“Na Reki Tudei ni Bulataki ni Kosipeli,” Liaona, Feperueri 2024.
iTukutuku Vakavula ni Liaona, Feperueri 2024
Na Reki Tudei ni Bulataki ni Kosipeli
E dau yaco mai na reki vosota ni gumatuataki na kosipeli i Jisu Karisito ka ra vukei na tani me ra vakayacora vakakina.
Na Were ko Iteni, mai vei Grant Romney Clawson; Biubiu mai na Were ko Iteni, mai vei Joseph Brickey
E dua na ivakaraitaki lekaleka ni inaki ni noda bula e rawa ni kunei ena ivakavuvuli vakaparofita nei Liai me baleta na itekivu ni bula vakatamata e vuravura. Ena Were o Iteni, erau a vakaitikotiko kina o Atama kei Ivi ena dua na bula ni lecaika. Ke rau a tiko ga ena ituvaki o ya, ke rau a “sega [ni rawata] na marau, ni rau sega ni kila na rarawa; sa sega na ka vinaka erau cakava, ni rau sa sega ni kila na ivalavala ca” (2 Nifai 2:23). O koya gona, me vaka a vakamacalataka o Liai, “Sa lutu ko Atama me sucu kina na tamata; sa sucu na tamata me rawata na marau” (2 Nifai 2:25; raica talega na Mosese 5:10–11).
Ni da tubu cake ena dua na vuravura lutu tani, eda vulica na kedrau duidui na vinaka kei na ca mai na veika eda sa vakavulici kina kei na veika eda sotava. Eda “tovolea na kena gaga, [me da] qai kila [me da] gadreva na veika vinaka” (Mosese 6:55). E yaco mai na reki ni da cata na ka gaga ka da vakamareqeta vakalevu cake ka kubeta matua na veika vinaka.
Kune Reki
Ena vuku ni Nona loloma uasivi vei keda, sa gadreva tu na Tamada Vakalomalagi me wasea vei keda na Nona reki uasivi sara, ruarua ena gauna oqo kei na veigauna tawamudu. Oqori a sa Nona inaki ena veika kecega mai na ivakatekivu, oka kina na Nona ituvatuva lagilagi ni bula marau kei na solibula ni Luvena Duabau Ga sa Vakatubura me vueti keda.
E sega ni dau tovolea na Kalou me usuraka vei keda na reki se marau, ia e vakavulica vei keda o Koya na ivakarau me da kunea kina. E tukuna talega vei keda o Koya na vanua e sega ni kunei kina na reki—ni sa “sega vakadua ni vu ni marau na caka ca” (Alama 41:10). Ena Nona ivakaro e vakatakila kina vei keda na Tamada Vakalomalagi na salatu ki na reki.
A vakaraitaka kina vakaoqo o Peresitedi Russell M. Nelson:
“Ia oqo na dina levu: Ni vakatututaka ko vuravura ni kaukauwa, iyau, na rogo kei na gagadre ni itovo vakayago ena kauta mai na marau, e sega sara! Era sega ni rawata! Na ka ga era vakavurea mai sai koya edua na isosomi tawayaga ni ‘ituvaki ni bula kalougata ka mamarau” e nodra o ira “era sa muria na ivakaro ni Kalou’ [Mosaia 2:41].
“Na ka dina sai koya ni sa ka ni oca cake na vaqara na marau ena vanua o na sega vakadua ni kunea kina! Ia ke o vauci iko vei Jisu Karisito ka cakava na cakacaka vakayalo e gadrevi me vakamalumalumutaki kina na vuravura, o Koya duadua ga e tiko vua na kaukauwa me laveti iko tani mai na idre ni vuravura oqo.”1
O koya gona, na reki tudei e kune ena maroroi ni ivakaro ni Kalou, ka ra kunei na ivakaro ni Kalou ena kosipeli i Jisu Karisito. Ia sa noda digidigi. Kevaka ena noda malumalumu eda guce ena dua na gauna me da muria na ivunau, e rawa tikoga ni da vuki lesu, cata na veika gaga, ka goleva tale na ka vinaka. Na loloma ni Kalou e sega ni vakaiulubaletaka na ivalavala ca—o ya esa na butakoca kina na lewa dodonu na loloma veivueti—ia ena Nona Veisorovaki, sa solia kina o Jisu Karisito na veivueti mai na ivalavala ca:
“A kaya … ko Amuleki … ni na lako vakaidina mai na Turaga me mai sereki ira na nona tamata, ia ena sega ni lako mai me mai sereki ira ena nodra ivalavala ca, ia me mai sereki ira ga mai na nodra ivalavala ca.
“A sa solia vua ko Tamana na kaukauwa me sereki ira kina mai na nodra ivalavala ca ena vuku ni veivutuni; o koya gona sa talai ira mai kina na nona agilosi me ra mai tukuna na ivakavuvuli ni veivutuni ka na kauti ira na tamata ki na nona kaukauwa na Dauveivueti me vakabulai kina na yalodra” (Ilamani 5:10–11; vakabibitaki).
A kaya o Jisu:
“Kevaka dou sa talairawarawa ki na noqu vunau, dou na tiko ga ena noqu loloma; me vaka kau sa talairawarawa ki na vunau nei Tamaqu, ka tiko ga e na nona loloma.
“Au sa vosataka na veika oqo vei kemudou, meu sa marau tikoga ena vukumudou, ka me sinai na nomudou marau” (Joni 15:11).
Oqo na ka a vakila o Liai ena nona tadra ni tovolea na vua ni vunikau ni bula—ka matataka tiko na loloma ni Kalou. A kaya o koya, “Ni’u sa kania tiko na vuanikau koya, sa vakasinaita na yaloqu ena marau levu sara” (1 Nifai 8:12; raica talega na 11:21–23).
A vakatakila talega o Liai e dua na ikarua ni sala meda kauta mai kina na reki ki na noda bula ni a kaya, “O koya, au sa gadreva kina me ratou kania talega [na vuanikau] na noqu matavuvale” (1 Nifai 8:12).
Vunikau Ni Bula, mai vei Kazuto Uota
Nodra Vukei na Tani me ra Kune Reki
Me vakataki ira na tamata i Penijamini na Tui, eda sa “vakasinaiti ena marau” ni da ciqoma na bokoci ni noda ivalavala ca ka vakila na “vakacegu [ni noda] vakasama” (Mosaia 4:3). Eda na vakila tale ni da rai yani ka segata me da vukei ira na lewe ni matavuvale kei ira tale eso me ra ciqoma na reki kei na vakacegu vata oqori.
Ni se cauravou, a vakasaqara o Alama na marau ena veika kece e saqata tu na kosipeli i Jisu Karisito. Ni oti nona cudruvi koya e dua na agilosi, a lako mai ena dua na sala balavu mai na “kena gaga” ki na “ka vinaka” ena veivutuni “ni sa voleka sara na mate” (Mosaia 27:28) kei na loloma soliwale levu ni iVakabula. Ni oti e vica na yabaki, a kaya ena reki o Alama vei luvena tagane o Ilamani:
“Ia oqo, sa dua na ka na marau, kei na kena totoka na rarama au sa raica; io, e sa vakasinaiti na yaloqu ena marau cecekia ka sivia sara na momosi a tu vei au! …
“Io, me tekivu mai na gauna ko ya me yacova sara mai oqo, au sa daucakacaka tiko ga vagumatua ka sega ni cegu, me rawa ni’u kauta mai eso na yalo ki na veivutuni; io me ra tovolea tale ga na marau cecekia a yaco vei au. …
“Io, oqo raica, na luvequ, sa solia vei au na Turaga na marau levu cecekia ena vua ni noqu cakacaka;
“Me baleta na vosa [na kosipeli i Jisu Karisito] a tukuna vei au ko koya, raica, era sa lewe levu era sa sucu va-Kalou, ia era sa tovolea me vaka au sa tovolea” (Alama 36:20, 24–26).
Ena dua tale na gauna, a vakadinadinataka o Alama:
“Io oqo na noqu lagilagi, de na rawa meu iyaya ni cakacaka ena liga ni Kalou meu kauta mai eso na yalo ki na veivutuni; ka sai koya oqo na noqu marau.
“Ia raica, sa vakasinaiti na yaloqu ena marau, ni’u sa raica ni ra sa veivutuni vakaidina e vuqa na wekaqu, ka ra lako mai ki vua na Turaga na nodra Kalou” (Alama 29:9–10).
A tomana o Alama me vunautaka na reki levu a vakila ena gauna era sa rawa-ka kina na tamata ena kau mai ni yalo vei Karisito:
“Ia au sega ni marautaka na noqu rawa ka ga vakai au, ia sa vuabale na noqu marau ena vuku ni nodra rawa ka na wekaqu [ira na luvena tagane o Mosaia], era a lako cake ki na vanua ko Nifai.
“Raica, era a cakacaka vakagumatua sara, ka sa vuqa sara na kedra ivua; ka sa na vakaevei na levu ni kedra isau!
“Oqo, ni’u vakananuma na nodra rawa ka vinaka na wekaqu sa yavalata na yaloqu, ka vovoleka sara me biuta yani na yagoqu, ni sa vakakina, ena levu ni noqu marau” (Alama 29:14–16).
Eda rawa ni kunea na reki vata ga ni da lomani ira na tani ena “loloma taucoko i Karisito” (Moronai 7:47; raica talega na tikina e 48), wasea vata kei ira na dina vakalesui mai, ka sureti ira me ra soqoni vata mai kei ira na tamata ni veiyalayalati.
Oi Kemuni Tamaqu, mai vei Simon Dewey
Reki ena Maliwa ni Veika Dredre
Me da kakua ni rerevaka ni veivakatovolei kei na bolebole eda sotava tiko ena bula oqo ena tarova se vakarusa na noda reki. O Alama a dua ka sauti koya vakalevu sara na nona veiqaravi sega ni nanumi koya vei ira na tani. A bala e valeniveivesu, sotava vakadede na viakana kei na viagunu, mokulaki, vakarerei na nona bula, ka vakalialiai ka cati vakaveitaravi. Ia, era sa tilomi kece ki na “marau ga ena vukui Karisito” (Alama 31:38). E rairai na rarawa nei Alama a vakavuna na reki ka tarava mai me levu cake sara.
E vakananuma vei keda o Peresitedi Nelson ni a dua na itavi ni reki ena nona vakararawataki na iVakabula—“ena vuku ni marau sa viritu e matana sa vosota [o Koya] na kauveilatai” (Iperiu 12:2).
“Vakasamataka mada oya! Me rawa Vua me vosota na ka dredre duadua se qai bau vosoti rawa e vuravura, a vakanamata na noda iVakabula ena reki!
“Ia na cava na reki a tu e Matana? E ka dina e okati kina na reki ni veisavai, veivakabulai, kei na noda vaqaqacotaki; na reki ni kena saumi na nodra ivalavala ca o ira kece era na veivutuni; na reki ni kena rawati vei kedaru me daru lesu tale ki vale—ena savasava kei na kilikili—me da laki bula vata kei rau na noda iTubutubu Vakalomalagi kei na matavuvale.
“Kevaka eda vakanamata ena reki ka na yaco mai vei keda, se vei ira na noda daulomani, na cava e rawa ni da vosota ka vaka me dredre tu, mosimosi, vakarerevaki, sega ni dodonu, se sega ga ni rawa?”2
E dau yaco mai na reki vosota ni gumatuataki na kosipeli i Jisu Karisito ka ra vukei na tani me ra vakayacora vakakina. E dau yaco mai na reki tudei ni da tiko ga ena loloma ni Kalou, talairawarawa ki na Nona ivakaro ka ciqoma na loloma soliwale ni iVakabula. Ena salatu ni kosipeli, e tiko kina na reki ena ilakolako ka vakakina na reki ena kena icavacava. Na kosipeli i Jisu Karisito sa salatu ni reki e veisiga.
© 2024 mai na Intellectual Reserve, Inc. Dodonu taucoko e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. iVakadewa ni Monthly Liahona Message, February 2024. Language. 17464 858