“Engan Wacngihn Sahflahiyac Tuhkuh ke Moulkihn Wosasuc,” Liahona, Fepweri 2024.
Mahlwem nuhkwewa Liahona Mwe Fahkwack, Fepweri 2024
Engan Wacngihn Sahflahiyac Tuhkuh ke Moulkihn Wosasuc
Engan uh el tuhkuh ke kuht kampare ke wosasuc luhn Jisus Kraist ac kahsruh mwet sahyac in oruh oacna.
Imac Eden, sel Grant Romney Clawson; Som liki Imac Eden, sel Joseph Brickey
Oasr ahkkuhtweyac fototo ke sripen moul lasr ma kuh in sukokyak ke mwe luti lal Lehi ke muhtwacwacackiyacn moul fin facluh se inge. Ke Imac luhn Eden, Adam ac Eve muhta na ke sie ohiyacn moul ma wacngihn mwacta. Fin elos muhta ke ohiyac inge, elos srwackna muhta na ke sie ohiyacn moul ma “wacngihn engan, ke srihpen elos tiac etuh suhpwacr; tiac oruh ma wo, ke srihpen elos tiac etuh ma koluk” (2 Nephi 2:23). Ohinge, oacna ke Lehi el tuh ahkuhtweyac ah, “Adam el puhtatlac tuh mwet uh in kuh; ac enenuh in moul, tuh elos in kuh in engan” (2 Nephi 2:25; liye pac Moses 5:10–11).
Ke kuht kapkapwack ke facluh se inge, kuht lotwelah ma wo ac ma koluk ke ma lutiyuhk kuht ac ke ma kuht puhlakihn ke moul se inge. Kuht ema em mohkohl, tuh [kuht] in etuh in sekoi ma wowo (liye Moses 6:55). Engan uh tuhkuh ke kuht sislah ma koluk uh ac seko ac sruokyac na in kuh ma wo uh.
Konwacack Engan
Ke sripen luhngse lal nuh sesr, Pahpah tuhmasr Inkuhsrao el kena tuh kuht in wi puhlakihn engan, kwewana ingena ac nuh tok ma pahtpaht. Pa inge sripac Lal ke ma nuhkwewa e kena muhtwacwacackiyac ah, weacng pac plwacn wolacna Lal ke engan ac ke iwaclah luhn Wen Kuloh Sefanna Nahtuhl in molikuhtlac.
God el tiacna oruh in use na nuh sesr engan uh, tuhsruhk El luti kuht lah kuht e fuhkah eis. El oacyacpac fahk nuh sesr acn kuht tiac kuh in sokwack engan we—“ma koluk uh tiacna pa engan” (Alma 41:10). Pahpah Luhng el ahkkahlwemye nuh sesr inkacnek nuhke engan ke masap Lal.
Prestuhn Russell M. Nelson el ahkuhtweyac ohinge:
“Tuhsruhk pa inge ma pwacye sahflah kac uh: ke facluh luhngse kuh sacn, wal, pwengpweng, ac ma wo nuh ke ikoac ma sang engan, elos tiacna! Etlahl tiac kuh! Wacngihn ma elos oraclah kac sahyacn na acn oalal se nuh ke ‘mwe insewowo ac ohiyac engan lalos [suc}liyacacn masap luhn God.’ [Mosiah 2:41].
“Pwacye na lah e upac yohk ullac in sokwack engan ke acn ma kom koflah sokwack we! Tuhsruhktuh, ke kom sang srenenuh lom nuh sel Jisus Kraist ac oruh orekma luhn nguhn ma e kasrekom kuhtanglah facluh, El, ac El muhkena, oasr kuh in sruhkomyak liki ulul luhn facluh se inge.”1
Pwacnwacng, engan wacngihn sahflahiyac sukokyak oasr ke liyacacng masap luhn God, ac masap luhn God uh sukokyak oasr ke wosasuc luhn Jisus Kraist. Tuhsruhk sulaclah na lasr. Ac fin kuht puhtatlac tiac liyacacng masap uh ke puhluhn pacl se ke sripen muhnahs lasr, kuht srwackna kuh in forlah, sislah ma koluk inge, ac sifilpac suk ke ma wo uh. Luhngse luhn God tiacna nuhnak muhnahs nuhke ma koluk uh—pahkotwen e pihsrwaclah ma suwohs—tuhsruhk ke sripen Iwaclah Lal, Jisus Kraist el molikuhtlac liki ma koluk lasr:
“Amulek … el tuh fahk … lah Leum El ac tuhkuh in molwelah mwet Lal, tuhsruhk tuh El ac tiac tuhkuh in molweloslac ke koluk lalos, tuhsruhk in molweloslac liki koluk lalos.
“Ac oasr kuh Lal ma ituckyang nuh Sel sin Pahpah in molweloslac liki ma koluk lalos ke srihpen auliyak uh; ke ma inge El suhpwaclah lipufacn Lal in sulkackihn pweng wo ke akwuck luhn auliyak; ma use nuh ke kuh luhn Mwet in Molwelah, nuh ke molwelah luhn nguhnalos” (Helaman 5:10–11; ahkuhtweyac wo ituckyang).
Jisus El fahk:
“Kowos fin akos ma sap luk, kowos ac oanna in lungse luk, oana ke nga akos ma sap lun Papa tumuk ac mutana in lungse lal.
“Nga fahk ma inge nu suwos tuh enganluk fah oan in kowos, ac tuh engan lowos arulana yohk” (John 15:10–11).
Pa inge ma Lehi el puhla ke mwemwe se lal ah ke el ema fukunsahk se ke sahk in moul—ma ahkuhtweyac ke luhngse luhn God. El fahk, “Ac ke nga ipeis fukun sahk kac ah ma inge nwacklah nguhnihk ke engan na yohk” (1 Nephi 8:12; liye pac 11:21–23).
Lehi el oacyacpac ahkkahlwemye innek ahkluo kuht kuh in use engan nuhke moul lasr ke el fahk, “Ohinge, nga muhtwacwacack in kena tuh sucu luhk in ipeis ke ma inge” (1 Nephi 8:12).
Sahk in Moul, sel Kazuto Uota
Kahsruh Mwet Sahyac in Konwacack Engan
Oacna mwet lal Tohkosrah Benjamin, kuht “sesseslah ke engan yohk” ke kuht eis nuhnak muhnahs ke ma koluk lasr, ac eis “mihslac ke nuhnak” (Mosiah 4:3). Kuht sifilpac puhla ke kuht ngwet nuh sahyac ac suk in kahsruh sucu lasr ac mwet sahyac in eis engan ac mislac se inge.
Ke Alma el tuh ekihn mukul fuhsr se, el suk in engan ke ma nuhkwewa ma lain wosasuc luhn Jisus Kraist. Tukun Alma el muhlatiyuck sin lipufacn se, el som liki ma koluk nuhke ma wo ke auliyak “apkuhran nuh ke misac” (Mosiah 27:28) ac eis nuhnak muhnahs sel Jisus. Yac ekahsr tohkoh, Alma el fahk nuh sin wen nahtuhl pahngpang Helaman:
“Ac o, fuhkah luhpan engan, ac fuhkah luhpan wolacna luhn kahlwem ma nga liye; ahok, nguhnihk sesseslah ke engan yohk liki na kweok luhk! …
“Ahok, ac ke pacl sac fahlac finne ne inge, nga orekma tiac tui, tuh nga in kuh in use mwet in auliyak; tuh nga in kuh in usaclosme in ipeis engan yohk suc nga tuh ipeis. …
“Ahok, ac inge liye, O wen nuhtihk, Leum El use nuh sihk engan yohk na pwacye ke fukun orekma luhk;
“Tuh ke srihpen kahs uh [wosasuc luhn Jisus Kraist] suc El use nuh sihk, liye, mwet pucspucs isuslac in God, ac elos ipeis oacna ke nga tuh ipeis” (Alma 36:20, 24–26).
Ke sie pac toeni, Alma el fahkwack:
“Pa inge kaksak luhk, tuh sahp ngan kuh in sie kuhfa in orekmakihnyuck ke poun God in use kuhtuh mwet in auliyak; ac pa inge engan luhk.
“Ac liye, ke nga liye puhs sin mwet wiyuck elos auli na pwacye, ac tuhkuh nuh yurun Leum God lalos, na nguhnihk sesseslah ke engan” (Alma 29:9–10).
Alma el tahfwelah pac in fahk engan yohk se el puhlakihn ke pacl se mwet sahyac uh pwacnma kuhtuh nuh yurin Kraist uh:
“Tuhsruhk nga tiac engan ke kuhtanglah luhk muhkwena, tuhsruhk engan luhk fohnlah liki met ah ke srihpen kuhtanglah luhn mwet wiyuck [wen nahtuhl Mosiah], suc tuh som nuh fin acn Nephi.
“Liye, elos orekma kwemkahtuh, ac elos use fahko yohk; ac fuhkah luhpan yohkiyacn mwe sang lalos!
“Inge, ke nga nuhnkuh ke kuhtanglah luhn mwet wiyuck inge nguhnihk utucklac, finne nuh ke fahsrelihk luhn nguhna liki mahno, oacna ke tuh sikyak, ohinge yohk engan luhk” (Alma 29:14–16).
Kuht kuh in konwacack engan se ingacn kuht fin luhngse mwet sahyac ke “luhngse pwacye luhn Kraist” (Moroni 7:47; liye pac fuhs 48), akacsruhi apwacye fohlokihnyuackyak nuh selos, ac suhlwaclos in fahsrweni wi mwet wuhlweacng Lal.
O Pahpah Tuhmuhk, sel Simon Dewey
Engan Inmahsrlon Ma Upac
Kuht enenuh in tiacna sahngweng ke ma upac ma tuhkuh sun kuht ke moul se inge muh el tilokihn kuht kuh kuhnahoslah engan lasr uh. Alma el sie mwet ma sang insiyacl ke kuhlwacnsap lal nuh sin mwet sahyac. El kweok ke sruh el, puhlakihn masrinsrwacl ac maluh ke lusen pacl loeloes, acnwuhk, sensen nuhke moul lal, ac puhlakihn pac ahkkoluk. Ac ne ohinge, ma inge kwewa ukumyuhku ke engan luhn Kraist (liye Alma 31:38). Sahp kweok lal Alma inge pwacnwacng yohk engan lal ma tuhkuh tok.
Prestuhn Nelson el ahkacsmakihnye kuht lah engan el tuhkuh ke kweok luhn Mwet Lahngo lasr—tuh engan se ma tuhkuh nuh sel tuhkuh me el tuh kuhtanglah misac fin sahksin (liye Hebrew 12:2).
“Nuhnkuh kac! In oruh ma upac emet fin facluh, Mwet Lahngo lasr El nuhnkuh yohk ke engan
“Ac fuhkah engan ma fihliyucki ye muhtahl? Pwacyena weacng engan ke ahknwacsnwacsye, ahkkweye, ac ahkfokokoye kuht; engan ke moli ma koluk luhn mwet nuhkwewa suc auliyak; engan se ma oruh kuht in kuh in fohlohk nuh lohm ah—nwacsnwacs ac suwohs—in moul yurin Pahpah Ninac Inkuhsrao kiyacsr ac sucu lasr.
“Kuht fin nuhnkuh suwohs ke engan ma fah tuhkuh nuh sesr, kuh nuh selos suc kuht luhngse, meac kuht kuh in kampare kac ma ingena luhman upaclac, kweok, ahksahngweng, suhfal, kuh tiac kuh in orek?”2
Engan uh el tuhkuh ke kuht kampare ke wosasuc luhn Jisus Kraist ac kahsruh mwet sahyac in oruh oacna. Engan ma pahtpaht tuhkuh nuh sesr ke kuht muhta ke luhngse luhn God, ahkos masap Lal ac eis pahkotwen luhn Mwet Lahngo. Ke inkacnek luhn wosasuc, oasr engan ke pacl se kuht oruh fuhfahsryuhsr lasr ac oacyacpac engan ke sahflahiyac uh. Wosasuc luhn Jisus Kraist pa innek nuhke engan ke lwen nuhkwewa.
© 2024 sel Intellectual Reserve, Inc. Suwohs nuhkewa fihliyucki. Printiyucki fin acn USA. Ahkkweyeyucklac nuh ke Englishg: 6/19. Ahkkweyeyucklac ke lweng: 6/19. Lweng nuh ke Monthly Liahona Message, February 2024. Language. 19276 868