Fare Tathapeg nifan ko Gubin, ba Gospel nifan ko Gubin

Elder Jeffrey R. Holland

President e chiney ko fare Ulung ko fa Ragag Nge L’agruw i Apostles.

Fare gospal, Bayul, nge Foskoyam’ Ku Yesus Kristus era Tow’ath Nag Gubin ea Bitir ku Got.

Fare gospel ku Yesus Kristus nika fulweg yarmen e ir, e bin somm’on, nge bin th’abi, nge bin nib manechubog, e kanawo’en e falfalaen’, gapas, nge falfalaen’ nifan gubin e gidii’ u tin tomur e rran ney. Fapi tawa’ath nima yib ko fare gospel ma kuma yib rok’ Kristus e gathi kemus nifan ngak boch e gidii’ nikan me’eleg, fa kemus nifan e tin ni kakrom fa ngiyal’ ko chiney.

Demuturug rogon ni gadaed be thamiy ni dabyag rodaed, ma demuturug rogon e pi denen nibe palog nagdaed rok’, ya Somoel e ke micheg ni “kʼiyeg paʼ [ngodaed] nga dakeanraed ni nge ayuwegraed ni poloʼ fare rran” (Jacob 6:4), nibe pinning daed ni ngad ngak ngad thamiyed fare t’ufeg rok’.

Fapi Tawa’ath ko Gospel nifan ko Fayleng ni Ga’angin

Fare gospel ku Yesus Kristus e kan “fulweg ko tin tomur e rran ni ngeyag ni … ayuweg gubin e pi nam, mfen, nge thin, nge gidiiʼ.”¹ Fare gospel nima gaaʼnag ko demtrug e miit e gidiiʼ nge raen ko dow nge yib ufithikʼ gubin e yalen e gidiiʼ nima fil “ma gubin ma ta’areb rogon rok’ Got” (2 Nephi 26:33).² Fare Babiyor ku Mormon ma dag ngodad e tin nib riyulʼ ney.

Biney e babyor e mich riy ni Kristus e manang gubin e nam (muguy ko 2 Nephi 29:7) nge ni “ma mʼug ngakʼ gubin e piʼin nib michaenʼraed ngakʼ, … [ma muruwliy] e maʼangʼang, nge pow, nge ʼangʼang u fithikʼ e gidiiʼ u rogon e mich roraed. (2 Nephi 26:13). U fithik’ e pi ma’ang’ang ney, pow riy, e irerram fare gospel nibe garar i yean. Arram fan, ni gadaed be pii’ fapi tamachib u dakean e fayleng ni ngar micheged e biney e thin ni rib fel’. Ma kagdaed ma weliy fare gospel ngak e pi’in ni bay u charren daed. Fapi kiy ko priesthood nikan fulweg yarmen ni yima rrin’ nifan e tin nib fos e gidii’ nge tin nike yim’ e be micheg ni fare gospel nib polo’ ni rayag ni nge thapeg gubin e bitir ni pumo’on nge bpin nifak e galbithir rodaed nibay u tharmiy—tin ni kakrom, tin ni chiney, nge tin nga mm’on.

Bin th’abi lukungun ko re gospel ney—ni’ir e bin th’abi ga’ e mulwol nibe machib nag fapi profet ni gubin nge fapi apostle nikan pinningraed ko biney e muruwel—ni Yesus e ir Kristus make yib ni nge tawa’ath nagdaed. Gidii’en Fare Galasia ku Yesus Kristus ni Fan ko Gidii’en Got ko Tin Tomur e Rran, ngad doged ni fare bayul rok’ e fan e fayleng ni gubin.

Fan nib Ga’fan fare Bayul nib Manechubog ni Dariy Bi’id Manemus

Napan ni gura milekag u dakean e fayleng, ma guma interview nag boch e members ko Galasia nib thilthil. Guma falfalaen’ ngay napan ni gura rung’ag rogon nikar thamiyed fapi tawa’ath ko bayul ku Yesus Kristus ulan e yafos roraed, nib mu’un e pogofay nag e denen nikar rrin’ed. Ba tawa’ath ni rib fel’ nima yib ko fare Bayul rok’ nima be’ech nigey ni gubin ngiyal’ ma bay ni fan ngak e gidii’ ni gubin!

“Ya rib tʼuf ni thingar ni falʼeg ba bayul,” ni yog Amulek, “ara gubin e gidiiʼ ma thingar ra mʼaed ni dabisiy.” Gadaed gubin ni gadaedra “mul … malog gaed, … ma kemus ni faʼanra bay ba bayul,” niʼir e rib “tʼuf ni ngan falʼeg.” Ya “dariy banʼen nib achig u bbayul ni dariy napʼan, ni rayog riy ni nge bayuliy e denen ko gidiiʼ nu fayleng.” (Alma 34:9, 10, 12).

Fare profet Jacob e machib nag ni bachan e “yamʼ ni ke yib nga dakean gubin e gidiiʼ,, … gaaʼ, ere thingari tʼuf ni nge yib ba gelingin e foskoyamʼ” ni nge fek daed ko gin ni bay Gor riy (2 Nephi 9:6).

Denen nge yam’ e l’agruw nib tu’uf ni ngan gelnag. Irraray e muruwel rok’ fare Somoel, nike mu’ i rrin nifan ko gubin pifak Got.

Gethsemane, rok’ J. Kirk Richards, dabiyag ni ngan fanay ya’an

Fare Miligach rok’ e Somoel Rodaed

Napan fare bin tomur e nap ni’i moy u fayleng, Yesus Kristus e yean ngalan fare Milay’ nu Gethsemane. U rom, me rugbug u fithik’ fapi gak’iy ni olives me tabab i thamiy urngin mit e amith ni dariy bi’id ma rayag ni ngad nangfaned.

U rom, me tabab i fek nga dakean fapi denen ko gidiiʼ nu fayleng. Thamiy urngin mit e amith, gafgow, nge kirbaen’, make athamgiliy urngin mit e amith nge gafgow ni gabe thamiy, ma gube thamiy, nge gubin e gidii’ nibay nib fos nge tin ni bayib. Biney e amith ni ta’ [Yesus] ’ni amith ni rib gel, … ma ii yib ea racha’ ko gubin yang u doew” (Doctrine nge Covenants 19:18) Kemus ni’ir e rayag ni nge rrin’ e biney.

Ya dariy bee’ ngabang nib fel’ ngak.
Ni nge pii’ puluw e pi denen rodaed.
Kemus ni’ir e rayag ni nge bing fare garog
Ko tharmiy me pag daed ngad bad ngalan.3

Ma arram min fek Yesus nga Kalvary, ni’ir e fare ngiyal’ ni dani mat’aw ko chep nu fayleng, min kuruth nag. Dariy bee’ nrayag ni nge fek e yafos rok’. Bachan e Ir e fak ni Ma’agirag Rok’ Got, bay gelngin ni nge gel ko yam’ ko dogur. Riyul’ ni rayag nira meybil ngak e Chitamangin, ma angel ni salthaw era yib ngabi pii’ e ayuw ko gelngin e gafgow rok’ me dag gelngin ni’ir e suwey gubin banan. “Machane fa’anra gu rin’ ni aray rogon, mra di’in me m’ug nib riyul’ e tin be yog e babyor nib thothup nike yog nthingari m’ug ni aray rogon?” (Matthew 26:54).

Bachan fare liyor rok’ ngak e Chitamangin—nge t’ufeg rok’ ngodaed nib polo’—Yesus e pii’ e yafos rok’ nge fare miligach ko bayul rok’ nib manechubog, nima yean nga mada’ nga tomur nge mada’ nga mm’on ni dariy bi’id memus.

Fare Gel rok’ e Somoel Rodaed

Yesus e pii’ fapi Apostle rok’ ni ngar ul’ul’ gaed ko muruwel rok’ u tomuren nike yim’. Uw rogon ni rayag ni ngar rirn’ed e biney? Orren i yaed e bugi gidii’en e fittaq, ma dariy bagyed nikan sensey nag ko rogon e tagil’ e mo’olung nifan e machib. Ngiyal’ nem, Galasia rok’ Kristus e ni chuweg u fayleng. Machane fapi Apostle era pire’egned gelngin raed ni ngar rrin’ed fapi muruwel roraed mi yaed thilyeg e chepin e fayleng.

Mang e ma pii’ gelngiy ni ngan gel ko tin nib momaw’ ngoaded? Anglican ni bee’ nib ga’ ko galasia nge scholar Frederic Farrar era ga’ar gow: “Kemus nibay ta’areb, makemus ni ta’areb ni bay kanawo’en ko biney e fulweg— fare foskoyam’. Gubin e pin’ey nike buch nib ga’ e bachan fare glengin e foskoyam’ nik tay Kristus.”⁴ Yaed nira micheged fare foskoyam’ ni tay Somoel, fapi Apostle e kar nanged ni dariy banan ngay ni rayag nira talag e biney ni dabki mon’og. Micheg roraed e irraram e n’en ni pii’ gelnginraed napan nibe athamgil e Galasia.

Fare season ko Easter, e irraram rib fare mich riy, ni gube micheg ko fare Madnom ni kadbul, ni fos Somoel Yesus Kristus ko yam’ ni nge pii’ gelngin daed me tha’ab fare chain ko yam’ nifan gubin e gidii’. Yesus Kristus ba fos! Bachan e Ir, yam’ e gathi irreram e tomur rodaed. Fare Foskoyam’ ni tay Kristus e dariy pilwon ma ba tawa’ath nifan e fayleng ko gidii’ ni gubin.

Kristus nge Mary ko fare low ko yam’, Joseph Brickey

Moy ngak Kristus

Fare gospel nge fare Bayul rok’ Yesus Kristus e fan ko gidii’ ni gubin—ni irreram, nifan gubin e gidii’. Kanawo’en nrayag ni ngad thamiyed fapi tawa’ath nib polo’ ko fare Bayul rok’ Somoel e ngan fanay fare mulwol rok: “Mired Ngog” (Matthew 11:28).

Dared ngak Kristus ni gadaed be gay rogon e mich ngak nge kalngan’. Dared ngak ni ngad tawfe gaed u dakean fithingan min thapeg fare taw’ath ko fare Kan Thothup. Dared ngak ni gadaed be fol ko fapu motochiyel, thapeg fapi gam’ing, tayfan fapi m’ag, min un ko tin nibe buch ulan e temple, min par ni wod rogon ko fapi yalen Kristus.

Bochingiyal’, ma bay nira kirbaen’um fa kireb e tafney rom. Gum’ircha’em nibay nira kirbean’ nifan ngom fa fan ngak bee’ nib tu’uf rom. Ma bay nira tomal nigem boch e denen ko gidii’. Kireb nikam rrin’—sana bagel e kireb riy—e bay nira k’arang e murus ngom ni dabkiyag ni ngam thamiy fare gapas nge falfalaen’ n’umngin napan e yafos rom. Napan e pi ngiyal’ ney, rib tu’uf ni ngam tafney nag ni fare Somoel e gathi kemus ni chuweg e amith ko denen ya ki “gafgow ko pi amith nge kirbaenʼ nge pi lumel ni gubin mit” (Alma 7:11), nib mu’un e amith rom ngay! Bachan e n’en nike rrin’ ni bachan ngom, ir e ri manang rogon ni nge ayuweg nem napan ni gara fek e mulwol rok’ ngalan e yafos rom ngam thilyegnem: “Mired Ngog.”

Gubin e Gidii’ ma Rayag ninge Un

Yesus Kristus e ke weliy ni rib tomilang rogon ni gubin pifak e Chitamangiy nu Tharmiy e bay mat’woraed ni ta’areb rogon ko fapi tawa’ath rok’ ko gospel nge fare Bayul rok’. Ke pugorran ngodaed ni “gubin e gidiiʼ mab puf rogon ni nge yog ngoraed ni taʼareb rogon, ma dariy beeʼ ni yira siyeg rokʼ (2 Nephi 26:28).

“Ma be piningraed ni yaed gubin ni ngar baed ngakʼ ngar feked boech e murnguy rokʼ; ma dar fek yathin e piʼin nibe yib ngakʼ, ni talimor nge wechwech, ni kalbus nge de kalbus, ni pumoʼon nge ppin” (2 Nephi 26:33).

“Ma be piningraed ni yaed gubin””—biney e be yipfan ni gadaed gubin! Susun ni dabda tafney niged ni gadaed ba thil ngak boch e gidii’. Susun ni dabda tafney niged ni fare t’ufeg rok’ Somoel e dabi taw ngodaed fa ngak boch e gidii’. Wod rogon ni ku mu’ i yog, “Dabiyag ni nge mul bee’ ngari to’ar ko fare tomilang nima yib u ra’en fare Bayul rok’ Kristus,”⁵

Ya musap, ya wod rogon nigu machib nigew Sister Holland in e pul u mm’on ni yim’, nikan motochiyel nagmow ni nggu “thingari yog e tʼufeg ngoraed, nib tʼufeg ni adag” (2 Nephi 26:30).⁶ Irerray fare t’ufeg nike dag Somoel ngodaed, ya “Dariy banʼen nibe rinʼ ni gathi fan ko fayleng; ya rib tʼuf e fayleng rokʼ, ni piiʼ e pogofan rokʼ ni gomanga yog ni miliy gubin e gidiiʼ ngakʼ” (2 Nephi 26:24).

Gube micheg ni fare gospel nge fare Bayul rok’ Yesus Kristus e fan ko gidii’ ni gubin. Gube meybil ni gara thamiy e falfalaen’ ko fapi tawa’ath nima fek i yib.

© 2024 ko Intellectual Reserve, Inc. Gubin nibay mat’won. Kan yoloey u USA. Kan micheg nag ko thin nu Ngalis: 6/19. Micheg i pilyeg: 6/19. Milwol ni Ngan Thapeg ko Monthly Liahona Message, March 2024.Yapese.17464 905