“Prea Oltaem blong Fidim Sol blong Yu,” Liahona, Epr. 2024
Evri Manis Liahona Mesej, Epril 2024
Prea Oltaem blong Fidim Sol blong Yu
Yumi nidim kakae long saed blong spirit blong storian wetem Papa long Heven, hem i wan blesing we i stap oltaem long yumi evri ples mo oltaem.
Pikja blong man we i ak olsem Inos i kam long Matt Reier
Yumi evriwan i filim se oli hanggri bifo. Taem yumi hanggri hem i wan wei we i stap talem long yumi se bodi blong yumi i nidim kakae. Mo taem yumi hanggri, yumi save wanem blong mekem—kakae.
Ol Spirit blong yumi i gat ol wei blong letem yumi save se yumi nidim kakae long saed blong Spirit. Be i luk olsem se i isi blong yumi no wantem save long hanggri long saed blong spirit bitim long hemia blong bodi.
Olsem we i gat plante kaen kakae we yumi save kakae taem we yumi hanggri, i gat sam samting we yumi save mekem blong fulumap hanggri blong yumi long saed blong spirit. Olsem, yumi save “kakae gud long ol toktok blong Kraes” (2 Nifae 32:3) insaed long olgeta skripja mo tru long ol toktok blong ol profet. Yumi save go long jos evri taem mo tekpat long sakramen (luk long Doktrin mo Ol Kavenan 59:9). Yumi save sevem God mo ol pikinini blong Hem ( luk long Mosaea 2:17).
Be i gat wan narafala sos blong kakae long saed blong spirit we i stap oltaem long yumi, long evri taem long ol laef blong yumi, nomata wanem yumi stap fesem. Yumi save storian oltaem wetem Papa long Heven tru long prea.
“Mo Sol blong mi i bin Hanggri”
Olsem Profet Inos i lukaotem ol animol long ol bus; mo hem i bin tingbaot “ol toktok blong papa blong [hem] we oltaem hem i stap harem papa blong [hem] i talem long saed blong laef we i no save finis, mo glad blong ol sent.” Ol toktok ia “i bin draon dip insaed long hat blong [hem] (Inos 1:3).
From we Inos i fulap long spirit, hem i gat wan strong filing: “Sol blong mi i bin hanggri,” hem i talem (Inos 1:4; oli ademap long italik).
?Inos i bin mekem wanem taem hem i bin filim se sol blong hem i bin hanggri, nid ia blong gat kakae long saed blong spirit? “Mi bin nildaon long fored blong Meka blong mi, mo mi bin prea long hem wetem wan strongfala prea mo bin askem hem strong from sol blong miwan; mo long fuldei mi bin prea long hem” (Inos 1:4).
Hanggri blong Inos long saed blong spirit i bigwan “ long fuldei mi bin prea long hem; yes, mo taem we naet i bin kam mi bin stap blong leftemap voes blong mi laod mekem se i bin kasem ol heven.” (Inos 1:4). Long en, God i ansa long prea blong hem mo fogivim ol sin blong hem. Mekem se ol harem nogud blong Inos i lus evriwan. Be hanggri blong hem long saed blong spirit i no stop long ples ia.
Hem i lanem abaot paoa blong fet long Jisas Kraes, mo i talemaot ful sol blong hem long bihaf blong ol pipol blong hem—iven ol enemi blong hem. Hem i mekem ol kavenan wetem Lod mo kasem ol promes blong hem we i kam long Lod. Mo afta we Inos i prea strong, hem i bin go long ol pipol blong hem profesae mo testifae long ol samting we hem i bin harem mo luk. (luk long Inos 1:5–19.)
Bae i no evri prea bae oli ansarem long wan wei we i luk naes, be ol eksperiens blong yumi wetem prea bae i gat mining mo bae i jenisim laef. Yumi save lanem sam long ol impoten lesen we i kam long eksperiens blong Inos we i kam long prea. Eksampol:
-
Traem had blong laef folem gospel i save helpem yumi luksave hanggri long saed blong spirit.
-
Hanggri long saed blong spirit i save mo i sud karem yumi kam long ni blong yumi mo lukaotem help blong Papa long Heven.
-
Stap prea long Papa long Heven blong helpem hanggri long saed blong spirit—mo sam moa.
-
Mi save prea eni wea, enitaem.
-
Prea i save helpem yumi sakem sin.
-
Prea i save helpem fet blong yumi long Jisas Kraes i kam moa strong.
-
Yumi save kasem testemoni blong yuwan we Papa long Heven bae i harem yumi mo i save gud long yumi.
-
Testemoni mo paoa we yumi kasem tru long prea bae i save helpem yumi givim seves mo mekem olgeta narawan i kam moa strong.
Eksperiens blong Mi wetem Paoa blong Prea
Olsem Inos, Mi bin lanem sam long ol semmak lesen tru long eksperiens blong miwan. Taem papa, mama i joenem Jos Ia blong Jisas blong Ol Lata Dei Sent taem we mi wan yang boe, mo mi bin baptaes taem mi gat eit yia. Oltaem mi bin gat wan naes filing long hat blong mi abaot Papa long Heven mo abaot Jisas Kraes, gospel blong Hem we i kambak, mo Jos blong Hem. Be kasem taem we mi bin gat 16 yia we mi bin prea blong save trutok abaot ol samting ia.
Bisop blong mi we i kasem insperesen i askem mi blong tijim wan yut Sandei Skul klas. Blong mi tijim wan lesen abaot olsem wanem mi kasem wan testemoni blong gospel tru long prea. Asaenmen ia we i kam long bisop i mekem mi blong mi tingting moa abaot testemoni blong mi. Mi tekem taem blong mi stadi long Buk blong Momon mo oltaem filim se Jos i tru. Oltaem mi biliv long Sevya Jisas Kraes, be mi neva tekem long hat blong mi promes blong Moronae we i stap insaed long Moronae 10:4–5. Mi neva prea from trutok blong gospel.
Mi tingabaot filing ia insaed long hat blong mi se sapos mi tijim ol yut ia long olsem wanem blong kasem wan testemoni tru long prea, mi sud prea from wan testemoni blong miwan. Sol blong mi i bin hanggri—ating long defren wei long hemia blong Inos, be mi filim wan nid long saed blong spirit
Taem mi stap rere long lesen. Mo nil daon mo talem wanem hat blong mi wantem long Papa long Heven blong talemaot trutok we mi bin filim. Mi no tingting blong kasem wan ansa we i bigwan. Be taem mi askem Lod sapos gospel ia i tru, hemia i kam long hat blong mi wan swit filing—voes ia we i smol, we i talem long mi se i tru mo mi mas gohed blong mekem wanem we mi stap mekem.
Filing ia we i strong tumas mekem se mi nogat tu tingting mo talem se mi no save. Mi hapi fuldei. Maen blong mi i stap long heven stap tingting long naesfala filing ia long hat blong mi.
Long Sandei ia, mi stanap long fored blong tri o fo klasmet blong mi, we oli moa yang long mi. Mi testifae long olgeta se Papa long Heven bae i ansarem ol prea blong olgeta sapos oli gat fet.
Prea blong Elda Soares we hem i kasem ansa long hem olsem wan yang man i letem hem blong i testifae—olsem wan misinari (antap), papa mo hasban, mo Aposol—se Papa long Heven i ansa long prea we oli talem wetem fet.
Stat long taem ia i go, testemoni ia i stap wetem mi. I helpem mi blong mekem ol desisen speseli long ol taem we mi stap fesem ol jalenj. Se wan prea long dei ia, wetem sam moa witnes mi bin kasem tru long ol yia, i letem mi blong testifae long ol pipol, wetem strong tingting, se oli save kasem ol ansa we i kam long Papa long Heven sapos oli prea wetem fet. Hemia i tru from mi bin testifae olsem wan misinari, olsem wan Jos lida, olsem wan papa mo hasban, mo iven tedei olsem wan Aposol.
Wetaem mo Wanem blong Prea
Yes, bae yumi no prea nomo sapos yumi filim se yumi nidim wan strong nid blong spirit. Mekem se, ?wetaem yumi sud prea? ?Mo wanem nao yumi save prea from? Sot ansa hem i eni taem mo blong eni samting.
God hem i Papa blong yumi long Heven. Save hemia i jenisim olsem wanem yumi prea. Profet Josef Smit i tijim: “Blong gat save blong God, yumi stat blong save olsem wanem blong go kolosap long Hem, mo askem olsem wanem blong kasem wan ansa. … Taem yumi rere blong kam long Hem, Hem i rere blong kam long yumi.”1
Papa blong yumi long Heven oltaem i rere blong lisin long yumi mo wantem yumi blong prea long Hem oltaem. Yumi sud “askem advaes long Lod long evri samting we [yumi] mekem” (Alma 37:37) mo prea moning, medel dei, mo naet. Yumi sud prea long hom, long wok, long skul—eni wea we maet yu stap long hem mo long eni samting we yu stap gotru long hem (luk long Alma 34:17–26).
Yumi sud prea insaed long ol famli blong yumi (luk long 3 Nifae 18:21). Yumi sud prea “long wan voes we i laod mo long hat blong yu, long pablik mo long praevet” (Doktrin mo Ol Kavenan 81:3). Yes, mo “taem we [yufala] i no prea long Lod, [yufala i sud] letem hat blong [yufala] i stap fulap, we oltaem i stap prea long hem from gudlaef blong [yufala] , mo tu, from gudlaef blong olgeta we oli stap raon long [yufala]” (Alma 34:27). Mo yumi mas prea oltaem long Papa long nem blong Jisas Kraes (luk long 3 Nifae 18:19–20).
Pikja droing blong Joseph Smith i kam long Walter Rane, oli no save kopi
Stap Kam Kolosap long Papa long Heven
Papa blong yumi long Heven i wantem blesem yumi. Mo bae Hem i—sapos yumi askem. Profet Josef Smit i tijim, “Tingbaot se taem yumi no askem bae yumi no kasem wan samting; mekem se yumi mas askem wetem fet, mo bae yumi kasem ol blesing ia olsem we Gud i luk se i stret blong Hem i givim long yu.”2
Ol prea we yumi stap mekem oltaem oli impoten pat blong lukaotem kakae blong yumi long kakae long saed blong spirit long ol sol blong yumi we i hanggri. Blong stap storian wetem Papa long Heven tru long prea oltaem i stap mo i welkam long eni wea mo oltaem.
Hemia i wan long ol fevret skripja blong mi we i tijim olsem wanem yumi sud kam moa kolosap long Papa long Heven taem yumi nil daon mo prea: “Putum tingting blong yu i stap daon; mo Lod, God blong yu, bae i tekem han blong yu mo lidim yu, mo givim ansa long ol prea blong yu” (Doktrin mo Ol Kavenan 112:10). Taem yumi putum tingting i stap daon mo stap obei, Papa long Heven bae i stap wetem yumi. Hem bae i lidim yumi. Hem bae i i givim long yumi insperesen long wea ples bae yumi go mo wanem blong mekem. Hem bae i givim ol ansa long ol prea blong yumi long stret tingting, wei, taem, blong Hem, mo stret save long wanem i gud blong yumi.
Yumi sud tingbaot hemia mo kam blong lavem ol janis blong kam kolosap long tron blong God mo kasem ol blesing long han blong Hem.
© 2024 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Monthly Liahona Message, April 2024. Language. 19283 852