkel ti tarigagaytayo a mangsapul kadagiti kapuonantayo ken mangaramid kadagiti ordinansa ti pannakaisalakan ken pannakaitan-ok para kadakuada iti templo.
Mariknatayo ti lawag bayat a magun-odtayo dagiti sungbat kadagiti saludsodtayo, panangiwanwan iti panagaramid iti pangngeddeng, ken pigsa nga agbabawi ken mangsaranget iti dakes.
Ket bayat ti panangbasatayo kadagiti kinapudno a masarakan iti Libro ni Mormon, mariknatayo ti pannakapaimbag, liwliwa, pannakaisubli, tulong, pigsa, ken panagrag-o iti kararuatayo.3
“O, no kasta, saan kadi a pudno daytoy?” Sinaludsod ni Alma maipapan iti dumakdakkel, agtubtubo a bukel ti kinapudno, pannakaammo, ken pammaneknek. “Kunak kadakayo, Wen, agsipud ta silaw daytoy; ket nasayaat ti uray ania a silaw, agsipud ta mailasin, ngarud, masapul nga ammuenyo a nasayaat daytoy” (Alma 32:35).
Ladawan ni Cristo, ni Heinrich Hofmann
Sapulen ti Mangisalakan iti Kasipngetan
Idi agtawen iti 10 ti gayyemko a ni Kamryn, naaddaan iti manmano ngem permanente a sakit ti mata a nangapektar iti kornea ti makannawan a matana.4 No dadduma, no kanayon ken nakaro unay ti nainaig nga ut-ot, saan a maibturan ni Kamryn ti aniaman a lawag. Dagiti dadakkelna, madandanaganda ta baka mabalin a mabulsek isuna, isu a kalubanda nukwa dagiti tawa ti kuartona tapno komportable isuna. Nalagip ti ina ni Kamryn a ni Janna:
“Agarup uppat a bulan kalpasan ti pannakadayagnosna, simrekak iti nasipnget a siledna. Bayat ti panag-adjust dagiti matak, makitak ni Kamryn a nakaidda iti posision nga umasping iti maladaga iti pagiddaanna. Kasta unay ti ut-ot a marikriknana isu a di man la nagkuti wenno uray nagsangit idi mangngegna ti iseserrekko. Nagidda laeng sadiay a nakakidem dagiti agpada a limteg a matana.
“Nagparintumengak iti abay ti pagiddaanna, innalak ti imana, ket namitlo nga inpis-itko dayta—ti nalimed a kodigomi para iti ‘Ay-ayatenka.’ Gagangay a pis-itenna met iti mamimpat a daras para iti ‘Ay-ayatenka a nangnangruna,’ ngem saan a simmungbat. Kasta unay ti ut-ot a marikriknana. Bayat nga agluluaak, kinitak ti dati a napigsa a 10 ti tawenna nga anakko a kasla nakulkol iti maysa a bola. Naladingitanak unay.”
Nagkararag ni Janna iti naulimek ken naimpusuan.
“Imbagak iti Nailangitan nga Ama nga ammok nga ammona ti kasayaatan, ngem inkararagko, ‘Tulonganyo koma isuna.’ Bayat ti panagtugawko sadiay nga agkarkararag, naaddaanak iti nabara ken nagin-awa a rikna. Nariknak ti talna idi napanunotko ti maipapan iti Mangisalakan a ni Jesucristo: ‘Isu ti silaw. Sapulem Isuna iti kasipngetan.’”
Inngato ni Janna ti ulona ket inyarasaasna iti lapayag ni Kamryn: “Nasken a sapulem ti Mangisalakan iti kasipngetan.”
Kalpasanna, naturog ni Kamryn a dumdumngeg kadagiti himno ken nasantuan a kasuratan iti Church library app.
Idi kimmaro ti impeksion ti matana, nasarakan ni Kamryn ti Mangisalakan iti kasipngetan.
Retrato nga inted ti pamilia ni Kamryn
Ti sakit ni Kamryn ket saan nga aktibo iti kaaduan a tiempo, ngem no agsakit manen, liwliwaen ni Janna ken ni lakayna a Darrin ket mangikabilda manen iti kubrekama kadagiti tawa ti kuartona. Bayat dagita a nasaem a panawen, kuna ni Kamryn, “Masapulak laeng ti Mangisalakan iti kasipngetan.”5
No ti biag kasla “ti nasipnget ken nakaal-alingget a langalang” (1 Nephi 8:4), mabalin a kasapulan met a birokentayo ti Mangisalakan iti kasipngetan. Paneknekak a ti Libro ni Mormon, karaman ti panangsaksina “a ni Jesus isu ti Cristo, ti Agnanayon a Dios,”6 ti mangiturong kadatayo Kenkuana. Ammok a dagiti sipupudno a mangbasa iti Libro ni Mormon, agbiag a maitunos kadagiti bilinna, ken agkararag maipapan iti kinapudnona ket mariknadanto ti Espiritu Santo ken pumigsanto ti pammatida iti, ken pammaneknekda iti Mangisalakan.
Sapay koma ta ipakitatayo ti panagyamantayo iti daytoy “kalintegan” a libro7 babaen ti panangbasa iti daytoy, panangipateg iti daytoy, ken panangusar iti daytoy a mangpapigsa iti pammatitayo ken ti pammati dagiti dadduma iti Silaw ti Lubong.
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, January 2024. Language. 19273 864