Vakania na Yalomu ena Masu Wasoma

Mai vei Elder Ulisses Soares

Mai na Kuoramu ni iApositolo Le Tinikarua

Eda gadreva na veivakani vakayalo ni veitaratara kei na Tamada Vakalomalagi, e dua na veivakalougatataki e vakarautaki tu kivei keda ena veivanua kecega kei na veigauna kecega.

Eda a sa dau vakila kece na viakana e liu. Na walokai ni viakana sa ikoya na ivakarau ni yago e tukuna tiko vei keda ni gadrevi me vakani. Ka ni da sa via kana, eda sa kila na ka e gadrevi me da cakava—kana.

E tiko talega na sala ni yaloda me vakatakila vei keda na gauna eda gadreva kina na veivakani vakayalo. Ia e vaka me rawarawa cake vei keda me da vakawalena na viakana vakayalo mai na viakana vakayago.

Me vaka ga ni vuqa tu na veimataqali kakana eda rawa ni kania ni da via kana, era tu eso na ka eda rawa ni cakava me vakatawani kina na noda viakana vakayalo. Me ivakaraitaki, sa rawa ni da “kana magiti ena vosa i Karisito” (2 Nifai 32:3) ena ivolanikalou kei na nodra vosa na parofita. E rawa ni da lako wasoma ki lotu ka vakaivotavota ena sakaramede (raica na Vunau kei na Veiyalayalati 59:9). E rawa ni da qarava na Kalou kei ira na Luvena (raica na Mosaia 2:17).

Ia e tiko tale e dua na ivurevure ni veivakani vakayalo sa vakarautaki tu vei keda ena veigauna kece, ena veisiga kece ni noda bula, se cava ga na keda ituvaki. E rawa ni da dau veitaratara kei Tamada Vakalomalagi ena masu.

“Sa Waloloi na Yaloqu”

Ni vakasasa manumanu kila ni veikau voli na parofita o Inosi, a vakasamataka sara “na veivosa ka dau rogoca [o koya] ni dau cavuta ko tama[na] me baleta na bula tawamudu, kei na nodra reki na yalododonu.” Na veivosa oqo “a lutu vakavinaka sara ki [lomana]” (Inosi 1:3).

Baleta ni a tu ena vakasama vakayalo oqo o Inosi, a vakila kina o koya e dua na gagadre kaukauwa: “Sa waloloi na yaloqu,” a kaya o koya (Inosi 1:4; vakaikuritaki).

Na cava a cakava o Inosi ena nona vakila na viakana vakayalo oqo, na gagadre oqo me vakani vakayalo? “Ka’u tekiduru e matana na noqu Dauniveibuli, ka’u a tagi vua ena masu kaukauwa kei na yalo ni vakatakekere me baleta na yaloqu” (Inosi 1:4).

A rui levu sara na viakana vakayalo nei Inosi ka masulaka kina “ena siga taucoko … io ni sa bogi mai … sa tabalaka cake tikoga na [domona] me yaco ki lomalagi” (Inosi 1:4). A mani qai sauma na Kalou na nona masu ka vosota na nona ivalavala ca. A vakila o Inosi ni sa kau tani na nona cala. Ia na nona vakani vakayalo a sega ni tini ga e kea.

A vulica me baleta na kaukauwa ni vakabauti Jisu Karisito, ka sovaraka yani na yalona taucoko ena vukudra na nona tamata—o ira sara mada ga na nona meca. A caka veiyalayalati o koya kei na Turaga ka rawata na nona yalayala mai Vua. Ia ni oti na masu qaqa nei Inosi, a lako voli ena kedra maliwa na nona tamata ka parofisaitaka ka vakadinadinataka na veika e a rogoca ka raica. (Raica na Inosi 1:5–19.)

E sega ni masu kece ena saumi mai ena dua na sala vakasakiti vaka oya, ia na veika eda sotava ena masu e rawa tikoga ni vakaibalebale ka veisautaki bula. Eda rawa ni vulica eso na lesoni bibi mai na veika a sotava o Inosi ena masu. Me vakataka:

Na sasaga me taucoko na noda bulataka na kosipeli ena rawa ni vukei keda me da vakila na noda viakana vakayalo.
Na noda via kana vakayalo e rawa ka dodonu me kauti keda sobu ki duruda me da vakasaqara na veivuke ni Tamada Vakalomalagi.
Na masu vua na Tamada Vakalomalagi e rawa ni vukea na vakacegu ni noda viakana vakayalo—oti qai so tale.
E rawa ni da masu ena dua ga na vanua, ena dua ga na gauna.
Na masu e rawa ni vukei keda me da veivutuni.
Na masu e rawa ni vakaqaqacotaka na noda vakabauti Jisu Karisito.
E rawa ni da ciqoma e dua na noda ivakadinadina vakai keda ni dau rogoci keda na Tamada Vakalomalagi ka kilai keda tu.
Na ivakadinadina kei na kaukauwa eda ciqoma ena masu e rawa ni vukei keda me da veiqaravi ka vaqaqacotaki ira na tani.

Na Veika Au Sotava ena Kaukauwa ni Masu

Me vakataki Inosi, au a vulica eso na lesoni vata oqo mai na veika au a sotava vakai au. Rau a lewena Na Lotu i Jisu Karisito ni Yalododonu Edaidai na noqu itubutubu ni’u se gonetagane lailai, ka’u a papitaiso ni’u sa yabaki walu. Au dau vakila tu ga e yaloqu e dua na yalo vinaka ka veivakatakatari me baleta na Tamaqu Vakalomalagi kei Jisu Karisito, na Nona kosipeli vakalesui mai, kei na Nona Lotu. Ia me yacova sara ni’u sa yabaki 16 ka’u sa qai masulaka kina na dina ni veika oqo.

A kerei au na noqu bisopi vakauqeti me’u vakavulica e dua na kalasi ni Matawilivola ni Sigatabu ni itabagone. A dodonu me’u vakavulica e dua na lesoni me baleta na sala eda rawa ni rawata kina e dua na ivakadinadina ni kosipeli ena masu. Na ilesilesi oqo mai vei noqu bisopi a vakavuna me’u vakasamataka vakatitobu na noqu ivakadinadina vakai au. Au a taura na gauna me’u vulica na iVola i Momani ka’u dau vakila tu ga ni dina na Lotu. Au a dau vakabauta tu ga na iVakabula o Jisu Karisito, ia au se bera vakadua ni taura vakabibi na yalayala nei Moronai ena Moronai 10:4–5. Au a se bera vakadua ni bau masulaka na dina ni kosipeli.

Au a vakila e yaloqu ni kevaka me’u na vakavulici ira na itabagone oqo ena ivakarau me ra rawata kina e dua na ivakadinadina ena masu, e dodonu me’u masulaka vakataki au e dua na ivakadinadina. A waloloi na yaloqu—ena dua beka na sala duidui mai vei Inosi, ia au a vakila ga e dua na gagadre vakayalo.

Ni’u vakarautaka na lesoni, au a tekiduru ka solia na gagadre ni yaloqu vua na Tamaqu Vakalomalagi me vakadeitaka na dina au a vakila e lomaqu. Au a sega ni namaka tiko me dua na ivakaraitaki levu. Ia ni’u taroga na Turaga kevaka e dina na kosipeli, a yaco mai ki yaloqu e dua na yalo kamica sara—na domo malua, lailai ka vakadeitaka vei au ni dina ka dodonu me’u tomana tikoga na noqu cakava na ka au cakava tiko.

A kaukauwa sara na veika au vakila ka’u sega ni rawa vakadua ni vakawalena na isaunitaro oya ka kaya ni’u sega ni kila. Au a marau vakalevu ena siga taucoko oya. A laveti tu ki lomalagi na lomaqu ni’u vakasamataka tiko na totoka ni veika au vakila e yaloqu.

Ena Sigatabu ka tarava, au a tucake tu e matadratou na lewe tolu se va na noqu lewe ni kalasi, ka ra gone kece mai vei au. Au a vakadinadinataka vei iratou ni na sauma na nodratou masu na Tamada Vakalomalagi kevaka eratou vakabauta.

Mai na dua na isau ni masu ka a ciqoma o Elder Soares ni se cauravou a vakatara vua me vakadinadinataka—vaka dua na daukaulotu (e cake), tama ka tagane vakawati, ka vaka iApositolo—ni sa dau sauma na Tamada Vakalomalagi na masu e cabori ena vakabauta.

Mai na gauna oya, sa dau tu ga vata kei au na ivakadinadina oqo. E sa vukei au me’u vakatulewa, vakabibi ena veigauna au sotava kina na veibolebole eso. Na masu oya ena siga oya, vata kei na ikuri ni ivakadinadina au sa ciqoma ena veiyabaki sa oti, sa vakatara vei au me’u vakadinadinataka vei ira na tamata, ena yalodina, ni rawa ni ra rawata na isaunitaro mai vei Tamada Vakalomalagi kevaka era masu ena vakabauta. E sa ka dina oqo me vaka au sa vakadinadinataka vaka dua na daukaulotu, vaka dua na iliuliu ni Lotu, vaka dua na tama ka tagane vakawati, vakakina nikua vaka dua na iApositolo.

Na Gauna kei na Cava ni Masu

E dina sara, eda na sega walega ni masu ni da vakila e dua na gagadre kaukauwa vakayalo. Okoya gona, na gauna cava me da masu kina? Kei na cava soti me da masulaka? Na kena isau lekaleka oya ena dua ga na gauna kei na veika kecega.

Na Kalou sa Tamada Vakalomalagi. Na kilai ni ka oqo e veisautaka na ivakarau ni noda masu. E vakavulica na Parofita o Josefa Simici: “Ni da sa kila na Kalou, sa tekivu me da kila na sala me da torovi Koya kina, kei na sala me da kerekere kina me da ciqoma na kena isau. … Ni da sa vakarau tu me da lako mai Vua, sa vakarau tu o Koya me lako mai vei keda.”¹

Sa dau tuvakarau tu ga na Tamada Vakalomalagi me rogoci keda ka vinakata me da dau masuti Koya wasoma ka vakavuqa. E dodonu me da dau “vakarorogotaka vua na Turaga na ka kecega [eda] kitaka” (Alama 37:37) ka dau masu ena mataka, sigalevu, kei na bogi. Sa dodonu me da dau masu e vale, e vanua ni cakacaka, e koronivuli—ena vanua cava ga eda tu kina kei na veika cava ga eda segata (raica na Alama 34:17–26).

E dodonu me da dau masu ena noda matavuvale (raica na 3 Nifai 18:21). E dodonu me da dau masu “vakadomoilevu kei na masu ni [yaloda], ena matanalevu kei na tikina vuni” (Vunau kei na Veiyalayalati 81:3). Ia “ni [da] sega ni tagi vua na Turaga, [e dodonu] me vakasinaiti na [yaloda], ni [da] masuti koya tikoga me baleta na [noda] tiko vinaka, kei na nodra tiko vinaka talega ko ira ka tiko wavoliti [keda]” (Alma 34:27). Ka sa dodonu me da dau masu tikoga vua na Tamada ena yaca i Jisu Karisito (raica na 3 Nifai 18:19–20).

Droini kei Josefa Simici mai vei Walter Rane, me kakua ni lavetaki

Na Torovi Tamada Vakalomalagi

E vinakata na Tamada Vakalomalagi me vakalougatataki keda. Ka na cakava dina o Koya—kevaka eda kerea. A vakavulica na Parofita o Josefa Simici, “Mo dou nanuma tiko ni kevaka eda sa sega ni kerea e dua na ka eda sa sega ni rawata e dua na ka; o koya mo dou kerekere ena vakabauta, ka dou na rawata kina na veivakalougatataki vakaoqo me vaka sa raica na Kalou ni sa ganiti kemudou.”²

Na noda masu wasoma ka vakavuqa sa tiki bibi ni dua na kakana vakayalo veirauti vinaka ki na yaloda sa viakana tu. Sa vakarautaki tu na veitaratara kei na Tamada Vakalomalagi ena masu ka kidavaki ena veivanua kecega kei na veigauna kecega.

E dua na noqu ivolanikalou taleitaki e vakavulica na sala me da torova kina na Tamada Vakalomalagi ni da tekiduru me da masu: “Mo yalomalumalumu; ena tuberi iko e ligamu na Turaga na nomu Kalou, ka sauma vei iko na nomu masu” (Vunau kei na Veiyalayalati 112:10). Ni da sa yalomalumalumu ka talairawarawa, ena tiko vata kei keda na Tamada Vakalomalagi. Ena tuberi keda e ligada. Ena vakauqeti keda o Koya ena vanua me da lako kina kei na cava me da cakava. Ena sauma o Koya na noda masu me vaka na Nona lewa, sala, kena gauna, kei na kila deivaki ni veika e vinaka vei keda.

Sa dodonu me da nanuma tiko oqo ka vakamareqeta na madigi me da torova yani na itikotiko vakaturaga ni Kalou ka ciqoma na veivakalougatataki e Ligana.

© 2024 mai na Intellectual Reserve, Inc. Dodonu taucoko e taqomaki. Tabaki e Amerika. Vakadonui me vaka Valagi: 6/19. Vakadonui me vakadewataki: 6/19. iVakadewa ni Monthly Liahona Message, April 2024. Language. 19283 858