« Te ’oa’oa vai maoro nō te orara’a i te ’evanelia », Liahona, Fepuare 2024.
Parau poro’i tā’āva’e nō te Liahona Fepuare 2024
Te ’oa’oa vai maoro nō te orara’a i te ’evanelia
Fa’atupu i te ’oa’oa vai maoro ’a nu’u ai i roto i te ’evanelia a Iesu Mesia ’e ’a tauturu ai ia vetahi ’ē ’ia nā reira ato’a.
The Garden of Eden [Te ’Ō i Edene], nā Grant Romney Clawson ; Te fa’aru’eraa i te ’Ō i Edene, nā Joseph Brickey
Tē vai nei te hō’ē fa’a’itera’a poto nō te fā o tō tātou orara’a i roto i te mau ha’api’ira’a a te peropheta Lehi nō ni’a i te ’ōmuara’a o te orara’a o te ta’ata i ni’a i te fenua nei. I te ’Ō i Edene, ’ua ora Adamu e ’o Eva i roto i te hete hara ’ore. ’Āhiri rāua i vai noa i roto i taua huru ra, « ’aita [i ti’a] ia rāua e ’oa’oa, nō te mea ’aita rāua i ’ite i te mamae ; ’aore a rāua e ha’apa’ora’a i tei maita’i, nō te mea ’aita rāua i ’ite i te hara » (2 Nephi 2:23). Nō reira, mai ia Lehi i fa’ata’a mai, « ’Ua hi’a Adamu ’ia vai te mau ta’ata, ’e tē vai nei te mau ta’ata ’ia noa’a tō rātou ’oa’oa » (2 Nephi 2:25 ; hi’o ato’a Mose 5:10–11).
’A tupu noa ai tātou i roto i te hō’ē ao hi’a, e ha’api’i tātou i te ta’a-’ē-ra’a i rotopū i te maita’i ’e te ’ino nā roto i te mea e ha’api’ihia ia tātou ’e nā roto i te mea tā tātou e fa’aruru nei. « ’E e tāmata [tātou] i te maramara, ’ia ti’a ia [tātou] ’ia ’ite i te faufa’a rahi o te maita’i » (Mose 6:55). E tupu mai te ’oa’oa ’a pāto’i ai tātou i te maramara, ’a poihere ’e ’a mau maite ai tātou i te maita’i ma te tu’utu’u ’ore.
Te ’itera’a i te ’oa’oa
Nō Tōna here hope roa ia tātou, te onoono nei tō tātou Metua i te Ao ra i te fa’a’ite mai ia tātou tōna ’oa’oa hope roa i teienei ē a muri noa atu. ’Ua riro noa na te reira ’ei ’avei’a nāna i roto i te mau mea ato’a mai mua-ra’a-ra, mai tāna fa’anahora’a hanahana nō te ’oa’oa ’e te tusia a tāna Tamaiti Fanau Tahi nō te ’aufau i te ho’o ’ia ora tātou.
E’ita te Atua e tāmata i te fa’ahepo mai i te ’oa’oa ’e ’aore rā i te pōpou i roto ia tātou, tē ha’api’i nei rā ’oia ia tātou nāhea e ’itehia ai te reira. Tē parau ato’a nei ’oia ia tātou i hea te ’oa’oa e ’ore ai e noa’a—« e ’ere roa [’e e’ita] te ’ino i te ’oa’oa » (Alama 41:10). E mea nā roto i tāna mau fa’auera’a e heheu mai ai tō tātou Metua i te Ao ra i te ’ē’a ē tae atu ai i te ’oa’oa.
Tē fa’aite nei peresideni Russell M. Nelson i te reira mai teie te huru :
« Terā rā, teie te parau mau rahi : tē parau onoono nei te ao ē, te mana, te mau tao’a rahi, te ro’o ’e te mau ’āreareara’a o te tino, e hōro’a mai te reira i te ’oa’oa, e’ita roa atu ïa ! E’ita tā te reira e nehenehe ! Tā te reira e hōro’a mai, ’o te hō’ē ïa ’ohipa mono faufa’a ’ore nō ‘te huru ha’amaita’ihia ’e te ’oa’oa o te feiā e ha’apa’o i te mau fa’auera’a a te Atua’ [Mosia 2:41].
« Te parau mau maori rā, e mea rohirohi a’e ia ’imi i te ’oa’oa i te vāhi e’ita roa atu e itehia ! Terā rā, mai te mea ē, e nati ’outou ia ’outou i ni’a ia Iesu Mesia, ’e e rave i te ’ohipa pae vārua i tītauhia nō te upo’oti’a i ni’a i te ao nei, tōna ’e tōna ana’e te mana nō te fa’ateitei ia ’outou i ni’a a’e i te ’umera’a a teie nei ao. »1
Nō reira, e ’itehia te ’oa’oa-ra’a-maoro i roto i te ha’apa’ora’a i te mau fa’auera’a a te Atua, ’e e ’itehia te mau fa’auera’a a te Atua i roto i te ’evanelia a Iesu Mesia. Terā rā, tei ia tātou te mā’itira’a. Mai te mea, i roto i tō tātou paruparu, e’ita e roa’a ia tātou ’ia ha’apa’o i te mau fa’auera’a i te roara’a o te hō’ē tau, e nehenehe tātou e ho’i-fa’ahou mai, e pāto’i i te maramara, ’e e ’imi ā i te maita’i. E’ita te aroha o te Atua e fa’a’ore i te hara—o te hāmani maita’i rā tē haru i te parau-ti’a—tera rā, nā roto i tāna tara’ehara, tē pupu nei Iesu Mesia i te fa’a’orera’a i te hara :
« [’Ua parau atu ra] Amuleka […] e haere mai te Fatu nō te fa’aora i tōna mau ta’ata ; ’āre’a rā ’aita ’oia e haere mai nō te fa’aora ia rātou i roto i tā rātou mau hara, e fa’aora rā ’oia ia rātou mai roto mai i tā rātou ra mau hara.
« ’E e mana tōna i hōro’ahia mai iāna e te Metua nō te fa’aora ia rātou i tā rātou mau hara maoti ho’i te tātarahapara’a ; nō reira, ’ua tono mai ’oia i tāna mau melahi nō te fa’a’ite mai i te mau parau tumu nō te tātarahapara’a, e tae ai rātou i raro a’e i te mana nō te Tāra’ehara, ’e i te fa’aorara’a o tō rātou vārua » (Helamana 5:10–11 ; ha’apāpūra’a tu’uhia atu).
’Ua parau Iesu :
« I haʼapa’o ʼoutou i tā’u ra parau, ʼe vai herehia atu ā ’outou e au ; mai iā’u i haʼapa’o i te parau ʼa tāʼu Metua ra, ʼe te vai herehia nei ā vau e āna.
« I parau atu vau ia ’outou i teie nei mau parau, ’ia vai ā tō’u ’oa’oa ia ’outou, ’e ’ia ti’a ato’a ho’i tō ’outou ’oa’oara’a » (Ioane 15:10–11).
’O te mea ïa tā Lehi i ’ite i roto i tāna moemoeā ’a tāmata ai ’oia i te hotu o te tumu rā’au nō te ora—’o te fa’ahōho’ara’a i te aroha o te Atua. ’Ua parau ’oia, « ’A ’amu ai au i taua hotu ra, ’ua ’ī ihora tō’u vārua i te ’oa’oa rahi roa » (1 Nephi 8:12 ; ’a hi’o ato’a 11:21–23).
’Ua heheu ato’a mai Lehi i te piti o te rāve’a e fa’atae ai tātou i te ’oa’oa i roto i tō tātou orara’a ’a parau ai ’oia ē, « Nō reira, ’ua tupu ihora tō’u hina’aro ’ia ’amu ato’a tō’u ’utuāfare i te [hotu] » (1 Nephi 8:12).
Tumu rā’au nō te ora, nā Kazuto Uota
Tauturu ia vetahi ’ē i te ’itera’a i te ’oa’oa
Mai te nūna’a o te ari’i Beniamina, « ’ī ihora [tātou] i te ’oa’oa » ’ia fāri’i ana’e tātou i te ha’amatarara’a o tā tātou mau hara ’e ’ia tāmata ho’i tātou i te « hau o te ā’au » (Mosia 4:3). E ’ī fa’ahou mai te reira i roto ia tātou ’ia hi’o ana’e tātou i rāpae nō te ’imi i te tauturu i te mau melo o te ’utuāfare ’e i tō rāpae’au ato’a ’ia fāri’i i taua iho ’oa’oa ra ’e te hau ra.
I tōna ’āpīra’a, ’ua ’imi Alama i te oa’oa i roto i te mau pāto’ira’a ato’a o te ’evanelia a Iesu Mesia. I muri a’e i tōna a’ora’ahia e te hō’ē melahi, ’ua nā roto atu ’oia i te ’ē’a roa o « te maramara » ē tae atu i « te maita’i » nā roto i te tātarahapa i « fātata i te pohe » (Mosia 27:28) ’e i te aroha rahi o te Fa’aora. Tau matahiti i muri mai, parau atu ra Alama ma te ’ana’anatae i tāna tamaiti ia Helamana :
« ’Auē ho’i te ’oa’oa ’e te māramarama fa’ahiahia tā’u i ’ite ; ’oia ïa, ’ua ’ī roa tō’u ’ā’au i te ’oa’oa, ’e ’ua rahi te reira mai te fāito ato’a o tō’u ra māuiui ! […]
« ’Oia ïa, mai te reira mai taime ē tae roa mai i teienei, ’ua rave au i te ’ohipa ma te fa’aea ’ore, ’ia ti’a iā’u ’ia fa’afāriu mai i te mau ta’ata ’ia tātarahapa ; ’ia ti’a iā’u ’ia arata’i mai ia rātou ’ia fāri’i i te ’oa’oa rahi ’o tā’u i fa’ari’i […]
« ’Oia ïa, ’e i teienei, inaha, e tā’u tamaiti, ’ua hōro’a mai te Fatu i te ’oa’oa rahi iā’u nei i te hotu nō tā’u ra mau ’ohipa.
« Nō te parau ho’i [te ’ēvaneria a Iesu Mesia] tāna i fa’a’ite mai iā’u nei, inaha, e rave rahi tei fānauhia i te Atua ra, ’e tei tāmata mai tā’u i tāmata » (Alama 36:20, 24–26).
I te hō’ē taime ’ē atu ā, ’ua ha’apāpū Alama :
« ’O teie ïa tō’u ’oa’oa, penei a’e ’o te riro vau ’ei mauha’a i te rima o te Atua nō te arata’i i te tahi mau ta’ata i te tātarahapara’a ; ’e ’o te reira ïa tō’u ’oa’oara’a.
« ’E inaha, ’ia ’ite au i tō’u ra mau taea’e e rave rahi ma te ’ā’au tātarahapa mau ra, ’e i te haerera’a mai i te Fatu tō rātou Atua, ’ua ’ī roa ihora tō’u ’ā’au i te ’oa’oa i reira » (Alama 29:9–10).
’Ua poro-haere-noa Alama i te ’oa’oa rahi i iho mai i roto iāna ’a manuia ai te tahi pae i te arata’ira’a mai i te mau vārua i te Mesia ra :
« ’Āre’a rā ’aita vau i ’oa’oa nō tō’u ana’e iho manuiara’a, ’ua rahi atu ā rā tō’u nei ’oa’oa nō te manuiara’a ato’a o tō’u ra mau taea’e, ’o tei haere atu i ni’a i te fenua ra nō Nephi.
« Inaha, ’ua rave itoito rātou i te ’ohipa, ’e ’ua fa’ahotu mai i te hotu rahi ; ’e ’ua rahi ho’i tā rātou utu’a maita’i !
« I teienei, ’ia ha’amana’o ana’e au i te manuia o tō’u ra mau taea’e, ’ua hōpoi-’ē-hia ïa tō’u ra vārua, ’e ’ua riro ïa mai te mea ra ē, ’ua ta’a ’ē te tino i te vārua, nō te rahi o tō’u ra ’oa’oa » (Alama 29:14–16).
E roa’a ato’a te reira huru ’oa’oa ia tātou ’a aroha ai tātou ia vetahi ’ē ma « te here ateate o te Mesia » (Moroni 7:47 ; hi’o ato’a i te ’īrava 48), ’a fa’a’ite ia rātou i te parau mau i fa’aho’ihia mai, ’e ’a ani ia rātou ’ia ha’aputuputu mai ’e te nūna’a o te fafaura’a.
O My Father [Tō’u Metua], nā Simon Dewey
Te ’oa’oa i roto i te ’ati rahi
’Eiaha tātou e mata’u ’ia riro te mau tāmatara’a ’e te mau ’arora’a ’o tā tātou e fa’aruru nei ihoa i te tāhuti nei ’ei fa’a’erera’a ’e ’aore rā ’ei ha’amoura’a i tō tātou ’oa’oa. ’O Alama, ’o ’oia te hō’ē o tei ’aufau i te utu’a rahi nō tōna tāvini pīpiri-’ore-ra’a ia vetahi ’ē. ’Ua fa’a’oroma’i ’oia i te tāpe’a-ra’a-hia ’oia, i te pororira’a ’e te po’iha-ra’a-roa, te mau tūpa’ira’a, te mau ’ōpuara’a e ha’apohe iāna, te mau fa’ao’ō’ora’a ’e te ti’avarura’a pinepine. E mea rā ho’i, ’ua « horomi’ihia tō rātou mau ’ati i roto i te ’oa’oa o te Mesia » (Alama 31:38). Penei a’e ’ua fa’ariro te mamae ’o Alama i te ’oa’oa i muri mai ’ei mea rahi atu ā.
Tē fa’aha’amana’o mai nei peresideni Nelson ia tātou ē, ’ua riro na te ’oa’oa i roto i te mamae o te Fa’aora, ’Oia—« ’o tei fa’a’oroma’i i te satauro, ’aore [ïa] i ha’apa’o i te ha’amā, i te maita’i [rā] i tu’uhia mai i mua i tāna aro » (Hebera 12:2).
« ’A mana’ona’o rā ! Nō te fa’a’oroma’i i te ’ohipa ri’ari’a rahi roa a’e i tupu na i ni’a i te fenua nei, ’ua rōtahi te mana’o ’o tō tātou Fa’aora i ni’a i te oa’oa !
« ’E e aha ho’i te ’oa’oa i tu’uhia i mua i tōna aro ? Pāpū roa, tei roto te ’oa’oa nō te tāmāra’a, te ora ’e te ha’apūaira’a ia tātou ; te ’oa’oa nō te ’aufaura’a i te mau hara a te ta’ata ato’a e tātarahapa ; te ’oa’oa nō te nehenehera’a ’outou ’e ’o vau e ho’i i te fare—ma te mā ’e te ti’amā—nō te ’ora i piha’i i tō tātou nau metua i te ra’i ra ’e te ’utuāfare.
« Mai te peu e rōtahi tātou i ni’a i te ’oa’oa e iho mai i roto ia tātou, ’e i tei herehia e tātou, e aha te mau mea tā tātou e nehenehe e fa’a’oroma’i, noātu e mea teimaha ’e te māuiui ’e te hāhano ’e te tano ’ore ’e te mara’a ’ore paha ? »2
Fa’atupu i te ’oa’oa-ra’a-maoro ’a nu’u ai i roto i te ’evanelia a Iesu Mesia ’e ’a tauturu ai ia vetahi ’ē ’ia nā reira ato’a. E iho mai te ’oa’oara’a maoro ’ia ora tātou i roto i te aroha o te Atua, ’ia ha’apa’o tātou i tāna mau fa’auera’a ’e ’ia fa’ari’i tātou i te fa’a’orera’a utu’a a te Fa’aora. I ni’a i te ’ē’a nō te ’evanelia, tē vai nei te ’oa’oa i roto i te tere, tē vai ato’a nei te ’oa’oa i roto i te tāpaera’a. ’O te ’evanelia a Iesu Mesia te ’ē’a nō te ’oa’oa i te mau mahana ato’a.
© 2023 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, February 2024. Language. 19276 895