Omekllomes er Kid er a chelselOreomel

Mla er a President Henry B. Eyring

Ongerung el Counselor er a First Presidency

Tirkel meral ngarngii ra rengrir el menguiu er a Babier er a Mormon, kiei loltirakl a osisecheklel, e meluluuch el kirel el kmong klemerang a mo omelchesuar er a Chedaol Reng e merael mo klou el klaumerang er tir, er a, Osobel.

obekul a Jared lolab a medidiich el bad.

Dirrek er se er ak kekerel buik, eng mla er ngii a klaumera er ngak er a Babier er a Mormon. Ng kmal mle soak sel cheldechedechal a obekul a Jared me a rechedal er a omerolir el mo er a beluu er a telbiil (mesa Ether 2:9).

Sera bochal chelbangel er a omerolir el ngara bilas el milkolk a chelsel, ea obekul a Jared a uleker, Mesang, E Rubak, kau ke di mechikemam me a ki mo imuul er tial klou el daob el ngara ilkolk? Ng ulenger, a Rubak el kmo: Ngera soam a bokrelii me bol sebechel ngarngii a omekllomes er a chelsel a bilsengiu? (mesa Ether 2:22, 23).

A obekul a Jared a mle medengelii el kmo a Rubak a kot el mesisiich. Ng mle medengei el kmo a Rubak ea Ngii a uchelel a rokui el llomes. Ng mle medengei el kmo a Rubak a milellach er a rechedal me bo lomekedong er Ngii sel lengarngii a lousbech. Meng mocha, melasem er a klaumerang er ngii er a Rubak, me a obekul a Jared a kildmokl a teruich me a elolem el bad. Ko medengei el kmo ngullengit er a Rubak me bol rutech aikal bad loba chekngelel a chimal, me bol sebechel melidiich er a a chelsel a ilkolk (mesa Ether 3:4).

Sel llecheklel a Rubak el merutech aikal bad a mla metichekl ra chelsel a uldesuek er se er ak kot el choiuii tial cheldecheduch. Ng sebechek el mesa tial omeruul el diua longedmokl er ngii er a medak. Meng locha tial bedengel a ilkolk el mocha dibus leng ngellomes a uchul a kmal kumera er ngii.

Sel bolak kumelchesiu er a Chedaol Reng, me se el ktelkib el cheroid er a Reng er a Rubak, e ak kumelchesiu er a ilkolk. Engdi sel kunguiu er a Babier er a Mormon, ea llomes a lmuut el mei. A Babier er a Mormon sel denguu er ngak a diua ea medidiich el bad el blal rutech a Rubak. Ngii a mla meklemesii a omerolek er tial klengar.

Llomes el mo Cherechar

Diua tirkel ngiltiterir el mlara chimal a Rubak el mora chuodel beluu er a Merikel, kid el rokui a mo chobangel a sesel eolt me a milkolk el sils er a omeroled el mora beluu er a telbiil el mora kot el ngarbab el klebkall. Engdi a Rubak a moremuul el merkid a uaikel riruul el mora re Jaredites me a re Nephites. Ngii a mo omekrael er kid e omekllomes er a roled—alsekum e kede olngesenges er Ngii, e meruul loba klaumerang el ngar Ngii, e olengit a ngesou er Ngii.

A Rubak a dilu er a Nephi, “Ak dirrek el mo llemesiu er a chelsel oreomel; e mo meledaes er a roliu, alsekum, e ko moltirakl a llechuk; me sel, bo moltirakl a llechuk e ak mo omekrael er kemiu el mo bdeul a beluu er a telbiil; me ko mo medengei el kmo, ngak omekrael er kemiu” (1 Nephi 17:13).

A Rubak a dilu er a ochellel a Nephi er a Jacob el kmo Ngii a mo llemesir el mo cherechar, tirkel mo orrenges a tekingel (mesa 2 Nephi 10:14).

Kirel a Osobel, ea profet Abinadi a mle sioning el kmo a Rubak a llomes e klengar er tial beluulechad; choi, ngellomes el diak el ngemed, e diak el sebechel mo milkolk. (mesa Mosiah 16:9).

Ea, Osobel a millekoi, “Ngak ea llemesel e klengar er tial beluulechad.” Ng dilchelir el kmo a Rubak a llomes; e mla meskid a okesiu el dolritakl er ngii (mesa 3 Nephi 9:18; 18:16).

Omelchesiu er a Llomes

Ng betik a renguk er a profet, President Russell M. Nelson. Ak ngeltengat el mle mesiou lobengkel. Sel lorael soiseb er a delmerab, e sel delmerab a dimereched el domelchesiu er ngii el meleketek a llemesel. Ngii a oba sel Llemesel a Kristo lobengkel.

A Llemesel a Kristo a merang. Tiang “a ngarbab el klisiich, malechub eng ongetikaik el ngara Dios lokiu a Kristo e omsa klengar me a llomes el mora rokui el ngarngii.” Tiang a mekreos el chedaol sengk el ngii a sebechel lomekrael er a rengelekel a Dios el mora Chedaol Reng me a ebangkelio er a Jesus Christ.¹ A omengiuel a Babier er a Mormon a smisichii tial Llomes.

Sel bebil ra taem e ngungil domes er a mla memong el klengar rekid e mo melbedebek el milkera lolngeseu er kid er a omeroled. Sel domes el memong, eng sebeched el mo lmuut el mo melchesuar er a ongetikaik er a Osobel. A chedaol llechukl sel ledu el kmo, Mletkii, Mletkii (mesa Helaman 5:12), e ak kumdasu e te melekoi er kid el kmo, “Lak di molatk er sel ble tal modengelii malechub e blo molchesuar er ngii; me bai, mluut el mo molchesuaer er tial llomes.”

A denguu er a rebebil, ea omelchesiu er a chedaol llomes a beot el mei er tir. Ea kuk rebebil, a chedaol llomes a ual meringel lolchesuar leng ringel lechelbangel malechub eng mengesang el tekingel a beluulechad. Engdi alsekum e kede blak a rengud, a llomes a mei—ra taem me a teletael el diak dongerchir er ngii.

A President Nelson, a mla mellach er kid el mo “oba nglunguuch e mesuub er a Babier er a Mormon ra bek el sils,”² a mla meskid a bebil er a teletael ea Babier er a Mormon a sebechel ngoikid el mo kmeed er a Osobel e ngosukid el mo omelchesiu er a llomes er a ebangkelio, e ngmai a klemerang er ngii, e kiei loltirakl a osisechekel.

Mesel donguiu er a Babier er a Mormon, a President Nelson a melekoi el kmo, sel klemedengei, me a omereng el saul er a rengud el kirel, a Tngakireng er a Jesus Kristo a mo mukeroul.

E mo omelchesiu el soad el mo mechell el beches (mesa Mosiah 27:25) e le tial babier a ngosukid el mo melchesuar er a beltel a rengud (mesa Mosiah 5:2).

Mesel donguiu e dosuub a osisechakl el ngara Babier er a Mormon el kirel a omengideb er a Israel, eng mo rengii ra rengud a mo osiik er a rebladek er kid e mo mengedmokl a chedaol ruoll er a mo suobel me a ngarbab el klebkellir el ruoll ra chelsel a templo.

Kede mo omelchesiu a llomes sel dengai a nger el kirel a kerid, ulekrael el kirel a dolib el tekoi, me a klisiich el mo ouchel e oldngakl a mekngit.

Me sel donguiu a klemerang el debetik er a chelsel a Babier er a Mormon, e kede momelchesiu omekungil, ongelaod, omekbeches, omelkakl, klisiich, omengelim, me a oyeng el mera rengud.³

“Me a leuaisei, e tiang diak le klemerang?” A Alma uleker el kirel a omkuuk, el merael mo klou el tane er a klemera el tekoi, klemedengei, me a klaumerang. “Ak subedemiu, Oi, le ngii le llomes, a ngii di le llomes a ungil, leng sebeched el mo medengelii, misei a uchul eke mla mo medengelii el kmo ng ungil” (Alma 32:35).

Llecheklel a Kristo, mlara Heinrich Hofmann

Mosiik er a Osobel er a chelsel a Milkolk

A sechelik ra Kamryn er sera le teruich a rekil, eng ngiluu a derta el borngii el secherel a medad el diak el mukar el mlo tomelii sel klisichel a medal lomes.⁴ A bebil ra taem, eng blechoel mo meringel el diak el motekangel, me a Kamryn a mo diak el sebechel otekengelii a llomes. A rechad ra blil a mle suebek a rengrir el kmong locha mo meuikou, me te tomer a llomes er a mado ra delmerab er ngii me bol sebechel mo ungil besul. A delal a Kamryn ra, Jenna, a ulemekedong:

“Locha bekord el eua el buil ruriul er a lenguu tial rakt, ea kulemakes el mora chelsel a milkolk el delmerab er ngii. Ng mocha ungil onsengek lomes, e ak milsa Kamryn el chelimetemet er a bebul a dukllel. Ng meral mle imis el ngara ringel meng dimlak louedikel malechub el llangel seral rengesak el me soiseb. Ng di milchiuai el ngii el teblo loburk el medal a mle blutek.

“Ak mlo outubaruach ra bita ra dukllel, e ngiluu a chimal, e ulemet er ngii el edei el taem—ng blart el omeruul el olechotel a kmo ‘ng betik a renguk er kau.’ Ng blechoel el kuk metir a chimak el eua el taem el kmo ‘ak imong el betik a renguk er kau’ engdi dimlak el relii tiang. Ng meral mle imis el ngara ringel. Ma chiuosech er a medak a merberebet, ra kumes er ngikal mle tal-odikl el teruich-a rekil el chelimetemet. Ng meral mlo mekngit a renguk.”

A Jenna dilii a nglunguuch ra rengul.

“Ak dilu er a Chedam er a Babeluades el kmo ak medengei el kmo Ngii a ungil medengelii sel kot lungil, engdi ak miluluuch,‘Kulengit mem ngesukii.’ Se er ak dengchokl er sei el meluluuch, e ak milchesuar er a mekekeald el mlera bedengek. Ak mlo melchesiu el medemedemk a renguk le uldasu el kirel a Osobel el Jesus Kristo a mlei er a uldesuek: ‘Ngii a llomes. Betik er Ngii er a chelsel a milkolk’”

A Jenna a kilderii a bdelul e milngelulau er a dingal a Kamryn: “Ng kirem losiik er a Osobel er a chelsel a milkolk.”

Uriul, ea Kamryn a mle imiit a medal lorrenges er a chelitakl ra ikelesia me a chedaol llechukl el ngara Church library app.

ngalek el redil el bliull a medal. — A secher el ngara medal sel bol meringel, ea Kamryn a diosiik er a Osobel er a chelsel a milkolk.

Tial secherel a medal a Kamryn a kora diak el blechoel me tuobed, eng di sel le borngii, a Janna ma bechil, er a Darrin, a mengelaod er ngii e dirrek el melecha blanket el meleked a mado er ngii. A ikel taem el sal kmal meringel, a Kamryn a melekoi, “Ak di osiik er a Osobel er a milkolk.”⁵

A klengar sel le kora milkokl e medideriik el oreomel (mesa1 Nephi 8:4), e kid a dirrek el kired el mo osiik er a Osobel er a chelsel a ilkolk. Ak kuuchais el kmo a Babier er a Mormon, el ngii a sioning el kmo “a Jesus a ngii a Kristo, el Diak a Ulebengelel Chedam,”⁶ a mo mokrolid el mo er Ngii. Ak medengei el kmo tirkel blak a rengrir al menguiu er a Babier er a Mormon, e kiei loltirakl a osisecheklel, e meluluuch el kirel a klemerang er ngii a mo omelchesiu er a Chedaol Reng me a klaumerang er tir el merael mo klou, me a klaumerang er tir er a Osobel.

Me bo dolecholt ra omereng el saul el kirel tial “kot el cherrungel” el hong⁷ el menguiu er ngii, urokodel er ngii, e ousbech er ngii el mo melisiich er a klaumerang er kid me a klaumerang er a rebebil er a chelsel a Llomes er a Beluulechad.