Ang Manluluwas sang tanan, Ebanghelyo para sa Tanan

Ni Pangulong Jeffrey R. Holland

Akting nga Pangulo sang Korum sang Dose ka Apostoles

Ang Ebanghelyo, Pagbayad-Sala, kag Pagkabanhaw ni Jesucristo nagabugay sang tanan nga anak sang Dios

Ang ginpanumbalik nga ebanghelyo ni Jesucristo, una-una gid, kag asta magsan-o, ang ginahalinan sang nagadugay nga kasadya, matuod-tuod nga kalinong, kag kalipay para sa tanan sa sining ulihing mga adlaw. Ang mga bugay halin sa ebanghelyo kag sa wala nagahubas nga kaayo ni Cristo wala ginatigana sa pila lang ka pinili nga mga tawo, sang dumaan man ukon sa sini nga mga panahon.

Bisan daw ano pa kita ka kulabos sa aton pamatyagan, kag bisan pa sang mga sala nga mahimo nagadistansya sa aton sa Iya sa pila ka tion, ang aton Manluluwas nagapasalig sa aton nga “ginauntay niya ang iya mga kamot sa [aton] sa bilog nga adlaw” (Jacob 6:4), nga ginaagda kita tanan nga magpalapit sa Iya kag batyagon ang Iya pagpalangga.

Mga Bugay sang Ebanghelyo para sa Bilog nga Kalibutan

Ang ebanghelyo ni Jesucristo “napanumbalik sa sining ulihing mga adlaw agud pun-an ang … mga panginahanglan sang tagsa ka nasyon, kaliwat, hinambalan, kag katawhan sa duta.”¹ Ang ebanghelyo para sa tanan bisan ano man ang ila nasyonalidad kag kolor sa iya sini pag-angot sang mga kultura agud itudlo nga “ang tanan palareho sa Dios ” (2 Nefi 26:33).² Ang Libro ni Mormon nagatindog bilang pinasahi nga saksi sa sining kamatuoran.

Ining dalayawon nga sinulatan nagapamatuod nga si Cristo nagadumdum sang tanan nga nasyon (tan-awa sa 2 Nefi 29:7) kag magapakita sia “sang iya kaugalingon sa tanan sinang mga nagapati sa iya, … [kag nagahimo] sang dalagko nga mga milagro, mga tanda, kag mga katilingalahan sa tunga sang mga anak sang katawhan” (2 Nefi 26:13). Lakip sa sining dalagko nga mga milagro, mga tanda, kag mga katilingalahan ang pagpalapnag sang ebanghelyo. Gani, nagapadala kita sang mga misyonero sa bilog nga kalibutan agud magsaksi sang iya sini maayo nga balita. Ginapaambit man naton ang ebanghelyo sa mga ara sa aton palibot. Ang paggamit sang ginpanumbalik nga mga yabi sang priesthood para sa mga buhi kag mga patay nagasiguro nga ang kabug-osan sang ebanghelyo sa ulihi matigayon sang tagsa ka anak nga lalaki kag anak nga babayi sang aton langitnon nga mga ginikanan—sadto, subong, ukon sa palaabuton.

Ang sentro sining ebanghelyo—ang panguna nga mensahe sang tagsa ka propeta kag apostoles nga gintawag sa buluhaton—amo nga si Jesus ang Cristo kag nag-abot Sia agud bugayan ang tanan. Bilang mga miyembro sang Ang Simbahan ni Jesucristo sang mga Santos sa Ulihing mga Adlaw, ginapahayag naton nga ang Iya nagabayad-sala nga sakripisyo para sa tanan sa bilog nga kalibutan.

Ang Kakinahanglanon sang Wala Dulonan kag Wala Katapusan nga Pagbayad-Sala

Sa paglibot ko sa bilog nga kalibutan, nagahiwat ako sang mga interbyu sa madamo nga nagkalainlain nga mga miyembro sang Simbahan. Nagakainspirar ako mamati kon paano nila nagakabatyagan ang mga bugay sang Pagbayad-sala ni Jesucristo sa ila mga kabuhi, bisan pa kon nagakumpisar sila sang madugay na nga mga sala. Daw ano kanami nga inang nagatinlo nga pagpasulhay sang Iya Pagbayad-sala sarang naton tanan maangkon sa tanan nga tion!

“Kay kinahanglanon gid nga himuon ang pagbayad-sala,”pahayag ni Amulek, “indi gani ang tanan nga tawo pat-od gid nga madula.” Kita kuntani tubtob magsan-o “nalaglag kag … madula, … luwas lang nga ini paagi sa pagbayad-sala,” nga nagpangayo sang “wala dulonan kag wala katapusan nga sakripisyo.” Kay “wala sing bisan ano nga butang nga kabus sa wala’y dulonan nga pagbayad-sala nga mangin igo na para sa mga sala sang kalibutan.” (Alma 34:9, 10, 12).

Ang dalayawon nga propetang si Jacob nagtudlo man nga tungod “ang kamatayon nag-abot sa tanan nga tawo, … may ginakinahanglan gid nga isa ka gahum sang pagkabanhaw” agud dalhon kita sa presensya sang Dios (2 Nefi 9:6).

Ang sala kag kamatayon pareho nga kinahanglan daugon. Amo ini ang misyon sang Manluluwas, nga maisog Niya nga gintuman para sa tanan nga mga anak sang Dios.

Gethsemane [Getsemani], ni J. Kirk Richards, indi pwede kopyahon

Ang Sakripisyo sang Aton Manluluwas

Sa katapusan nga gab-i sang Iya kabuhi sa duta, si Jesucristo nagsulod sa Hardin sang Getsemani. Didto, nagluhod Sia sa tunga sang mga kahoy nga olivo kag gin-antos ang sobra kag nagalala nga kasakit nga indi gid nimo ukon nakon maagyan.

Didto, ginsugdan Niya ang pagpas-an sa Iya kaugalingon sang mga sala sang kalibutan. Nabatyagan Niya ang tagsa ka kasakit, kalain sang buot, kag kasubo, kag ginbatas Niya ang tanan nga kalisod kag pag-antos nga naeksperiyensiahan nimo kag nakon, kag sang tagsa ka kalag nga nagkabuhi ukon magakabuhi pa. Ining daku kag wala dulonan nga pag-antos “nagpakurog sa [Iya] … nga pinakagamhanan sa tanan, bangod sa kasakit, kag nagwa ang dugo halin sa tagsa ka buho-buho sang panit (Doktrina kag mga Kasugtanan 19:18). Sia lang gid ang makahimo sini.

Wala na sing iban pa nga angay
Magbayad sa sala.
Sia gid lang makabukas
Sang langit kag pasudlon ’ta.3

Si Jesus dayon gindala sa Kalbaryo, kag sa tion sang pinakasubo nga inhustisya sa kasaysayan sining kalibutan, ginlansang Sia sa krus. Wala gid sang pwede makakuha sa Iya sang Iya kabuhi. Bilang ang Bugtong nga Inanak sang Dios, may gahum Sia batok sa kamatayon. Pwede lang Sia kuntani magpangamuyo sa Iya Amay, kag guban sang mga anghel ang magaabot agud daugon ang Iya mga tagsakit kag ipakita ang Iya pagkagamhanan sa tanan nga butang. “Ugaling kon amo ina, ano bala ang pagkatuman sang ginasiling sang mga kasulatan,” pamangkot ni Jesus sa tion sang pagtraidor sa Iya, “nga amo gid ini ang dapat matabo?” (Mateo 26:54).

Tungod sa perpekto nga pagkamatinumanon sa Iya Amay—kag perpekto nga pagpalangga sa aton—hugot sa buot nga ginhatag ni Jesus ang Iya kabuhi kag ginhuman ang Iya wala dulonan nga sakripisyo sang pagbayad-sala, nga nagalab-ot pabalik sa ginsuguran kag nagasakop sang bilog nga wala katapusan.

Ang Kadalag-an sang Aton Manluluwas

Si Jesus nagsugo sa Iya mga Apostoles nga padayonon ang Iya buluhaton pagkatapos sang Iya kamatayon. Paano nila ini himuon? Pila sa ila simple lang nga mga mangingisda, kag wala sing may nahanas sa mga sinagoga para sa pag-alagad. Sa sina nga tion, ang Simbahan ni Cristo daw natalana nga madula. Pero ang mga Apostoles nakatipon sang kusog nga batonon ang ila mga tawag sa pag-alagad kag bag-ohon ang kasaysayan sang kalibutan.

Ano ang nagdala sang kusog halin sa klaro nga kahuyang? Ang iskolar kag lider sang Anglikano nga simbahan nga si Frederic Farrar nagsiling: “Isa, kag isa lang gid ang posible nga sabat—ang pagkabanhaw halin sa minatay. Tanan sining daku gid nga pagbag-o tungod sa gahum sang pagkabanhaw ni Cristo.”⁴ Bilang mga saksi sang nabanhaw nga Ginuo, ang mga Apostoles nakahibalo nga wala sang makapugong sa sining buluhaton nga magpadayon. Ang ila saksi tuburan sang nagapabaskog nga gahum sa paglampuwas sang dumaan nga Simbahan sa tanan nga upang.

Sa sining panahon sang pagsaulog sang Pagkabanhaw, bilang isa sang Iya gin-ordin nga mga saksi, ginapahayag ko nga temprano pa sang isa ka matahum nga Domingo sang aga, ang Ginuong Jesucristo nagbangon halin sa minatay agud pabakuron kita kag bugtuon ang mga gapos sang kamatayon para sa tanan. Si Jesucristo buhi! Tungod sa Iya, indi naton katapusan ang kamatayon. Ang Pagkabanhaw libre kag talapud nga regalo ni Cristo sa tanan.

Christ and Mary at the Tomb [Si Cristo kag si Maria sa Lulubngan], ni Joseph Brickey

Magpalapit kay Cristo

Ang ebanghelyo kag Pagbayad-sala ni Jesucristo para sa tanan—buot silingon, kada isa. Ang solo nga paagi nga maeksperiyensiahan naton ang tanan nga bugay sang nagabayad-sala nga sakripisyo sang Manluluwas amo ang personal nga pagbaton sang Iya imbitasyon: “Palapit kamo sa akon” (Mateo 11:28).

Nagapalapit kita kay Cristo sa pagpakita naton sang pagtuo sa Iya kag paghinulsol. Nagapalapit kita sa Iya sa aton pagpabunyag sa Iya ngalan kag pagbaton sang dulot sang Balaan nga Espiritu. Nagapalapit kita sa Iya sa pagtuman naton sang mga kasugoan, pagbaton sang mga ordinansa, pagtipig sang mga kasugtanan, pagpakamahal sang mga eksperiyensia sa templo, kag pagpangabuhi sang klase sang kabuhi sang mga disipulo ni Cristo.

May mga tinion nga magapangatubang kamo sang kaluya sang buot ukon kapaslawan. Mahimo nga mangin tuman kamo kasubo para sa inyo kaugalingon ukon sa inyo pinalangga. Mahimo nga ginapabug-atan kamo sang sala sang iban. Ang mga sayop nga inyo nahimo—nga basi mga mabug-at—mahimo magpakulba sa inyo nga indi na kamo makaangkon sang kalinong kag kalipay asta magsan-o. Sa sinang mga tinion, dumduma nga ang Manluluwas wala lang nagakuha sang kabug-at sang sala kundi “[nag]batas sang mga kasakit kag mga pag-antos kag mga pagsulay sang tagsa ka sahi” (Alma 7:11), dala na ang imo! Tungod sang Iya gin-agyan para sa imo, personal Niya nga nahibal-an kon paano ka buligan sa imo pagbaton sang Iya nagabag-o kabuhi nga imbitasyon: “Palapit kamo sa akon.”

Ang Tanan Ginaabi-abi

Ginklaro ni Jesucristo nga ang tanan nga anak sang Amay nga Langitnon may palareho nga diretso sa mga bugay sang Iya ebanghelyo kag Pagbayad-sala. Ginapahanumdum Niya kita nga ang tanan “may pribilihiyo ang isa pareho sa isa, kag wala sing bisan isa nga ginadumilian. ” (2 Nefi 26:28).

“Ginaagda Niya sila tanan sa pagpalapit sa iya kag mag-ambit sang iya kaayo; kag wala sia sing ginadumilian nga bisan sin-o nga nagapalapit sa iya, itom kag puti, ulipon kag hilway, lalaki kag babayi” (2 Nefi 26:33).

“Ginaagda Niya sila tanan”—buot silingon kita tanan! Indi kita dapat magbutang sang hapaw nga mga tatak kag artipisyal nga mga pagkilala sa aton mga kaugalingon ukon sa iban. Indi kita dapat magbutang sang mga lipod sa gugma sang Manluluwas ukon magpamensar nga kita ukon ang iban malayo na sa Niya pagdab-ot. Sa nasiling ko na sang nagligad, “Indi posible nga ang [bisan sin-o] maglugdang sing mas madalum sangsa masilakan sang kasanag sang Pagbayad-sala ni Cristo.”⁵

Kundi, pareho sang gintudlo namon ni Sister Holland pila lang ka bulan antes sia magtaliwan, ginasugo kita nga dapat kita “may putli nga paghigugma, nga ang amo nga putli nga paghigugma amo ang pagpalangga” (2 Nefi 26:30).⁶ Ini ang pagpalangga nga ginapakita sang Manluluwas sa aton, kay “Wala Sia sing ginahimo nga bisan ano luwas lang nga ini para sa benepisyo sang kalibutan; kay palangga niya ang kalibutan, bisan nga ginhatag niya ang iya kaugalingon nga kabuhi agud mapapalapit niya ang tanan nga tawo sa iya” (2 Nefi 26:24).

Nagapamatuod ako nga ang ebanghelyo kag ang Pagbayad-sala ni Jesucristo para sa tanan nga tawo. Pangamuyo ko nga malipayon ninyo nga batunon ang mga bugay nga Iya ginadala.

© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, March 2024. Hiligaynon. 19284 861