“Lan̄lōn̄ eo Ejjeļo̧k Jem̧ļo̧kin n̄an Mour kōn Gospel in,” Liaona, Pāpode 2024.
Ennaan eo jān Liaona Kajjojo Allōn̄, Pāpode 2024
Lan̄lōn̄ eo Ejjeļo̧k Jem̧ļo̧kin n̄an Mour kōn Gospel in
Kijenmeje lan̄lōn̄ eo ej itok jān kijenmej ilo gospel eo an Jisōs Kraist im jipan̄ ro jet kōm̧m̧an ejja āinwōt.
Jikin Kallib Eden, jān Grant Romney Clawson; Em̧m̧akūt jān Jikin Kallib Iden, jān Joseph Brickey
Juon wāween n̄an kwaļo̧kunleplep eo an mour ko ad maron̄ in loe ilo katak in kanaan ko an Liai kōn jinoin mour an armej ioon laļ in. Ilo Jikin Kallib Iden, Adam im Iv rekar mour ilo juon wāween mour erreo. Ren kar ke pād nememein eo, reban “[kar] lan̄lōn̄, bwe reban kar jeļā kōn en̄taan; jab kōm̧m̧an em̧m̧an, bwe raar jeļā ejjeļo̧k jero̧wiwi” (2 Nipai 2:23). Kōn menin, āinwōt an Liai kōmeļeļeiki, “Adam eaar wōtlo̧k bwe armej ren kar āinwōt, bwe ren maron̄ m̧ōņōņō” (2 Nipai 2:25; bar lale Moses 5:10–11).
Ilo rūttoļo̧k ilo juon laļ ekar wōtlo̧k, jej ekkatak oktak eo ikōtaan em̧m̧an im nana jān ta eo jej ekkatak im jān ta eo jej en̄jake. Jej “edjon̄e meo̧ eo, bwe [jen] maron̄ jeļā wōņāān men eo em̧m̧an” (Moses 6:55). Lan̄lōn̄ ej itok ilo ad abwin edjon̄e m̧eo eo im kōļapļo̧k ad kaorōke im jirōk likatōttōt wōt n̄an men eo em̧m̧an.
Pukot Lan̄lōn̄
Kōn iakwe eo An ewāppen n̄an kōj, Jemedwōj Ilan̄ ej lukkuun in kijerjer in kwaļo̧k lan̄lōn̄ eo An ewāppen ippād, jim̧or kiiō im indeeo. Menin ekar baj ikdeleel eo An ilo men otemjej jān jinoin, ekoba karōk in m̧ōņōņō eo An eaiboojoj im katok eo An Nejin Emake Wōt Jitōn Bōro n̄an lo̧mo̧o̧ren kōj.
Anij ejjab kajjieon̄ kipel lan̄lōn̄ ak m̧ōņōņō iood, ak Ej katakin kōj wāween ad pukote. Ekar barāinwōt jiron̄ kōj ia eo jab maron̄ loe lan̄lōn̄ ie—“jerawiwi [ejjab im] ejjan̄in kar m̧ōņōņō” (Alma 41:10). Ej jān kien ko An bwe Jemedwōj Ilan̄ en kwaļo̧k tok n̄an kōj iaļ eo n̄an lan̄lōn̄.
Būreejtōn Russell M. Nelson ekar kwaļo̧ke wāween in:
“En̄in ej m̧ool eo letok: ilo an laļin jab bōk kajoor in, m̧weie ko, bun̄bun̄ ko, im kam̧ōņōņō ko an kanniōk rej bōktok m̧ōņōņō, rejjab! Rejjab maron̄! Ejjeļo̧k men rej kwaļo̧ke ak juon wāween ilo ‘jekjek eo ejeraam̧m̧an im ekam̧ōņōņō an [ro raar] kōjparok kien ko an Anij’ [Mosaia 2:41].
“M̧ool eo ej bwe eļap ļo̧k an kam̧ōkm̧ōk n̄an kappukot m̧ōņōņō ijo kwoj jāmin loe ie! Ijoke, n̄e kwonaaj mour ippān Jisōs Kraist im kōm̧m̧ani jerbal in jetōb ko aikuji n̄an anjo̧ ioon laļin, E, im E make, ewōr kajoor n̄an kotak eok jen anjiwiwi in laļin.”1
Men̄e, lan̄lōn̄ eo ejjeļo̧k jem̧ļokin epād ilo ad kōjparok kien ko an Anij, im kien ko an Anij loi ilo gospel eo an Jisōs Kraist. Ak ej ad kāālet. Eļan̄n̄e ilo m̧ōjņo̧ eo ad jej likjab kōn juon iien n̄an kōjparok kien ko, jej maron̄ wōt oktak, elļo̧k jān men eo emeo̧, im bar juon alen pukot men eo em̧m̧an. Iakwe eo an Anij ejjab jekpen ņae jerawiwi—enaaj maron̄ āinwōt tūriamo̧ ej ko̧o̧te ekajet—ak kōn Pinmuur eo An, Jisōs Kraist ej letok pinmuur jān jerawiwi.
“Amulek … ekar ba … em̧ool Irooj Enaaj itok im pinmuuri armej ro An, a bwe E jamin itok n̄an lo̧mo̧o̧ren er.” ilo jerawiwi ko aer, a n̄an lo̧mo̧o̧ren er jān jerawiwi ko ad.
“Im E ewōr an kajoor leļo̧k n̄an e jān Jemān n̄an lo̧mo̧o̧ren er jān jero̧wiwi ko aer kōnke ukeļo̧k; kōn menin Eaar jilkintok enjeļ ro An n̄an kwaļo̧k naan ko rem̧m̧an kōn jekjek ko an ukeļo̧k eo ej bōktok kajoor in Ripinmuur eo, n̄an lo̧mo̧o̧r eo an armej ro” (Hilamōn 5:10–11; naan ko kar kobaiktok).
Jisōs eaar ba:
“Eļan̄n̄e kom̧ij kōjparok kien ko Aō, kom̧ naaj pād ilo Aō yokwe; im barāinwōt Iar kōjparok kein ko an Jema, im Ij pād ilo An yokwe.”
“Men kein Ij kōnono n̄an kom̧ bwe Aō lan̄lōn̄ en pād ilo kom̧, im bwe ami lan̄lōn̄ en obrak” (Jon 15:10–11).
En̄in ej ta eo Liai ekar en̄jake ilo ettōņak eo an ilo an kar nem̧ake leen wōjke in mour—eo ej bōk jikin iakwe eo an Anij. Eaar ba, “Ke iaar m̧ōņā leen wōjke eo eaar kobrak aō kōn eļap otem ļap lan̄lōn̄” (1 Nipai 8:12; bar lale 11:21–23).
Liai ekar barāinwōt kwaļo̧ke wāween eo kein karuo jemaron̄ bōktok lan̄lōn̄ n̄an mour ko ad ke ekar ba, “Kōn menin, iaar jino aō ikdeelel bwe baam̧le eo aō en m̧ōņā [leen eo] barāinwōt” (1 Nipai 8:12).
Wōjke in Mour, jān Kazuto Uota
Jipan̄ Ro Jet Loe Lan̄lōn̄
Āinwōt armej ro an Kiin̄ Benjamin, jej “obrak kōn lan̄lōn̄” n̄e jej bōk jeorļo̧k in jerawiwi ko ad im en̄jake “aenōm̧m̧an in bōklōkōt” (Mosaia 4:3). Jej en̄jake bar juon alen n̄e jej reinam̧ōjļo̧k im pukot n̄an jipan̄ ro uwaan baam̧le ko im ro jet bōk ejja lan̄lōn̄ im aenōm̧m̧an in.
Āinwōt juon likao, Alma ekar pukot m̧ōņōņō ilo men otemjej rej jum̧ae gospel eo an Jisōs Kraist. Ālkin an kar enjeļ eo kauweiki, ekar itok jān an kar lukkuun “meo̧” n̄an “em̧m̧an” jān ukeļo̧k “epaake n̄an mej” (Mosaia 27:28) im tūriam̧o̧ eo eļap an Rilo̧mo̧o̧r. Iiō ko tokālik, Alma ekar lukkuun kwaļo̧k n̄an ļeo nejin Hilam̧ōn:
“Im o, ta m̧ōņōņō eo, im ta meram eo eaiboojoj iaar loe; aaet, aō eaar obrak kōn m̧ōņōņō eaar jon̄an wōt aō metak! …
“Aaet, im jān iien eo n̄an kiiō, iaar jerbal ilo ejjeļo̧k bōjrak, bwe in maron̄ bōktok armej ro n̄an ukeļo̧k; bwe in maron̄ bōktok er n̄an nemake m̧ōņōņō eo ekanooj ļap eo iaar nemake. …
“Aaet, im kiiō lo, O nejū m̧aan, Irooj ej letok n̄an eō m̧ōņōņō eļap otem ļap ilo leen jerbal ko aō;
“Bwe kōnke naan eo Eaar jaketok n̄an eō, lo, elōn̄ rekar ļotak ilo Anij, im raar nemake āinwōt iaar nemake,” (Alma 36:20, 24–26).
Ilo bar juon iien, Alma ekar kam̧ool:
“Enin ej aō wōj, bwe bōlen in maron̄ juon kein jerbal ilo pein Anij n̄an bōktok jān armej n̄an ukweļo̧k; im en̄in ej aō lan̄lōn̄.
“Im lo, n̄e ij lo elōn̄ iaan ro jeiū im jatū rem̧ool ilo ukeļo̧k, im rej itok n̄an Irooj aer Anij, innām aō ej obrak kōn lan̄lōn̄” (Alma 29:9–10).
Alma ekar etal wōt im kwaļo̧k lan̄lōn̄ eo eļap ekar lan̄lōn̄ ke ekar en̄jake ke ro jet rekar tōprak ilo bōktok jetōb ko n̄an Kraist.
“Ak ij jab lan̄lōn̄ ilo tōprak eo aō make wōt, ak aō lan̄lōn̄ ej obrakļo̧k kōnke tōprak ko an ļōm̧aro jeiū im jatū, [ļōm̧aro nejin Mosaia], ro rekar wanlōn̄ļo̧k n̄an ānen Nipai.
“Lo, raar kanooj jerbal, im kar bōktok eļap leen, im ewi jon̄an naaj jinōkjej eo aer!
“Kiiō, n̄e ij ļōmņak kōn tōprak ko an rein jeiū im jatū aō emootļo̧k, em̧ool n̄an jepelļo̧k eo an jān ānbwinnū, āinwōt kar m̧okta, eļap ej aō lan̄lōn̄” (Alma 29:14–16).
Jemaron̄ loe ejja lan̄lōn̄ in ilo ad iakwe ro jet kōn “iakwe eo erreo an Kraist” (Moronai 7:47; bar lale eoon 48), kwaļo̧ke m̧ool eo em̧ōj an jepļaaktok ippāer, im karuwaineneik er n̄an kobatok ippān armej in bujen ro.
O Jema, jān Simon Dewey
Lan̄lōn̄ Ilubwilijin En̄taan
Jejjab aikuj in mijak bwe mālijjon̄ ko im apan̄ ko jej aikuj jelm̧ai ilo mour in renaaj bōbrae ak kakkure lan̄lon̄ eo ad. Alma ekar juon iaan ro jerbal in jipan̄ rejjab likjab n̄an ro jet ekar lukkuun jelet e. Ekar jelm̧ae kalbuuj, ioon iien ko raitok kōn kwōle im maro, m̧ane, kaam̧jake mour eo an, im kajirere kake ejjeļo̧k jem̧ļo̧kin im kōwaane. Im aaet, ekar aolep “jakoļo̧k ilo lan̄lōn̄ an Kraist” (Alma 31:38). Bōlen en̄taan eo an Alma ekar kōm̧m̧an bwe lan̄lōn̄ eo aaet en ļapļo̧k an kajoor.
Būreejtōn Nelson ej kakeememej kōj bwe lan̄lōn̄ ekar kōm̧m̧ane juon jerbal ilo en̄taan eo an Rilo̧mo̧o̧r eo—“lan̄lōn̄ em̧ōj likūt e i m̧aan, [Ear] en̄taan ilo debwāāl” (Hibru 12:2).
“Ļōmņak kake! Bwe En maron̄ dipuk en̄taan eo ioon laļ in, ad Rilo̧mo̧o̧r eaar mije wōt lan̄lōn̄!
“Im ta lan̄lōn̄ eo em̧ōj likūt E im̧aan? Ilo m̧ool ekoba m̧ōņōņō eo erreeo, emour, n̄an kōkajoorļo̧k kōj; m̧ōņōņō eo n̄an kōļļāik wōnāān jerawiwi ko an aolep ro renaaj ukweļo̧k; m̧ōņōņō eo ekōm̧m̧an bwe kejro en jepļaakļo̧k n̄an kapijuknen ilo—karbab im erreeo—n̄an mour ippān jined im jemed ilan̄ im baam̧le ko.
“Eļan̄n̄e jenaaj mije wōt m̧ōņōņō eo enaaj waļo̧k n̄an kōj, ak n̄an ro jej iakwe, ta eo jemaron̄ dipuki kiiō me emaron̄ kainepata, kōmetak, kaamijak, jab jejjet, ak bōlen jab jerbal?”2
Kijenmeje lan̄lōn̄ eo ej itok jān kijenmej ilo gospel eo an Jisōs Kraist im jipan̄ ro jet kōm̧m̧an ejja āinwōt. Lan̄lōn̄ eo ejjeļo̧k jem̧ļo̧kin ej itok ilo ad pād wōt ilo iakwe eo an Anij, pokake kien ko An im bōk tūriam̧o̧ eo an Rilo̧mo̧o̧r eo. Ilo iaļ in ilo gospel in, ewōr lan̄lōn̄ ilo ito itak eo barāinwōt lan̄lōn̄ ilo jem̧ļo̧kin iaļ in. Gospel eo an Jisōs Kraist ej juon iaļan lan̄lōn̄ kajjojo raan.
© 2024 jān Intellectual Reserve, Inc. All rights reserved. Kar būriin ilo USA. Kōmālim ilo kajin In̄lij: 6/19. Kōmālim ukook eo: 6/19. Ukook eo an Monthly Liahona Message, February 2024. Language. 19276 874