“Kahlwem Lasr ke Yen Mwesis,” Liahona, Jan. 2024.
Pweng ke Liahona Mahlwem Nuhkwewa, Jacnweri 2024
Kahlwem Lasr ke Yen Mwesis
Elos suc sang kewa insiac in riti Puk luhn Mormon, ac moulkihn masap kac, ac pruhe ke pwacye la uh fah puhla Nguhn Muhtahl ac ahkfokokoyelah luhlahlfongi lalos, ac loh ke, Mwet Lahngo.
Petsac ke tamuhlwel lal Jared wi yot sahromrom sel Normandy Poulter
Finne oacna sie tuhlihk mukul fuhsr, tuh asr testimoni luhk ke Puk luhn Mormon. Nga tuh lihksreni na loacng nuhke sramsram soko ke tamuhlwel lal Jared ac mwet lal ke fuhfahsryucsr lalos nuhke sie “facl in wuhlweacng” ( Ether 2:9).
Ke elos sun elyah ke fuhfahsryucsr lalos fin oak inge, tamuhlwel lal Jared el siuck, “Liye, O Leum, yac Kom ac lwelah tuh kuht in sahslah ke meoa luhhlahp se inge fin lohsr?” Topukyac, Leum El fahk, “Meac kom kena tuh Nga in oruh tuh in oasr kahlwem ke oak okowos?” (Ether 2:22, 23).
Tamuhlwel lal Jared el etuh lah yohklacna kuh luhn Leum. El etuh lah Leum pa muhtwacweyen kahlem nuhkwewa. El etuh lah Leum el sapkihn nuh sin mwet Lal in pahng nuh Sel ke pacl in enenuh. Na, orekmakihn luhlahlfongi in Leum, tamuhlwel lal Jared ahkolah yot srihsrihk 16. Kom esam lah el siyuck sin Leum elan kahlyac yot inge ke kufun Pahol , “tuh elos fah kuh in kahlmwelihk in lohsr uh” Ether 3:4).
Petsac se ke Leum el kahlyac yot inge sremlah insifuck pacl se met nga riti sramsram soko inge ah. Nga kuh in liye mukuikui sac oacna in sikyak na ye muhtuhk. Sahp mweyen petsac se ke lohsr ah aholyucklac nuhke kahlwem nga muh pwacye.
Ke pacl nga tiac puhla Nguhn Muhtahl, ke pacl nga luhman loesaclihk nuhke nguhn luhn Leum, nga puhla lohsr. Tuhsruhk ke nga riti Puk luhn Mormon, kahlwem sac fohlohkoh. Puk luhn Mormon el nuh sihk oacna sie yot sahromrom kahlyucki sin Leum. El tohlwack moul in fuhfahsryucsr luhk.
El Kahlem Ma Pahtpaht
Oacpacna elos ma utuckuh ke poun Leum nuhke acn Macrike mahtuh, kuht nuhkwewa sun pahkah ac lohsr luhn lwen ke kuht fuhfahsryucsr nuhke facl in wuhlweacng luhn God ma pahtpaht. Tuhsruhk God Elac fah oruh nuh sesr ma El oruh nuh sin mwet Jared ac mwet Nephi. El fah pen kuht ac tol inkacnek lasr—kuht fin Ahksol, ahkpahye luhlahlfongi lasr in El, ac kwacfe ke kahsruh Lal.
Leum El fahk nuh sel Nephi, “Nga fah oacyacpac kahlwem lowos yen mwesis; ac Nga fah ahkolah inkacnek lowos ye motowos, kowos fin liyacacng na masap Luhk; ohinge, yohkna ke kowos fah liyacacng masap Luhk uh kowos fah kolyucklac nuh ke facl in wuhlweacng; ac kowos fah etuh lah kowos kolyuck Sihk” ( 1 Nephi 17:13).
Leum El fahk nuh sel Jacob tamuhlwel lal Nephi, “Nga fah sie kahlwem nuh selos ne tok ma pahtpaht, suc lohng kahs Luhk” ( 2 Nephi 10:14).
Ke Mwet Lahngo, mwet pahluh Abinadi el fahkwack luhlahlfongi lah, “El pa kahlwem ac moul luhn facluh; ahok, sie kahlem ma wacngihn sahflahyiac, ma tiac kuh in lohsrlah” ( Mosiah 16:9).
Kacl Sifacna, Leum E fackwack, “Nga pa kahlwem sac ac moul luhn facluh.” El tahfwelah, “Liye Nga pa kahlwem sac; Nga oakiyac sie mwe srihkasrak nuh suwos”( 3 Nephi 9:18; 18:16).
Puhla Kahlwem se
Nga luhngse mwet pahluh lasr uh, Prestuhn Russell M Nelson. Mwe insewowo se luhk in kuhlwacnsap siskacl. Ke el utyak nuh ke sie infuckihl, infuckihl sac kahlmwelihk ke na kihtin pacl ah. El us kahlwem luhhn Kraist weluhl.
Kahlwem luhn Kraist el pwacye. El “pa kuh wolacna sac, kuhlacna, kuh ohiac ma tuhkuh sin God ke Kraist ac use kahlwem ac moul nuh sin ma nuhkwewa.” El mwe sang kawihl ke nguhn ma kuh in kol tuhlihk nuhtin God nuh sin Nguhn Muhtahl ac wosasuc luhn Jisus Kraist.1 Riti Puk luhn Mormon ahkkeye Kahlwem sac.
Kutuh pacl uh kuht enenuh in tahpuhllac liye moul lasr ac esam lah kahsruh fuhkah kuht eis ke fuhfahsryucsr lasr ah. Ke kuht tahpuhllac, kuht kuh in sulpac puhla orekma luhn Leum. Ke ma suhmuhslah fahk,“Esam, esam” ( Helaman 5:12), Nga nuhnkuh tuh eltahl fahk nuh sesr, “Nikmet esam muhkwena ma kom etuh kuh puhla tari; uh in, sulpac puhla kahlwem sac.”
Nuh sin kuhtuh, puhla ke kahlwem luhn nguhn tuhkuh arlac fihsracsr. Nuh sin kuhtuh sahyac, mwe sang luhn nguhn sahp ac upac in puhlweyuck ke srihpen upacien moul lom kuh ma lusrohngtwen luhn facluh. Tuhsruhk kuht fin oaru, kahlwem sac fah tuhkuh—ke pacl in ohiac ma kuht tiac motko.
Prestuhn Nelson, suc luti nuh sesr in “lutlut ke Puk luhn Mormon ke pruhe lwen nuhkwewa,” 2 ahkuhtweyac kuhtuh inkacnek Puk luhn Mormon kuh in us kuht fototo nuh sin Leum ac kahsre kuht in puhla kahlwem ke wosasuc, ac sruokyac ma pwacye ke wosasuc, ac moulkihn luti luhn wosasuc.
Ke kuht riti Puk luhn Mormon, Prestuhn Nelson el fahk, ma kuht etwaclah kac uh, ac srui lasr kac, Iwaclah luhn Jisus Kraist fah yohkwelihk.
Kuht ac fah puhla ke “sifil pac isuslac” se Mosaiah 27:25 oacna ke puk se inge kasrwe kuht in puhla eklac luhn insiacsr (liye Mosaiah 5:2).
Ke kuht rit ac lutlut ke mwe luti ke Puk luhn Mormon ke fohlohkweni luhn Israel, kuht ac puhlakihn yohkwelihk kena lasr in suk tukun mwet misac lasr ac oraclah akwuck in molwelah ac engan ma pahtpaht nuh selos lun tempuhl.
Kuht ac puhla muhlahlah ke kuht eis top nuhke siyuck lasr, kol in orek sulaclah, ac ahkkweye in auliak ac lain ma koluk.
Ac ke kuht riti ma pwacye konweyuckyak lun Puk luhn Mormon, kuht ac puhla kwelac, inse mislac, fohlohkyak, kahsruh,kuh,ahkkweye, ac kaksakihn moul lasr.3
“O na, yac ma inge tiac pwacye?” Kihsen siyuck lal Alma ah ma nuhke yohkwelihk, kapkapwack fihtac pwacye, lahlmwetmwet ac testimoni. “Nga fahk nuh suwos, Ahok, ke srihpen kahlwem, ac ma suc kahlwem uh, wo, ke srihpen kuh in etweyuck lah wo kuh koluk, ke ma inge kowos enenuh in etuh lah wo” (Alma 32:35).
Atacl Kraist, sel Heinrich Hofmann
Suk Leum ke acn Lohsr
Ke kawuck se luhk Kamryn el yac singucul matwac, el oracack mas se ke muhtahl ke lusen pacl fototo se ma kantweack lwacyen lacyot ke ahtron muhtahl. 4 Kuhtuh pacl, ke ngal asr inge tuhkuh fusus ac koflah kutongyucki, Kamryn el koflah puhla kuhtwena kahlwem. Ninac pahpah tuhmwacl, fosrngah muh elac kuh in sulohngohnlah, eltahl ke ahklohsryelah infuckihl in mutul lal ah ac srihke oruh lacn puhla wo. Nina kiacl Kamryn, Janna, el esamwack:
“Sahp mahlwem ahkosr ma tukun sukokyak mas se lal inge, Nga utyak nuhke rum lohsr se lal ah. Ke muhtuhk ikackwelihk ac, Nga kuh in liyacl Kamryn kuhrweni oacna kain se ke ahwowo lin siacn ninac an fin bed kiacl ah. El puhla ngal upac oruh el tiac mukuikui kuh finne tuhng ke el lohng nga utyak ah. El an na insac muhtahl kwewana kauli.
“Nga sikuck muhtuhnte yak sisken bed lal ah, fihliac pahol in pouk, ac ise pacl tolu—kot sain lukme se lasr nuhke ‘Nga luhngse kom.’ Pacl nuhkwewa elac ise fohlohk pacl ahkosr muh ‘Nga luhngse kom yohk,’ tuhsruh el tiacna topuk. El puhla ngal upac. Ke sronin muhtuhk sohrohr nuhke lihkihn tuhpuhk, Nga ngetwacng nuh sin tuhlihk muhtwacn fokoko se nuhtihk yac- singucul kuhrweni nuhke sie ball. Muhsahllah insiuck.”
Janna el kahkahsrihk, pruhe ke insiacl.
“Nga fahk nuh sin Pahpah Inkuhsrao lah nga etuh lah El etuh yohk, tuhsruhk nga pruhe fahk, ‘Nuhnak muhnahs kahsrel.’ Ke nga muhta insac pruhe, noa na fucsrfucsr se afihnyuclac. Nga puhla mislac ke nuhnak se kacl Jisus Kraist tuhkuh nuh in mwe nuhnak luhk: ‘El pa kahlwem sac. Sokol ke acn lohsr.’”
Janna el sruhkwack sifacl nuh lucng ac mahmah nuh insroacl Kamryn: “Kom enenuh in sokol Leum ke acn lohsr.”
Tohkoh yang, Kamryn el mutullac lohngyuck on ac ma suhmuhslah ke Church library app.
Ke mas luhn muhtahl tuhkuh, Kamryn el sokol Leum ke acn lohsr.
Petsaciyucklac ke kuhlwacng luhn sucu lal Kamryn
Mas lal Kamryn uh asr inkaiyen pacl uh, tuhsruhk ke el keok ke pacl upaclac uh, Jana ac mukul tuhmwacl, Darrin, ahkwoye ac fihliac kahot luhlahp afinyac winto ke infuckihl lal ah. Ke puhluhn pacl upac sac, Kamryn el fahk, “Ngwac sokol na Leum ke acn lohsr ah.”5
Ke moul uh oacna “sie in imac lohsr ac suhpwacr” (1 Nephi 8:4), kuht oacyacpac enenuh in sokol Leum ke acn lohsr. Nga ahkpwacye lah Puk luhn Mormon, ke loh lal “lah Jisus pa Kraist, God Ma Pahtpaht,” 6 fah kol kuht nuh Yohrohl. Nga etuh lah elos suc inse pwacye in riti Puk lun Mormon, moulkihn ma sap, ac pruhe ke ma pwacye kac fah puhla Nguhn Muhtahl ac ahkyohkye luhlahlfongi lalos, ac fahkwack ke, Mwet Lahngo.
Lelah kuht in ahkkahlwemye kaksak lasr ke puk “pwacye emet” se inge ke kuht riti, sacohk kihn, ac orekmakihn in ahkkweye luhlahlfongi lasr ac luhlahlfongi luhn kuhtuh pac sahyac nuhke Kahlwem luhn Facluh.
© 2024 sin Intellectual Reserve, Inc. Suwohs nuhkewa fihliyucki. Printiyucki fin acn USA. Ahkkweyeyucklac nuh ke Englishg: 6/19. Ahkkweyeyucklac ke lweng: 6/19. Lweng nuhke Pweng ke Mahlwem nuhkwewa Liahona, Jacnweri 2024.Language. 19273 000