Mwet Lahngo luhn Nohfohn, Wosasuc luhn Nohfohn

Sel Prestuhn Jeffrey R. Holland

Ahol Prestuhn ke U luhn Mwet Sap Singucul Luo

Wosasuc, Iwaclah, ac Moulyak luhn Jisus Kraist ahkinsewowoye nohfohn tuhlihk nuhtin God.

Wosasuc luhn Jisus Kraist suc ma fohlohkyak pa use engan ma pahtpaht, mislac pwacye, ac pwacr nuh sin mwet nuhkwewa ke pacl inge. Mwe insewowo ma tuhkuh ke wosasuc ac ke kuhlwacng lal Kraist tiac ma nuh sin mwet na suhpuhs muhkwena , ke pacl met ah ke in pacl inge.

Kuht finne puhla muh kuht tiac fal, ac finne ma koluk lasr ahkloesyaclihk inmahsrlosr luhkwel ke sie puhluhn pacl, Mwet Lahngo lasr ahkkweye kuht lah “el ahsrwelihk pahol nuh sesr ke pacl nuhkwewa” (Jacob 6:4), sulikuht nohfohn in fahsruh nuh yohrohl ac puhla luhngse lal.

Mwe insewowo luhn wosasuc nuhsin facluh nohfohn

Wosasuc luhn Jisus Kraist “fohlohkihnyuhkyak ke lwen sahflah inge in kahsruh … enenuh luhn muhtuhnfacl nuhkwewa, kain in mwet, sramsram, ac mwet fin facluh se inge.”¹ Wosasuc se inge el fuhlwact liki muhtuhnfacl nuhkwewa ac el puhsrallah kain in mwet nuhkwewa ke kain in facsin in luti lah “nohfohn oacna sie sel”2 Nephi 26:33).² Puk luhn Mormon el sie mwe loh ahkpwacyei ma se inge.

Ma suhmuhslah se inge fahkwack lah Kraist el esam muhtuhnfacl nuhkwewa (liye 2 Nephi 29:7) ac fah sikyang nuh sin “selos suc luhlahlfongi in el, … ac el ac fah oruh ma usrnguck, akucl, ac ma wolacna, inmahsrlon tuhlihk nuhtin mwet” (2 Nephi 26:13). Sie sin usrnguck, akucl, ac ma wolacna ingacn pa fahsrwelihk luhn wosasuc uh. Pwacnwacng, kuht suhpwaclihk misinacri uh fin facluh nohfohn in fahkwack ke pweng wo inge. Kuht oacyacpac akacsruhi wosasuc uh nuh sin mwet rauni kuhtlac uh. Orekmakihnyen ki luhn pristut nuh sin mwet moul ac mwet misac uh ahkkweye fohnlah luhn wosasuc se inge mukul ac muhtwacn nuhkwewa in kuh in eis ke pacl somlah, pacl inge, ac pacl fahsruh uh.

Ma yohk srihpac emet ke wosasuc se inge—mwe fahkwack yohk se luhn mwet pahluh ac mwet sap nohfohn ma pahng in kuhlwacnsap ke alu uh—pa Jisus pa Kraist ac el tuhkuh in ahkinsewowoye mwet nuhkwewa. Ke kuht ekihn mempucr ke Alu luhn Jisus Kraist luhn Mwet Luhlahlfongi ke Lwen-sahflah, kuht fahkwack lah iwaclah lal ma nuh sin facluh nohfohn.

Enenuh nuh ke Iwaclah nuh tok ma pahtpaht

Ke nga forfor nuh ke kais sie acn, nga oruh kihsensiyuck luhk nuh sin kain in mempuhr ke alu uh. Nga mokleyuck in lohng puhla lalos ke mwe insewowo ke Iwaclah lal Jisus Kraist ke moul lalos, finne ke elos fahkwack ma koluk lalos uh. Fuhkah wolacna iyacn ahknwacsnwacs se utuckuh nuh sesr pacl nuhkwewa ke srihpen Iwaclah lal!

“Enenuh in oasr iwaclah se oreklac,” Amulek el fahk, “tuh fin wacngihn mwet nuhkwewa enenuh in tuhlac.” ahok, mwet nuhkwewa puhtatlac ac tuhlac, ac enenuh in misac fin tiac ke iwaclah suc fal in oreklac. ke ma inge wacngihn ma kuh in apkuhran nuh ke iwaclah wacngihn sahflahiyac ma ac fah fal nuh ke ma koluk luhn facluh. (Alma 34:9, 10, 12).

Mwet pahluh Jacod el oacyacpac luti lah ke sripen “misac uh ituhkyang nuh sin mwet nuhkwewa, … enenuh in oasr kuh nuhke sifilpac moulyak” in us kuht nuh yurin God (2 Nephi 9:6).

Kwewana ma koluk ac misac uh enenuh in kuhtangyucklac. Pa inge orekma se luhn Mwet Lahngo lasr, suc pa el ahkfalyelah ke puhlaik luhn tuhlihk nuhtin God.

Gethsemane, sel J. Kirk Richards, tiac kuh in sihmyuck

Iwaclah luhn Mwet Lahngo

Ke fong sahlfah lal fin facluh se inge, Jisus Kraist el utyak nuhke Imac Gethsemane. El sikuckmuhtuhnteyak ac pruhe ke ahsor na luhlahp suc sie ahsor ma kom ac nga e fah tiacna etuh.

El eis ma koluk nuhkwewa luhn facluh nuh facl sifacna. El puhla kweok nuhkwewa, ngal, ac ahsor, ac el muhtwacnglah kweok nuhkwewa pa kom, nga ac mwet nuhkwewa puhlakihn ma moul tari kuh e fah moul fin facluh uh. Kweok lal Jisus arulacna yohk pwacnwacng El rarrar ke srihpen waek, ac srah kahklac liki Mahnol (liye Doctrine and Covenants 19:18). El muhkwena kuh in oruh ma se inge.

Wacngihn mwet sahyac fal 
In elah ma koluk.
El kuh na in ikucslah sruhnguhl uh
Nuhke inkuhsrao ac lwelah kuht in utyak.3

Utucklac Jisus nuh Calvary ac srihpsrihpyak el fin sahksin soko. Wacngihn sie fanna kuh in eislah moul lal luhkwel. Ke El pa Wen Sefanna nuhtin God, oasr kuh lal in tiac misac. El kuh in pruhe nuh sin pahpah tuhmwacl, ac lipufacn uh kuh in tuhkuh onwelah kwewa mwet ma ahkkweokyacl ac ahkkahlwemye fuhlwactiyacl. “Tuhsruhk ma suhmuhslah uh e fuhkah ahkpwacyeiyucklac,” Jisus el siyuck, “tuh pwacnwacng enenuh in ohinge?” (Matthew 26:54).

Ke srihpen ahkostwen lal nuh sin Pahpah tuhmwacl—ac e luhngse pwacye lal nuh sesr—Jisus el sang moul lal ac ahkfahsryelah iwaclah, suc kuh in puhlakihnyuck ke pacl met ah ac inge ne tok ma pahtpaht.

Kuhtanglah luhn Mwet Lahngo lasr

Jisus el sapkihn nuh sin mwet Sap lal in tahfwelah na orekma lal tukun el misac. Elos e oruh fuhkah? Inkaiyaclos mwet ahyah muhkwena, ac wacngihn selos lutlut ke lohm alu ah in luti ke kahs lal. Ke pacl se inge, Alu lal Kraist fahfahlac in wacngihnlac liki facluh. Tuhsruhk mwet Sap inge konwacack kuh in oruh pahng lalos ac ahkwoyelah facluh.

Meac se pwacnwacng in oasr kuh tuhkuh liki muhnahs lalos suc ma arulacna kahlwem ye muhtuhn mwet uh? Mwet kol se ke alu ac suc pahngpahng Frederic Farrar tuh fahk: “Oasr sie, ac sie fanna” top fal—sifilpac moulyak luhn mwet misac. Eklac luhlahp se inge ma ke srihpen kuh ke moulyak lal Kraist.”⁴ Ke elos ekihn mwet loh luhn Leum suc sifilpac moulyak, Mwet Sap elos etuh lah wacngihn ma kuh in tulokihn orekma se inge. Loh lalos pa kuh in ahkkweye ke pacl se Alu lal kuhtanglah nohfohn ma lain.

Ke puhluhn pacl in Ista se inge, ke nga ekihn sie mwet loh lal ma akmuhsralah, nga fahkwack lah ke sie litutacng in sacnri se, Leum Jisus Kraist el tuh moulyak liki misac in ahkfokokoye kuht ac in sang nuh sin mwet nuhkwewa in kuh ac in sifil moulyak liki misac. Jisus Kraist el moul! Ke srihpacl, tiac misac pa sahflahiyac uh. Iwaclah lal Kraist pa mwe sang se nuh sin nohfohn.

Kraist ac Mary ke kuclyuck ah, sel Joseph

Tuhkuh nuh yurin Kraist

Wosasuc ac Iwaclah lal Jisus Kraist ma nuh sin nohfohn—kalmac pa, mwet nuhkwewa. Inkacnek se fanna kuht kuh in eis nohfohn mwe insewowo ke iwaclah lal Mwet Lahngo pa in eis suliyuck lal: “Fahsruh nuh yuruk” (Matthew 11:28).

Kuht fahsr nuh yurin Kraist ke kuht ahkyohkye luhlahlfongi lal kacl uh ac auliyak uh. Kuht fahsr nuh yohrohl ke kuht pacptaislac ke inel ac eis mwe sang luhn Nguhn Muhtahl. Kuht fahsr nuh yohrohl ke kuht liyacacng masap lal, eis akwuck muhtahl, liyacacng olwelah lasr, orekma lun temple, ac moulkihn moul oacna mwet luhlahlfongi lal Kraist moul oruh uh.

Kuhtuh pacl uh, kom e sun muhnahslah ac suhpwacrlac. Insiom kuh in puhlakihn ahsor ke ma kom oasr kac kuh nuh sin sie mwet kom luhngse. Kom kuh in puhla toasr ke ma koluk luhn mwet sahyac. Tahfonglac ma kom oraclah—sahp ma upac—kuh in oruh kom in sahngweng ac sensenkihn muh mislac ac engan wacngihnlac liki kom ne tok. Ke kain pacl inge, esam lah Mwet Lahngo el tiac sruhkwack toasriyacn ma koluk uh muhkwena tuhsruhk el oacyacpac “kweok ke waek ac ma upac ac mwe sruhf ke kain in ma nuhkwewa” (Alma 7:11), weacng pacna ma kom puhlakihn ingena an! Ke srihpen ma el puhlakihn lom inge, El etuh lah elac kahsre kom fuhkah ke kom e eis suliyuck lal in ekuhllah moul lom: “Fahsruh nuh yuruk.”

Mwet nuhkwewa lwelah

Jisus Kraist el oruh kahlwem tari lah nohfohn tuhlihk nahtuhl Pahpah Luhng oacna sie insewowo lalos e eis ke wosasuc ac Iwaclah lal. El ahkacsmakihnye kuht lah mwet nuhkwewa kuh in oacna sie nuh sin sie sahyac, ac wacngihn mwet sruhngwacyuck. (2 Nephi 26:28).

“El suli elos nuhkwewa in tuhkuh nuh Yohrohl ac ipeis ke wolacna Lal; ac wacngihn kuhtwena mwet El sruhnga suc tuhkuh nuh Yohrohl, sralsral ac fasrfasr, srohoh ac sukohsohk, mukul ac muhtwacn” (2 Nephi 26:33).

“El solwaclos nohfohn”—kalmac pa kuht nohfohn! Kuht tiac enenuh in srisri. Kuht tiac enenuh in sifacna lusrohng kuht liki luhngse luhn Mwet Lahngo ac nuhnkuh muh kuht tiac kuh in fototo nuh yohrohl. Oacna ke nga fahk tari, “Kom tiac kuh in puhtati nuh ke acn ma kahlwem ma pahtpaht luhn Iwaclah luhn Kraist uh tiac kuh in kalmwelihk.”⁵

Oacna ke nga ac Sister Holland luti mahlwem ekahsr mwet liki el misac, sapkihnyuck nuh sesr in “in oasr luhngse sesr” (2 Nephi 26:30).⁶ Pa inge luhngse se ma Mwet Lahngo el ahkkahlwemye nuh sesr, tuh el oruh ma nuhkwewa nuhke wo luhn facluh; tuh el luhngse facluh, finne in misac ac pwacnlah nohfohn mwet uh nuh yohrohl” (2 Nephi 26:24).

Nga fahkwack lah wosasuc ac Iwaclah lal Jisus Kraist ma nuh sin mwet nuhkwewa. Nga pruhe tuh kowos in eis ke engan mwe insewowo ma el usot nuh suwos.

© 2024 sin Intellectual Reserve, Inc. Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac ke lweng: 6/19. Lweng nuhke Monthly Liahona Message, Mahs 2024. Kosraean. 19284 868