“Ang Nagapadayon nga Kalipay sang Pagpangabuhi sang Ebanghelyo,” Liahona, Pebrero 2024.

Bulanan nga Mensahe sa Liahona, Pebrero 2024

Ang Nagapadayon nga Kalipay sang Pagpangabuhi sang Ebanghelyo

Ni Elder D. Todd Christofferson

Sang Korum sang Dose ka Apostoles

Ang nagapadayon nga kalipay maangkon sa pagpangabuhi sang ebanghelyo ni Jesucristo kag pagbulig sa iban nga maghimo sang amo man.

Si Adan kag Eva nga ang Hardin sang Eden sa likod nila

Isa ka malip-ot pero sa punto nga pagpahayag sang katuyuan sang aton mga kabuhi makita sa mga panudlo sang propeta nga si Lehi parte sa pagsugod sang kabuhi sang tawo sa duta. Sa Hardin sang Eden, si Adan kag Eva yara sa kahimtangan sang pagka-wala’y sala. Kon nagpabilin sila sa sinang kahimtangan, sila kuntani “wala [nakaagom] sing kalipay, kay wala sila makakilala sang kapiot; wala nagahimo sang maayo, kay wala sila makakilala sang sala” (2 Nefi 2:23). Gani, pareho sang ginpaathag ni Lehi “Si Adan napukan agud ang tawo mabuhi; kag ang tawo nagakabuhi, agud sila makaangkon sing kalipay” (2 Nefi 2:25; tan-awa man sa Moises 5:10–11).

Sa pagdako naton sa nahulog nga kalibutan, matun-an naton ang kinalain sang maayo kag malain paagi sa mga ginatudlo sa aton kag paagi sa aton mga eksperiyensia. Aton “matilawan ang mapait, agud mahibal-an [naton] ang pagpakamahal sang maayo” (Moises 6:55). Ang kalipay nagaabot kon aton ginasikway ang mapait kag ginapakamahal kag ginahawiran ang maayo.

Pagpangita sang Kalipay

Tungod sang Iya perpekto nga gugma sa aton, ang aton Amay nga Langitnon gusto gid ipakigbahin ang Iya perpekto nga kalipay sa aton, sa karon kag sa wala katapusan. Ina gid ang nagapahulag sa Iya sa tanan-tanan halin pa sa ginsuguran, pati na ang Iya mahimayaon nga plano sang kalipayan kag ang sakripisyo sang Iya Bugtong nga Anak agud tubuson kita.

Indi gusto ipamilit sang Dios ang kalipay ukon kasadya sa aton, pero ginatudloan Niya kita kon paano ini makit-an. Ginahambalan man Niya kita kon sa diin nga indi [naton] makit-an ang kalipay—“ang pagkamalaut [indi kag] wala gid nga [bisan san-o] nangin kalipayan” (Alma 41:10). Paagi sa Iya mga kasugoan ginapahayag sang aton Amay nga Langitnon ang dalan pakadto sa kalipay.

Ginpabutyag ini ni Pangulong Russell M. Nelson sa sini nga paagi:

“Ari ang dako nga kamatuoran: bisan pa nga ang kalibutan nagainsister nga ang gahum, mga pagkabutang, popularidad, kag ang mga kalipayan sang unod nagadala sang kalipay, indi ini matuod! Indi nila ini mahimo! Ang ila madala amo lamang ang hapaw nga kabaylo sang ‘bulahan kag malipayon nga kahimtangan sadtong mga nagatuman sang [mga] kasuguan sang Dios’ [Mosias 2:41].

“Ang matuod amo nga mas makapoy ang maglagas sang kalipayan sa lugar nga indi gid nimo ini makita! Pero, kon ihigot ninyo ang inyo kaugalingon kay Jesucristo kag himuon ang espirituhanon nga hilikuton nga kinahanglan para dag-on ang kalibutan, Sia, kag Sia lamang, ang may gahum nga alsahon kamo lapaw sa butong sining kalibutan.”¹

Gani, ang nagapadayon nga kalipay makita sa pagtuman sang mga kasugoan sang Dios, kag ang mga kasugoan sang Dios makita sa ebanghelyo ni Jesucristo. Pero aton ini pagpili. Kon sa aton kahuyang nagakapaslawan kita sa pagtuman sang mga kasugoan sa pila ka tinion, mahimo pa kita magbag-o, isikway ang mapait, kag tinguhaan liwat ang maayo. Ang pagpalangga sang Dios wala nagapakamatarong sang sala—kay sa sina ang kaluoy magakawat sa hustisya—pero paagi sa Iya Pagbayad-Sala, si Jesucristo nagatanyag sang pagtubos halin sa sala:

“Si Amulek … nagsiling … nga ang Ginuo pat-od gid nga magaabot sa pagtubos sang iya katawhan, apang nga indi sia magkari sa pagtubos sa ila sa ila mga sala, kundi sa pagtubos sa ila gikan sa ila mga sala.

“Kag may gahum sia nga ginhatag sa iya gikan sa Amay sa pagtubos sa ila gikan sa ila mga sala tungod sang paghinulsol; gani ginpadala niya ang iya mga anghel sa pagpahayag sang balita sang mga kondisyon sang paghinulsol, nga nagadala sang katawhan padulong sa gahum sang Manunubos, padulong sa kaluwasan sang ila mga kalag” (Helaman 5:10-11; emphasis gindugang).

Si Jesus nagsiling:

“Kon magbantay kamo sang akon mga sugo, magapabilin kamo sa akon gugma; subong nga ako nagbantay sang mga sugo sang akon Amay kag nagapabilin sa iya gugma.

“Ining mga butang napamulong ko sa inyo, agud nga ang akon kalipay mangin yara sa inyo kag ang inyo kalipay mabug-os” (Juan 15:10-11).

Amo sini ang nabatyagan ni Lehi sa iya damgo sang natilawan niya ang bunga sang kahoy sang kabuhi—nga nagarepresentar sang gugma sang Dios. Nagsiling sia “sang kaunon ko ang bunga sini nagpuno ini sang akon kalag sang tuman kadako nga kalipay” (1 Nefi 8:12; tan-awa man sa 11:21–23).

Si Lehi nagpahayag man sang ika-duha nga paagi nga madala naton ang kalipay sa aton mga kabuhi sang nagsiling sia, “Gani, nagsugod ako sa paghandum nga ang akon panimalay makakaon man [sang bunga]” (1Nefi 8:12).

Tree of Life [Kahoy sang Kabuhi], ni Kazuto Uota

Pagbulig sa Iban nga Makakita sang Kalipay

Pareho sa katawhan ni Haring Benjamin, kita “napuno sang kalipay” kon mabaton naton ang kapatawaran sang aton mga sala kag maeksperiyensiahan ang “paghidaet sang konsiyensya” (Mosias 4:3). Mabatyagan naton ini liwat kon magtulok kita pa-gwa kag magtinguha nga buligan ang mga miyembro sang pamilya kag iban nga makabaton sang amo man nga kalipay kag paghidaet.

Sang pamatan-on pa, si Alma nagpangita sang kalipay sa tanan nga supak sa ebanghelyo ni Jesucristo. Pagkatapos nga ginsaway sang isa ka anghel, daku ang iya pagbag-o halin sa “mapait” pakadto sa “maayo” paagi sa paghinulsol “halos tubtob sa kamatayon” (Mosias 27:28) kag sa bugana nga grasya sang Manluluwas. Pagligad sang tinuig, si Alma malipayon nga nagpahayag sa iya anak nga si Helaman:

“Kag O, daw ano nga kalipay, kag daw ano kamakahalangyag nga kapawa ang akon nakita; huo, ang akon kalag napuno sang kalipay nga subong kadako sang akon kasakit! …

“Kag subong man, gikan sadto nga tion bisan tubtob karon, nagpangabudlay ako nga wala’y untat, nga mahimo ako nga makadala sang mga kalag padulong sa paghinulsol; nga mahimo ko sila nga madala sa pagtam-id sang tuman nga kalipay nga akon natam-iran. …

“Kag subong man, karon tan-awa, O anak ko, ang Ginuo nagahatag sa akon sing tuman kadako nga kalipay sa bunga sang akon mga pagpangabudlay;

Kay tungod sang pulong [ang ebanghelyo ni Jesucristo] nga iya ginpahibalo sa akon, yari karon, madamo ang nabun-ag sa Dios, kag nakatam-id subong nga ako nakatam-id” (Alma 36:20, 24–26).

Sa isa pa ka okasyon, si Alma nagpamatuod:

“Amo ini ang akon kasadya, nga basi pa lang mangin isa ako ka galamiton sang Dios sa pagdala sang pila ka kalag sa paghinulsol; kag amo ini ang akon kalipay.

“Kag yari karon, kon makita ko ang madamo sang akon mga kauturan nga matuod-tuod nga mahinulsulon, kag nagakari sa Ginuo nga ila Dios, nian ang akon kalag napuno sang kalipay” (Alma 29:9–10).

Si Alma nagpadayon sa pagpabutyag sang nagapalanglapaw nga kalipay nga iya nabatyagan kon ang iban nagamadinalag-on sa pagdala sang mga kalag kay Cristo:

“Apang wala ako nagakalipay sa akon lamang kaugalingon nga kadalag-an, kundi labi nga nalubos ang akon kalipay tungod sang kadalag-an sang akon mga kauturan [ang mga anak nga lalaki ni Mosias], nga nagtaklad sa duta sang Nefi.

“Yari karon, nagpangabudlay sila sing tuman, kag nagdala sing madamo nga bunga; kag daw ano kadako ang ila mangin padya!

“Karon kon mahunahunaan ko ang kadalag-an sining akon mga kauturan ang akon kalag maanod, bisan tubtob sa pagkabulag sini gikan sa lawas, halos nga daw amo sini, sapagkadako sang akon kalipay” (Alma 29:14–16).

Makasalapo kita sang amo man nga kalipay kon ginapalangga naton ang iban nga may “putli nga gugma ni Cristo” (Moroni 7:47; tan-awa man sa bersikulo 48), ginapakigbahin ang ginpanumbalik nga kamatuoran sa ila, kag ginaagda sila nga magtipon upod sa katawhan sang kasugtanan.

O My Father [O Amay Ko], ni Simon Dewey

Kalipay sa Tunga sang Pag-antos

Indi kita dapat mahadlok nga ang mga pagtilaw kag mga hangkat nga indi naton malikawan nga atubangon sa kabuhi magapugong ukon magaguba sang aton kalipay. Si Alma isa ka tawo nga nagbayad sing mahal para sa iya maalwan nga pag-alagad sa iban. Nag-antos sia sang pagkabilanggo, malawig nga tinion sang kagutom kag kauhaw, mga pagkastigo, mga peligro sa iya kabuhi, kag liwat-liwat nga pagyaguta kag pagsikway. Apang, ini tanan “nadaug sa kalipay kay Cristo” (Alma 31:38). Siguro ang mga pag-antos ni Alma naghimo nga mas daku sang nagsunod nga kalipay.

Si Pangulong Nelson nagapahanumdum sa aton nga ang kalipay may papel sa sakripisyo sang Manluluwas— “nga tungod sa kalipay nga ginbutang sa iya atubang nagbatas [Sia] sang krus” (Mga Hebreo 12:2).

“Hunahunaa ina! Agud Iya mabatas ang pinakasakit nga eksperiyensya nga nabatas sa kalibutan, ang aton Manluluwas nagtutok sa kalipay!

“Kag ano nga kalipay ang ginbutang sa Iya atubang? Pat-od nga nagalakip ini sang kalipay sang pagtinlo, pag-ayo, kag pagpabakod sa aton; ang kalipay sa pagbayad sang mga sala sang tanan nga magahinulsol; ang kalipay nga mangin posible para sa imo kag sa akon nga magpauli—nga matinlo kag takos—sa pagpuyo upod sa aton Langitnon nga mga Ginikanan kag mga pamilya.

“Kon nagatutok kita sa kalipay nga magaabot sa aton, ukon sa aton mga pinalangga, ano ang mabatas naton nga sa karon daw tama kabug-at, kasakit, kahaladlokan, indi-patas, ukon imposible?”²

Ang nagapadayon nga kalipay maangkon sa pagpangabuhi sang ebanghelyo ni Jesucristo kag pagbulig sa iban nga maghimo sang amo man. Ang nagapadayon nga kalipay maangkon kon nagapabilin kita sa gugma sang Dios, nagatuman sang Iya mga kasugoan kag nagabaton sang grasya sang Manluluwas. Sa dalan sang ebanghelyo, may kalipay sa pagbiyahe kag kalipay man pagkatapos. Ang ebanghelyo ni Jesucristo isa ka dalan sang adlaw-adlaw nga kalipay.

© 2024 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, February 2024. Language. 19276 861