“Ti Mangisalakan ti Amin, Ebanghelio para iti Amin,“ Liahona, Mar. 2024.
Binulan a Mensahe ti Liahona , Marso 2024
Ti Mangisalakan ti Amin, Ebanghelio para iti Amin
Ti ebanghelio, Pannubbot, ken Panagungar ni Jesucristo ti mangbendision kadagiti amin nga annak ti Dios.
Ni Cristo ken ti Lalaki a Di Makagunay, ni J. Kirk Richards, saan a mabalin a kopyaen
Ti naisubli nga ebanghelio ni Jesucristo ti umuna, kangrunaan, ken agnanayon a pagtaudan ti manayon a kinaragsak, pudno a kinatalna, ken rag-o para iti tunggal maysa kadagitoy maudi nga aldaw. Dagiti bendision nga aggapu iti ebanghelio ken iti awan patinggana a kinamanagparabur ket saan laeng a para iti sumagmamano a napili, idi un-unana wenno iti moderno a panawen.
Numanpay di umdas ti panagriknatayo, ken iti laksid dagiti basol a mangiyadayo kadatayo Kenkuana iti apagkanito, ipanamnama ti Mangisalakantayo nga “intanggayana dagiti imana [kadatayo] iti agmalem” (Jacob 6:4), a mangaw-awis kadatayo nga umay Kenkuana ken riknaen ti ayatna.
Parabur ti Ebanghelio para iti Intero a Lubong
Ti ebanghelio ni Jesucristo “naisubli iti ud-udina nga aldaw tapno maipaay dagiti … kasapulan iti tunggal pagilian, kakabsat, pagsasao, ken tattao iti rabaw ti daga.”1 Maipaay ti ebanghelio kadagiti amin a tattao, aniaman ti nasionalidad wenno kolorda bayat ti pananglabasna ti amin a linia ti kultura a mangisuro nga “amin ket agpapada iti Dios” (2 Nephi 26:33).2 Agtakder ti Libro ni Mormon a kas naisangsangayan a saksi iti daytoy a kinapudno.
Paneknekan daytoy naindaklan a rekord a laglagipen ni Cristo ti amin a pagilian (kitaen iti 2 Nephi 29:7) ken ipakitananto “ti bagina kadagiti amin a mamati kenkuana, … [ken agaramid iti] naindaklan a milagro, tanda, ken pagsidsiddaawan, kadagiti annak ti tattao” (2 Nephi 26:13). Mairaman kadagitoy a naindaklan a milagro, tanda, ken pagsidsiddaawan ket ti pannakaiwaras ti ebanghelio. Isu nga, agipatulodtayo kadagiti misionario iti intero a lubong a mangipaneknek iti naimbag a damag. Ibinglaytayo met ti ebanghelio kadagiti adda iti aglawlawtayo. Ti panangusar kadagiti naisubli a tulbek ti priesthood para kadagiti sibibiag ken dagiti natay ket manamnama a ti pakabuklan ti ebanghelio ket maited iti tunggal anak a lalaki ken anak a babai ti nailangitan a nagannak—iti napalabas, iti agdama, wenno iti masakbayan.
Ti puso daytoy nga ebanghelio—ti kangrunaan a mensahe ti tunggal propeta ken apostol a naawagan iti trabaho—ket, ni Jesus ti Cristo ken immay Isuna tapno paraburanna ti amin. Kas miembro ti Ti Simbaan ni Jesucristo dagiti Santo iti Ud-udina nga Aldaw, iwaragawagmi a ti pannubbot a sakripisiona ket para iti intero a lubong.
Ti Panagkasapulan iti Awan Patinggana ken Agnanayon a Pannubbot
Bayat ti panagdaliasatko iti lubong, mangangayak kadagiti interbyu kadagiti nadumaduma a miembro ti Simbaan. Naparegtaak a dumngeg no kasano a mariknada dagiti bendision ti Pannubbot ni Jesucristo iti biagda, uray no ipudnoda ti sumagmamano a nabayagen a basol. Anian a nakaskasdaaw a ti makadalus a liwliwa ti Pannubbotna ket kanayon a magun-odtayo amin!
“Masapul nga adda maaramid a pannubbot,” imbaga ni Amulek, “ta no saan, di maliklikan a madadael ti amin a sangataw-an.” Agnanayontayo a “natnag ken … napukaw, … malaksid no babaen ti pannubbot,” a kasapulan ti “awan patinggana ken agnanayon a sakripisio.” Ta “awan ngarud ti uray ania a banag nga agkamtud iti awan umarpad a pannubbot a mayannatup iti basbasol ti lubong” (Alma 34:9, 10, 12).
Insuro pay ti naindaklan a ni propeta Jacob a gapu ta “matay amin a tao, … masapul nga adda bileg ti panagungar” a mangiyeg kadatayo iti sangwanan ti Dios (2 Nephi 9:6).
Agpada a kasapulan a parmeken ti basol ken ipapatay. Daytoy ti mision ti Mangisalakan, a situtured a tinungpalna para iti amin nga annak ti Dios.
Getsemani, ni J. Kirk Richards, saan a mabalin a kopyaen
Ti Sakripisio ti Mangisalakantayo
Iti maudi a rabiina iti mortalidad, simrek ni Jesucristo iti Minuyongan ti Getsemani. Sadiay, nagparintumeng Isuna iti tengnga dagiti kayo ti olibo ket nakarikna iti nakaro unay a panagsagaba a ditayto pulos maammuan.
Sadiay, rinugianna a sinubbot iti Bagina dagiti basbasol ti lubong. Nariknana ti tunggal saem, nakaro a liday, ken ladingit, ken nagibtur iti amin a panagleddaang ken panagsagaba a napadasam, a napadasak ken ti amin a kararua a nagbiag wenno agbiagto pay laeng. Daytoy dakkel ken awan patinggana a panagsagaba ti “nangipaay [Kenkuana], … a kaindaklan ti amin, nga aggarigenggen gapu iti saem, ken agdara iti tunggal teterreman” (Doktrina ken Katulagan 19:18). Isuna laeng ti nakaaramid daytoy.
Awan ti sabali nga umdas a nasayaat
Tapno mabayadan ti gatad ti basol.
Isuna laeng ti mabalin a manglukat ti ruangan
Ti langit ket pastrekennatayo.3
Kalpasanna naipan ni Jesus idiay Calvario, ket iti nakalkaldaang unay a di nainkalintegan a kanito iti pakasaritaan daytoy a lubong, Isu ket nailansa iti krus. Awan ti makaala iti biagna manipud Kenkuana. Kas Bugbugtong nga Anak ti Dios, addaan isuna ti bileg a mangrimbaw iti pisikal nga ipapatay. Mabalinna koma ti agkararag iti Amana, ket immay koma dagiti lehion dagiti anghel tapno parmekenda dagiti manangparparigatna ken ipakitada ti panangiturayna kadagiti amin a banag. “Ngem kasano ngarud a matungpal dagiti nasantuan a kasuratan,” insaludsod ni Jesus iti pannakaliputna, “a kasta ti masapul a mapasamak?” (Mateo 26:54).
Gapu iti naan-anay a panagtulnogna iti Amana—ken naan-anay nga ayatna kadatayo—situtulok nga inted ni Jesus ti biagna ken nakompletona ti awan patinggana ken agnanayon a pangsubbot a sakripisiona, a mangrugi manipud idi un-unana ken agtultuloy iti agnanayon.
Ti Balligi ti Mangisalakantayo
Imbaon ni Jesus dagiti Apostolna nga ituloyda ti trabahona kalpasan ti ipapatayna. Kasano ti panangaramidda daytoy? Sumagmamano kadakuada ti simple laeng a mangngalap, ken awan kadakuada ti nasanay kadagiti sinagoga para iti ministerio. Iti dayta a kanito, kasla naikeddeng a maungaw ti Simbaan ni Cristo. Ngem nakasarak dagiti Apostol iti pigsa a mangawat iti dadagsen iti awagda ken mangsukog iti pakasaritaan ti lubong.
Ania ti nakaigapuan ti panagtaud ti pigsa manipud iti kasta a nabatad a kinakapuy? Kinuna ti lider ti simbaan ti Anglican ken eskolar a ni Frederic Farrar: “Adda maysa, ken maymaysa laeng a posible a sungbat—ti panagungar manipud kadagiti natay. Amin daytoy nalawa a rebolusion ket gapu iti bileg ti panagungar ni Cristo.”4 Kas saksi ti nagungar nga Apo, ammo dagiti Apostol nga awan ti makalapped iti panagrang-ay daytoy nga aramid. Ti pammaneknekda ket nagbalin a pagtaudan ti mangtaginayon a bileg bayat a pinarmek ti immuna a Simbaan ti amin a pakarigatan.
Iti daytoy a panawen ti Paskua ti Panagungar, kas maysa kadagiti naordenan a saksina, ipakdaarko nga iti maysa a napintas nga agsapa ti Domingo, nagungar ni Apo Jesucristo tapno papigsaennatayo ken pinekkana ti begkes ni patay para iti tunggal maysa. Sibibiag ni Jesucristo! Gapu Kenkuana, saan a kanibusanantayo ti patay. Libre ken sapasap a sagut ni Cristo para iti amin ti Panagungar.
Ni Cristo ken ni Maria iti Tanem, ni Joseph Brickey
Umasidegkayo ken ni Cristo
Ti ebanghelio ken Pannubbot ni Jesucristo ket para iti amin—kayatna a sawen, para iti tunggal maysa. Ti kakaisuna a wagas a pannakapadastayo kadagiti naan-anay a bendision ti pangsubbot a sakripisio ti Mangisalakan ket babaen ti panangawat ti tunggal maysa iti awisna: “Umaykayo kaniak” (Mateo 11:28).
Umasidegtayo ken ni Cristo no adda pammatitayo Kenkuana ken agbabawitayo. Umasidegtayo Kenkuana no mabuniagantayo iti naganna ken awatentayo iti sagut ti Espiritu Santo. Umasidegtayo Kenkuana bayat ti panangtungpaltayo kadagiti bilin, umawat kadagiti ordinansa, dayawen dagiti katulagan, panangarakup kadagiti padas iti templo, ken agbiag kas iti kita ti panagbiag dagiti adalan ni Cristo.
No dadduma, maipasangokayo iti pannakapaay ken pannakaupay. Mabalin a makariknakayo wenno ti tao nga ay-atenyo iti nakaro a ladingit. Mabalin a madagsenankayo kadagiti basol ti sabsabali. Dagiti biddut nga inaramidyo—a mabalin a nakaro—ket mabalin a pakaigapuan ti panagbutengyo a ti talna ken ragsak ket pimmanawen kadakayo iti agnanayon. Kadagitoy kastoy a gundaway, laglagipenyo a ti Mangisalakan ket saanna laeng nga inikkat ti dadagsen ti basol no di pay ket “nagitured iti saem ken rigat ken amin a kita ti sulisog” (Alma 7:11), agraman dagiti basolyo! Gapu iti sinagabana para kadakayo, ammona a mismo no kasano a matulongannakayo bayat ti panangawatyo ti makapagbalbaliw-biag nga awisna: “Umaykayo kaniak.”
Amin ket Maawat
Nalawag nga imbaga ni Jesucristo nga amin nga annak ti Nailangitan nga Ama ket agpapada a maikari kadagiti parabur ti ebanghelio ken iti Pannubbotna. Impalagipna kadatayo nga amin “ket naikkan iti gundaway a kas iti tunggal maysa, ket awan ti mapawilan” (2 Nephi 26:28).
“Awisenna amin ida nga umasideg kenkuana ket makiranudda iti kinasayaatna; ket awan ti idaddadumana kadagiti umasideg kenkuana, nangisit ken puraw, adipen ken nawaya; lalaki ken babai” (2 Nephi 26:33).
“Awisenna amin ida”—kayatna a sawen datayo amin! Saantayo a mangikabil kadagiti parparawpaw nga etiketa ken artipisial a panaglalasin iti bagbagitayo wenno iti sabali. Ditay koma pulos mangikabil iti aniaman a lapped iti panagayat ti Mangisalakan wenno panunotentayo a datayo wenno dagiti sabali ket adayo iti Dios. Kas kinunak idin, “Saan a posible a lumnedka iti nababbaba ngem iti masilnagan ti awan patinggana a silaw ti Pannubbot ni Cristo.”5
Imbes ketdi, kas insuromi ken ni Sister Holland sumagmamano a bulan sakbay ti ipupusayna, nabilintayo a “maaddaan ti panangngaasi, ta ayat ti panangngaasi” (2 Nephi 26:30).6 Daytoy ti ayat nga impakita ti Mangisalakan kadatayo, ta “saan nga agaramid iti ania man malaksid ti pagimbagan ti lubong; ta patpatgenna ti lubong, uray pay no ipustana ti biagna no mayasidegna la ketdi amin dagiti tao kenkuana” (2 Nephi 26:24).
Paneknekak a ti ebanghelio ken ti Pannubbot ni Jesucristo ket para iti amin a tao. Ikararagko a sirarag-o kayo a mangarakup kadagiti parabur nga itdenna.
© 2024 by Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, Marso 2024. Ilokano. 19284 864