“Andinyaŋa eke Kpukpru Owo, Ikɔ Abasi enɔde Kpukpru Owo, ” Liahona, Mar. 2024.
Ɔfiɔŋ-ke-ɔfiɔŋ Etop Liahona , Ɔyɔhɔ Ɔfiɔŋ Ita 2024
. Andinyaŋa eke Kpukpru Owo, Ikɔ Abasi enɔde Kpukpru Owo
Ikɔ Abasi, Erisio-isop, ye Eriset eke Jesus Christ ɔdiɔŋ ofuri nditɔ Abasi.
Christ ye Erenowo Akpaubeŋ, otode J. Kirk Richards, owo idiwetke isio.
Mfiak-men-ndi ikɔ Abasi Jesus Christ edi, akpa, ata-akpa, ye ke nsinsi, ntɔŋɔ edibighi inemesit, ata emem, ye idara ɔnɔ kpukpru owo ke mme ukperedem usen emi. Mme edidiɔŋ emi ɔwɔrɔde oto ikɔ Abasi ye otode anan-ibat mfonido eke Christ ikinaha nte edi ɔnɔ esisit ememek ibat owo, kini eset mme kini idahaemi.
Ke sutɔ unana ukeme emi nnyin ikpikerede, ndien kesioho mme idiɔkŋkpɔ emi ekemede edinam nnyin edibahare nnyin ye Enye ke esisit ini, Andinyaŋa ɔsɔŋɔ nnyin idem ete “ke imɔ iyenyan mme ubɔk Esie inɔ [nnyin] ke kpukpru ini” (Jacob 6:4), ke okot nnyin kpukpru ete idi itiene Enye inyuŋ idikop ima Esie.
Edidiɔŋ Ikɔ Abasi enɔde Kpukpru Owo ke Ererimbot
Ema efiak emen ikɔ Abasi Jesus Christ “edi ke mme ukperedem usen emi man ediyɔ … mme unana eke idut, imaan, usem, ye mme owo ke isɔŋ.”1 Ikɔ Abasi okpon akan kpukpru idut ye uduot kini asaŋade-ebe kpukpru mme adaŋa ido man ekpep ete ke “kpukpru owo edi ukem-ukem enɔ Abasi” (2 Nephi 26:33).2 Ŋwed Mormon ada nte akamba ntiense kabaŋa akpanikɔ emi.
Akwa ŋwed emi edi ntiense ke Christ eti kpukpru mme idut (se 2 Nephi 29:7) ndien ke eyeyarare “idemesie ɔnɔ mbon emi ebuotde idem ye enye, … [eyenyuŋ anam] ikpɔ utibe ŋkpɔ, mme idiɔŋɔ, ye mme utibe ŋkpɔ, ke ufɔt nditɔ owo”(2 Nephi 26:13). Kotu mme ikpɔ utibe ŋkpɔ, idiɔŋɔ, ye utibe ŋkpɔ emi edi edisuan ikɔ Abasi. Ntem, nnyin imidɔŋ mme ɔkwɔrɔ ikɔ Abasi eka ererimbot man etiŋ ikɔ ntiense ebaŋa eti mbuk oro. Nnyin nko imibuana ikɔ Abasi ye mbon emi ekanare nnyin ekuk. Edikama mme ukpɔhɔde itie-oku emi ekefiakde-emen-edi nnɔ odu-uwem ye akpaŋa-mkpa ɔsɔŋɔ ke uyɔhɔ ikɔ Abasi ke akpatre eyedu ɔnɔ ofuri eyeneren ye eyen-aŋwan eke ete ye eka eke heaven—andikibe, eke idahaemi, mme eke ini iso.
Akpan-ŋkpɔ ikɔ Abasi emi—ata akpan etop eke ofuri prophet ye apostle emi ekotde esin ke utom emi—edi ke Jesus edi Christ ndien ke Enye ekedi man edidiɔŋ kpukpru owo. Nte mbon Ufɔk Abasi Jesus Christ eke Ndisana Owo ke Ukperedem Usen, nnyin ifiori ite ke uwa ufak Esie odu ɔnɔ kpukpru owo ke errimbot.
Ufɔn edinyene Anana-adaŋa ye Nsinsi Erisio isop
Nte ami nsaŋade nkanare ererimbot, ami mmenyene nduŋɔre ye ata ediwak mbon Ufɔk Abasi. Ami mmenem esit edikop adaŋa nte mmɔ enyenede mme edidiɔŋ eke Erisio isop Jesus Christ ke uwem mmɔ, kpa ke ini mmɔ eyarare ubak idiɔkŋkpɔ emi ebighide. Enem didie koro ndɔŋesit eriyet eke Erisio-isop Esie odu ke kpukpru ini ɔnɔ kpukpru owo!
Amulek eketiŋ ete, “Koro ɔfɔn nte erisio isop odu, midihe ntre kpukpru owo eyetak.” Nnyin ke nsinsi ikpe “duɔ inyuŋ … isop, … ibɔhɔke oto ke erisio isop,” emi oyomde “akakan ye nsinsi uwa.” Mmɔdo “iduhe ŋkpɔ baba kiet emi akande anana adaŋa erisio isop emi ekemde ye idiɔkŋkpɔ ererimbot” (Alma 34:9, 10, 12).
Akwa prophet Jacob nko ama ekpep ete koro “mkpa odude ye kpukpru owo, … ana nte odudu eriset ke mkpa odu” man edida nnyin oduk iso Abasi(2 Nephi 9:6).
Ana ekakan idiɔkŋkpɔ ye mkpa mbiba. Emi ekedi iso utom eke Andinyaŋa, emi Enye ekenyenede ukeme anam okure ɔn ofuri nditɔ Abasi.
Gethsemana, otode J. Kirk Richards, owo idiwetke isio.
Nwaidem eke Andinyaŋa Nnyin
Ke akpatre okoneyo Esie ke uwem isɔŋ, Jesus Christ ebe oduk Iŋwaŋ Gethsemane. Do, Enye ama ɔtɔŋɔ edɔŋ kotu mme eto olive onyuŋ ɔtɔŋɔ edisuhɔre nduk ntutuŋɔ ufen eke afo ye ami midikemeke edifiɔk.
Do, ke Enye ɔkɔtɔŋɔ edida idiɔkŋkpɔ ererimbot ndori ke Idemesie. Enye okokop kpukpru ubiak, iduɔesit, ye ukut, ndien Enye ɔkɔyɔ kpukpru ubiak ye ufen emi afo, ami ye kpukpru ukpɔŋ emi ekedude mme edidude uwem ekpebɔde. Akwa ye anana adaŋa ufen emi “akanamde {Enye], … andikpon nkan ofuri ŋkpɔ, ndinyek oto ke ubiak, ndien iyip ɔkɔwɔrɔ ke kpukpru ndudu-idem” (Doctrine ye Covenants 19:18). Enye kpɔt ekenyene ukeme edi-nam emi.
Iduhe owo efen emi ɔkɔfɔnde akan edi-nam ntem
Ndikpe ekɔm urua idiɔkŋkpɔ.
Enye kpɔt ekekeme edikpɔhɔde inua-otop oro
Eke heaven onyuŋ enyime nnyin ibe iduk.3
Edikem ema eda Jesus eka Calvary, ndien ke ata idiɔk ukwaŋ ndaha ke mbuk ererimbot emi, ema ekɔŋ ke cross ewot. Iduhe owo ndomokiet emi ekpekemede edida uwem Esie mkpɔŋ Enye. Nte Ikpɔŋ-ikpɔŋ Eyen emi Abasi Obonde, Enye ama enyene odudu akan mkpa ikpɔkidem. Enye ama ekeme edibɔŋ akam nnɔ Ete Esie, ndien udim mme angel ekpekedi man edisobo mme andikituhɔre Enye onyuŋ owut edikara ubɔŋ Esie ke ofuri ŋkpɔ. “Edi didie ndien ke ikɔ-ŋwed Abasi ɔkpɔwɔrɔ osu,” Jesus okobup andiktap Enye, “sia oro akana edi ntre?” (Matthew 26:54).
Otode ke nsasana nsuhɔre-ibuot nnɔ Ete Esie—ye edisana ima enyenede ɔnɔ nnyin—Jesus enyime ayak uwem Esie ɔnɔ onyuŋ anam anan adaŋa ye nsinsi uwa isop okure, emi ekesimde ini edem ye ini iso ke ofuri nsinsi.
Edikan eke Andinyaŋa Nnyin
Jesus ama owuk mme Apostle Esie ete enam utom emi eka iso ke mkpa Esie okurede. Didie ke mmɔ edi-nam oro? Ediwak mmɔ ekedi mkpri ɔkɔ-iyak, inyuŋ iduhe owo mmɔ ndomokiet emi ɔkɔbɔde ukpep ke mme synagogue abaŋa ukwɔrɔ ikɔ Abasi. Ke ndaha oro, Ufɔk Abasi ama ekpere edisop. Edi mme Apostle edinyene ɔsɔŋɔ ndinam ikoot mmɔ nyuŋ nehede mbuk ererimbot nim.
Nso ikisin nsɔŋɔnda emi okotode oruk ata mmemidem oro? Adausuŋ ye ata-ifiɔk eke ufɔk Abasi Anglican Frederic Farrar ete: Odu ibɔrɔ kiet, ye kiet kpɔt edide —eriset ke mkpa. Ofuri mme akpakip edikan emi ekedi oto ke odudu eriset eke Christ.”4 Nte mme ntiense eke Ɔbɔŋ emi ekesetde, mme Apostle ema ediɔŋɔ ete ke iduhe ŋkpɔ ndomokiet emi ekemede editre nkɔri utom emi. Ntiense mmɔ ekedi ntɔŋɔ odudu iberedem ukem nte ebe-iso Ufɔk Abasi ekekande ofuri ubiɔŋɔre.
Kini Easter emi, nte kiet kotu edimek ntiense Esie, ami ndɔhɔ ke ediye ndaŋ-nsiere usenubɔk Ederi kiet, ke Ɔbɔŋ Jesus Christ ama eset ke mkpa man edisɔŋɔ nnyin idem onyuŋ ɔbuŋ mme eduat mkpa ɔnɔ kpukpru owo. Jesus Christ odu uwem! Otode ke Enye, mkpa idige akpatre-ŋkpɔ inɔ nnyin. Eriset ke mkpa edi akwa ye enɔ mfɔn ɔnɔ kpukpru owo.
Christ ye Mary Magdalene ke Itie-udi, otode Joseph Brickey
Etiene Christ
Ikɔ Abasi ye Erisio isop Jesus Christ odu ɔnɔ kpukpru owo—oro edi, kpukpru owo. Nkokure usuŋ emi nnyin idinyeneke ɔyɔhɔ edidiɔŋ eke uwa ufak Andinyaŋa edi ke owo kiet-kiet edinyime ikoot Esie: “Etiene Mi” (Matthew 11:28).
Nnyin idi itien Christ ke nte nnyin inyenede mbuɔtidem ke Enye inyuŋ ikabare esit. Nnyin idi itiene Enye ke nte nnyin inade baptism ke enyiŋ Esie inyuŋ ibɔ enɔ eke Edisana Spirit. Nnyin idi itiene Enye ke nte nnyin inimde ibet, ibɔ mme edinam ikɔ Abasi, ikpono ediomi, ibɔ mme ifiɔk-ukpep ke temple, inyuŋ idu utɔ uwem emi mme mbet Christ edude.
Ubak ini, mbufo eyekut ubiɔŋɔre ye edikpu. Esit mbufo eyeduɔ ɔnɔ mbufo mme ɔnɔ owo emi mbufo emade. Afo emekeme edikop iduɔesit oto ke idiɔkŋkpɔ eke mbon efen. Mme ndudue emi afo akanamde ekeme edi-di ikpɔ ndudue ekeme edi-nam fi okop ndik koro emem ye inemesit ama ɔkpɔŋ fi ke nsinsi. Ke oruk ini oro, ti ke Andinyaŋa idmenekede mbiomo idiɔkŋkpɔ kpɔt edi “ɔkɔ[bɔ] ofuri oruk ubiak ye ukut ye idomo nko” (Alma 7:11), esiinede okim! Otode ke se Enye ɔkɔbɔ ɔnɔ mbufo, Enye ɔdiɔŋɔ nte ediŋwamde mbufo ke owo-ke owo ke nte afo enyimede ikoot edikpuhɔ uwem Esie eke: “Edi eitiene Mi.”
Edara Edi-di eke Kpukpru Owo
Jesus Christ ama anam aŋwaŋa ke ofuri nditɔ eke Ete Heaven enyene ukem-ukem unen edibɔ edidiɔŋ eke ikɔ Abasi ye Erisio isop Esie. Enye eti nnyin ete ke kpukpru owo “enyene eti-ifet nte owo enye eken, ndien iduhe owo ekededi emi ekpande” (2 Nephi 26:28).
“Enye okot mmɔ kpukpru ete edoi eitene imɔ enyuŋ editabi mfɔn esie, ndien enye inyimke owo ndomokiet emi edide etiene Enye, obubit ye afia, ofin ye eyen-isɔŋ, erenowo ye ŋwan” (2 Nephi 26:33).
“Enye okot kpukpru mmɔ”—oro ɔwɔrɔ kpukpru nnyin! Nnyin idiniimke odoro-odoro idiɔŋɔ ye ikpikpu ŋkpɔ ke idem nnyin mme ke mbon efen. Inaha nte nnyin inim ubiɔŋɔre ekededi inɔ ima Andinyaŋa mme inyime mme ekikere ke nnyin mme mbon efen imibe unyaŋa Esie. Nte ami nketiŋde ke akpa ini ke, “Idige mmem-mmem inɔ [owo ekededi] ediduɔ mbe anana adaŋa uŋwaŋa eke uyama Erisio isop Christ.”5
Edi, nte Sister Holland ye ami ikikpepde ke esisit ɔfiɔŋ ifaŋ mbemiso enye ebe efep, ewuk nnyin ete “inyene ata-ima, emi ata -ma edide ima” (2 Nephi 26:30).6 emi edi ima eke Andinyaŋa owutde ɔnɔ nnyin, koro “Enye inamke ŋkpɔ ndomokiet ke ebede ke ufɔn ererimbot; koro enye amade ererimbot, kpa ke enye ndiyak uwem esie man enye ekpeduri kpukpru owo ɔnɔ idemesie” (2 Nephi 26:24).
Ami ntiŋ ikɔ ntiense nte ke ikɔ Abasi ye Erisio isop Jesus Christ odu ɔnɔ kpukpru owo. Ami mbeŋe yak mbufo edidara imum mme edidiɔŋ emi Enye adade edi.
©2024 eketode Intellectual Reserve, Inc. Ekpan kpukpru unen ndimiŋ nwed emi. Ekemiŋ ke USA. Enyime edikabare ke Ikɔ Mbakara: 6/19. Enyime ndikabare: 6/19. Ɔfiɔŋ-ke-ɔfiɔŋ Edikabare Etop eke Liahona, Ɔyɔhɔ Ɔfiɔŋ Ita 2024. Efik. 19284 553