“Ti Manayon a Rag-o ti Panagbiag iti Ebanghelio,” Liahona, Pebrero 2024.
Binulan a Mensahe iti Liahona , Pebrero 2024
Ti Manayon a Rag-o ti Panagbiag iti Ebanghelio
Umay ti manayon a rag-o babaen ti panagibtur iti ebanghelio ni Jesucristo ken panangtulong kadagiti dadduma nga agaramid met iti kasta.
Ti Minuyongan ti Eden, ni Grant Romney Clawson; Ipapanaw iti Minuyongan ti Eden, ni Joseph Brickey
Masarakan ti ababa a panangyebkas ti panggep ti biagtayo kadagiti naimpadtuan a pannursuro ni Lehi maipapan iti panangrugi ti biag ti tao ditoy daga. Idiay Minuyongan ti Eden, nagbiag da Adan ken Eva iti kasasaad ti kinainosente. No nagtalinaedda iti dayta a kasasaad, “awananda koma iti ragsak, ta saanda nga ammo ti rigat; agaramid iti saan a naimbag, gapu ta saanda nga ammo ti basol” (2 Nephi 2:23). Iti kasta, kas inlawlawag ni Lehi, “Natnag ni Adan tapno adda tao; ket ti panggep dagiti tao, ket tapno maaddaanda iti ragsak” (2 Nephi 2:25; kitaen met iti Moises 5:10–11).
Bayat ti panagdakkeltayo iti natnag a lubong, masursurotayo ti pagdumaan ti naimbag ken dakes babaen ti no ania ti maisuro kadatayo ken babaen ti mapaspasarantayo. “Ramanan[tayo] ti pait, tapno ammo[tayo] nga ipateg ti naimbag.” (Moises 6:55). Umay ti rag-o no ilaksidtayo ti napait ken ad-adda nga ipateg ken kumpettayo iti nasayaat.
Panangsarak iti Rag-o
Gapu iti naan-anay nga ayatna kadatayo, magagaran ti Nailangitan nga Amatayo a mangibinglay kadatayo iti naan-anay a rag-ona, agpadpada ita ken iti agnanayon. Dayta ti nangtignay kenkuana iti amin manipud idi punganay, agraman ti nadayag a planona iti ragsak ken ti sakripisio iti Bugbugtong nga Anakna a mangsubbot kadatayo.
Saan a padasen ti Dios nga ipabaklay ti rag-o wenno ragsak kadatayo, ngem isuronatayo no kasano a masarakan daytoy. Ibagana pay kadatayo no sadino ti saan a pakasarakan ti rag-o —“ti kinadakes [ket saan ken] di kaano man a kinaragsak” (Alma 41:10). Babaen kadagiti bilinna nga ipalgak kadatayo ti Nailangitan nga Amatayo ti dana nga agturong iti rag-o.
Impeksa ni Presidente Russell M. Nelson ti kastoy a wagas:
“Adtoy ti dakkel a kinapudno: nupay ipapilit ti lubong a ti bileg, sanikua, kinalatak, ken ragragsak ti lasag ket mangyeg iti ragsak, saan a pudno dayta! Saanda a kabaelan dayta! Ti talaga a pataudenda ket awan sabali no di maysa a giwang a kasukat ti ‘bendision ken naragsak a kasasaad [dagiti] agtungtungpal kadagiti bilin ti Dios.’ [Mosiah 2:41].
“Ti kinapudnona ket ad-adda a makabannog ti agsapul iti kinaragsak iti lugar a saanyo iti kaano man a masarakan daytoy! Nupay kasta, no isangolmo ti bagim ken ni Jesucristo ken aramidem ti naespirituan a trabaho a kasapulan tapno maparmek ti lubong, Isu, ken Isu laeng, ti addaan iti bileg a mangguyod kenka a mangyadayo iti daytoy a lubong.”1
Gapuna, masarakan ti manayon a rag-o iti panagtungpal kadagiti bilin ti Dios, ken masarakan dagiti bilin ti Dios iti ebanghelio ni Jesucristo. Ngem, pilitayo daytoy. No iti kinakapuytayo mapaaytayo iti sumagmamano a panawen a mangtungpal kadagiti bilin, mabalintayo latta ti agsubli, laksiden ti napait, ken maminsan manen a surotentayo ti naimbag. Ti ayat ti Dios ket saan a mangipambar iti basol—dayta ti asi a mangtakaw iti hustisia—ngem babaen ti Pannubbotna, idiaya ni Jesucristo iti pannakasubbot manipud iti basol:
“Ni Amulek… kinunana … ta pudno ti yaay ti Apo a mangsubbot kadagiti taona, ngem saanto nga umay a mangsubbot kadakuada iti basbasolda, ngem subbotenna ida manipud kadagiti basolda.
“Ket adda bilegna nga inted kenkuana ti Ama a mangsubbot kadakuada manipud kadagiti basolda gapu iti panagbabawi; ngarud imbaonna dagiti anghelna a mangipakdaar kadagiti damag iti kasasaad ti panagbabawi, a mangyeg iti bileg ti Mannubbot, iti pannakaisalakan dagiti kararuada” (Helaman 5:10–11; nainayon ti panangyunay-unay).
Kinuna ni Jesus:
“No tungpalenyo dagiti bilbilinko, agtaengkayto iti ayatko; kasla iti panagtungpalko kadagiti bilbilin ni Amak, ket agtaengak iti ayatna.
“Dagitoy a banag a sinaok kadakayo, tapno ti rag-ok mabalin nga agtaeng koma kadakayo, ket ti rag-oyo mapno koma” (Juan 15:10–11).
Daytoy ti narikna ni Lehi iti tagtagainepna bayat ti panangramanna iti bunga ti kayo ti biag—a mangibagi iti ayat ti Dios. Kinunana, “Bayat ti pannakairanudko iti bunga pinennekna ti espirituk iti nalaus a ragsak” (1 Nephi 8:12; 11:21–23).
Impalgak pay ni Lehi ti maikadua a wagas a mabalintayo nga iyeg ti rag-o iti biagtayo idi kinunana, “Gapuna, nangrugi a kinalikagumak a mairanud met ti kaamaak iti [bunga]” .(1 Nephi 8:12).
Kayo ti Biag, ni Kazuto Uota
Panangtulong kadagiti Dadduma a Mangsarak iti Ragsak
Kas iti tattao ni Ari Benjamin, “napnuantayo iti rag-o” no umawattayo iti pannakapakawan dagiti basoltayo ken mapasarantayo ti “kinatalna ti pakinakem” (Mosiah 4:3). Mariknatayo manen no kumitatayo iti ruar ken ikagumaantayo a tulongan dagiti miembro ti pamilia ken dagiti dadduma nga umawat iti dayta met laeng a rag-o ken talna.
Kas maysa nga agtutubo, sinapul ni Alma ti ragsak iti amin a maikontra iti ebanghelio ni Jesucristo. Kalpasan a binabalaw ti maysa nga anghel, adayo a dimteng manipud “ti napait” agingga iti “naimbag” babaen ti panagbabawi “asideg ken patay” (Mosiah 27:28) ken ti nawadwad a parabur ti Mangisalakan. Kalpasan dagiti tawen, siraragsak nga impakdaar ni Alma iti anakna a ni Helaman:
“Ket o, anian a rag-o, ken anian a nakaskasdaaw a lawag ti nakitak; wen, napno ti kararuak iti rag-o a kas iti pannakapnok idi iti saem! …
“Wen, ket manipud iti dayta a kanito agingga ita, awan ressatna ti panagtrabahok, tapno bareng adda karkararua a mapagbabawik; tapno maiparamanko met kadakuada ti aglaplapusanan a rag-o a naramanak. …
“Wen, ket ita adtoy, O anakko, inikkannak ti Apo iti aglaplapusanan a rag-o a bunga dagiti trabahok;
“Ta gapu iti balikas [ti ebanghelio ni Jesucristo] nga imbingayna kaniak, adtoy, adu ti nayanak iti Dios, ken nakaraman iti naramanak” (Alma 36:20, 24–26).
Iti sabali pay a gundaway, impaneknek ni Alma:
“Daytoy ti idaydayawko, ta nalabit a siak ti ramit dagiti ima ti Dios a mamagbabawi iti sumagmamano a kararua; ket daytoy ti rag-ok.
“Ket adtoy, iti pannakakitak iti adu a kakabsatko a sipapasnek nga agbabawi a silaladingit, ken umasideg iti Apo a Diosda, iti dayta napno ti kararuak iti rag-o” (Alma 29:9–10).
Intuloy ni Alma nga inwaragawag ti napalaus a rag-o a nariknana idi naballigi dagiti dadduma a nangyeg kadagiti kararua ken ni Cristo:
“Ngem saanak nga agrag-o iti bukodko laeng a balligi, ngem ad-adda a naan-anay ti rag-ok gapu iti balligi dagiti kabsatko, nga idi pay nga adda iti daga ti Nephi.
“Adtoy, sipapasnekda a nagtrabaho, ket nakaikuyogda iti adu a bunga; ket anian a nagdakkel ti gunggonada!
“Ita, iti panangpanunotko iti balligi dagitoy a kakabsatko naluyaan ti kararuak, a kas man iti pannakaisinana iti bagi, a kas idi, isu a napalalo ti rag-ok” (Alma 29:14–16).
Masarakantayo ti isu met laeng a rag-o no ayatentayo dagiti dadduma iti “natarnaw nga ayat ni Cristo” (Moroni 7:47; kitaen met iti bersikulo 48), ibinglay ti naisubli a kinapudno kadakuada, ken awisen ida a makipagummong kadagiti natulagan a tao.
O Amak, ni Simon Dewey
Rag-o iti Baet ti Rigat
Saantayo koma nga agbuteng a dagiti pannubok ken karit a di maliklikan a sangsanguentayo iti mortalidad ket manglapped wenno mangdadael iti rag-otayo. Ni Alma gapu iti di managimbubukod a panagserbina iti dadduma ket nagbayad iti nangina. Nagsagaba iti pannakabalud, napaut a panawen ti bisin ken waw, nakabkabil, napangtaan iti biagna, ken naulit-ulit a pannakauyaw ken pannakailaksid. Ti panagsagabak ket “pinarmek ti rag-o a naggapu ken ni Cristo” (Alma 31:38). Nalabit a ti panagsagaba ni Alma ti nangpadakkel pay iti rag-o a simmaruno.
Palagipannatayo ni Presidente Nelson nga adda akem ti rag-o iti panagsagaba ti Mangisalakan—“Kas iti amin a banag, ni Jesucristo ti kangrunaan a pagwadantayo—“a gapu iti rag-o a naipakita iti imatangna nagibtur iti krus” (Hebreo 12:2).
“Panunoten dayta! Tapno maibturanna ti kasaeman a padas a naibturan iti daga, nagpokus ti Mangisalakantayo iti rag-o!
“Ken ania ti rag-o a naidatag iti sanguananna? Awan duadua a maibilang ditoy ti rag-o ti pannakadalus, pannakaagas, ken pannakapapigsatayo; ti rag-o ti panagbayad iti basbasol ti amin nga agbabawi; ti rag-o ti panangaramid a posible kadatayo a makasubli iti pagtaengan—nadalus ken maikari—a makipagnaed kadagiti Nailangitan a Nagannak ken pamiliatayo.
“No ipokustayo ti rag-o nga umayto kadatayo, ken ti rag-o kadagiti ay-ayatentayo, ania ti maibturantayo a kasla napalalo, nasaem, nakabutbuteng, saan a nasayaat, wenno gagangay nga imposible?”2
Umay ti manayon a rag-o babaen ti panagibtur iti ebanghelio ni Jesucristo ken panangtulong kadagiti dadduma nga agaramid met iti kasta. Dumteng ti manayon a rag-o bayat ti panagtalinaedtayo iti ayat ti Dios, panagtulnog kadagiti bilinna ken panangawat iti parabur ti Mangisalakan. Iti dana ti ebanghelio, adda rag-o iti panagdaliasat kasta met ti rag-o iti panungpalan. Ti ebanghelio ni Jesucristo ti dana ti inaldaw a rag-o.
© 2024 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, February 2024. Language. 19276 864